Read Diospa Simin Qelqa AMÓS 4 Bible Online

AMÓS 4 - Diospa Simin Qelqa bible

AMÓS 4

¹Señor Diosmi nin: Kay simita uyariychis, Samariapi tiyaq warmikuna. Qankunan Basanpi wirayaykuq wakakuna hina kankichis, qankunan mana piniyoqkunata sarunchankichis, qankunan wakchakunatapas muchuchinkichis. Qankunan qosaykichista kamachinkichis: Vinota haywawayku, machasaqku, nispa.

²Apu Señor Diosmi ch'uya-kayninman hina jurarqan: P'unchaykunan chayamushasunkichisña ganchokunawan apanasuykichispaq, llapallaykichista anzuelowan aysanasuykichispaq.

³Hinan qati-qatilla q'asankunata lloqsinkichis, Hermón orqomanmi qarqosqa kankichis. Ñoqa Señor Diosmi chayta nini.

⁴Señor Diosmi nin: Betelta riychis huchallikamunaykichispaq, Gilgalpi Dios contra astawan huchallikamuychis, sapa paqar sacrificioykichiskunata apaychis, sapa kinsa p'unchaymanta diezmoykichistapas qoychis.

⁵Agradecekuypaq qonchuyoq t'antata ruphachiychis, hinantinpi willakamuychis tukuy sonqo ofrenda haywasqaykichista. ¡Chaypunin qankunamanqa gustasunkichis! Ñoqa Señor Diosmi chayta nini.

⁶Llapa llaqtaykichispin ñoqaqa yarqaymanta muchuchirqaykichis, llapa llaqtaykichispin ñoqaqa mikhunaykichista pisiyachirqani, chaywanpas manan kutirikamuwarqankichischu. Ñoqa Señor Diosmi chayta nini.

⁷Cosechapaq kinsa killaraq kashaqtinmi mana parachimurqaykichischu. Huk llaqtamanmi parachimurqani, hukkaq llaqtamantaq mana parachimurqanichu. Huk chakramanmi paramurqan, hukkaq chakramantaq mana paramurqanchu, hinan ch'akipurqan.

⁸Chaymi iskay kinsa llaqtakuna huk llaqtaman unu ukyaq purirqanku, ch'akiyninkutaqa manataq thasnukurqankuchu, chaywanpas manan kutirikamuwarqankichischu. Ñoqa Señor Diosmi chayta nini.

⁹Ruphashaq wayrawanmi polvillowanmi muchuchirqaykichis, huertaykichistapas uvas chakraykichistapas naq'echirqanin, higos sach'aykichistapas olivo sach'aykichistapas langostan mikhuykurqan, chaywanpas manapunin kutirikamuwarqankichischu. Ñoqa Señor Diosmi chayta nini.

¹⁰Egiptoman hinan muchuchiqta chayachimurqaykichis, awqa-tinkuypin waynaykichiskunata wañuchirqani, caballoykichiskunatapas awqawan hap'ichirqani, karpa-karpaykichispi ayakunaq asnaynintapas muskhichirqaykichis, chaywanpas manan kutirikamuwarqankichischu. Ñoqa Señor Diosmi chayta nini.

¹¹Sodomatan Gomorratan thunirqani, chay hinatan qankunatapas thunirqaykichis, chaymi kanaykusqamanta sansashaq k'ullu hina horqosqa karqankichis, chaywanpas manan kutirikamuwarqankichischu. Ñoqa Señor Diosmi chayta nini.

¹²Chayrayku, Israel llaqtalláy, qantaqa muchuchisqayki, chay hinatataq ruwasqayki chayqa, ñoqa Diosniykiwan tupanaykipaq wakichikuy.

¹³Qhawariy, Diosmi orqokunatapas ruwarqan, wayratapas kamarqan, yuyaykusqankunatapas runaman willan, pacha paqarimuqtapas laqhayaqman tukuchin, hallp'a pachaq orqo patankunatan purin. Tukuy-atiyniyoq Señor Diosmi sutinqa.