Read Diospa Simin Qelqa AMÓS 1 Bible Online

AMÓS 1 - Diospa Simin Qelqa bible

AMÓS 1

¹Amosqa Tecoa llaqtapi michiqmi karqan. Judá suyupi rey Uzías kamachishaqtin, Israel suyupitaq Joaspa churin rey Jeroboam kamachishaqtin, iskay wataraq terremoto kananpaq kashaqtinmi, Diosqa Amosta rimaykuspa Israel suyumanta rikuchirqan. Chaymi payqa tukuy kaykunata willarqan.

²Amosmi nirqan: Señor Diosmi Sionmanta kunununumun, Jerusalenmanta manchakuyta qaparimun, michiqkunaq michinan pastokunan naq'epun, Carmelo orqo patan ch'akipun, nispa.

³Señor Diosmi nin: Damasco runakunan sinchitaña huchallikun, chaymi paykunataqa muchuchisaqpuni, Galaadpi tiyaqkunatan fierro kiruyoq saruchinawan sarurqanku.

⁴Chaymi rey Hazaelpa wasinta ninawan hap'iykachisaq, rey Ben-Hadadpa palaciontataq ruphaykunqa.

⁵Damasco punkukunatan kicharparisaq, Avén wayq'opi[1] tiyaqkunatan wañurqarichisaq, Bet-Edenpi[2] kamachikuqtan sipirqarisaq. Siria suyu runakunapas Kirmanmi preso apasqa kanqa, ninmi Señor Diosqa.

⁶Señor Diosmi nin: Gaza runakunan sinchitaña huchallikun, chaymi paykunataqa muchuchisaqpuni, llaqtallantintan presota aparqanku Edom runakunaman kamachipaq vendenankupaq.

⁷Chaymi Gaza muyuriq perqata ninawan hap'iykachisaq, qhapaq wasinkunatataq ruphaykunqa.

⁸Asdodpi tiyaqkunatan wañurqarichisaq, Ascalonpi kamachikuqtan sipirqosaq. Ecrón llaqtatan muchuchisaq, puchuq Filistea runapas wañunqan, ninmi Señor Diosqa.

⁹Señor Diosmi nin: Tiro runakunan sinchitaña huchallikun, chaymi paykunataqa muchuchisaqpuni, Edommanmi llaqtallantinta kamachipaq hap'iykachirqanku, wawqepura rimanakusqankuta pisichaspanku.

¹⁰Chaymi Tiro llaqtaq muyuriq perqanta ninawan hap'iykachisaq, qhapaq wasinkunatataq ruphaykunqa, nispa.

¹¹Señor Diosmi nin: Edom runakunan sinchitaña huchallikun, chaymi paykunataqa muchuchisaqpuni. Wawqen Israelwan ayllu kasqanta negaspan espada makintin qatiykacharqan. K'araktataq phiñapayashallarqanpuni, manataq hayk'aqpas phiñakuyninqa thanirqanchu.

¹²Chaymi Temán llaqtata ninawan hap'iykachisaq. Bosrapi qhapaq wasikunatataq ruphaykunqa, nispa.

¹³Señor Diosmi nin: Amón runakunan sinchitaña huchallikun, chaymi paykunataqa muchuchisaqpuni, hallp'ankuta hatunyachinapaqmi wiksallisqa Galaad warmikunata wiksanta khallarqanku.

¹⁴Chaymi Rabá llaqtaq muyuriq perqanta ninawan hap'iykachisaq, qhapaq wasikunatataq ruphaykunqa, awqa-tinkuy p'unchaypi qaparkachaywan, muyuq wayra p'unchaypi manchay wayrawan.

¹⁵Reyninpas llapa umalli runankunapas wak suyumanmi preso rinqa, ninmi Señor Diosqa.