Read Diospa Simin Qelqa AMÓS 6 Bible Online

AMÓS 6 - Diospa Simin Qelqa bible

AMÓS 6

¹¡Ay, imaynaraqmi kankichis Sionpi chutarayaqkuna! ¡Ay, imaynaraqmi kankichis mana imatapas manchakuspa Samariapi tiyaqkuna! Aswan allin hatun suyupi umalli runakunan kankichis, qankunamanmi Israel aylluqa hap'ipakusunkichis.

²Riychis Calne llaqtata, hinaspa qhawamuychis, chaymanta hatun Hamat llaqtata riychis, hinamantataq Filistea runakunaq Gat llaqtanman uraykuychis. ¿Qankunari aswan allinchu chay llaqtakunamanta kankichis? ¿Hallp'ankupas aswan hatunchu hallp'aykichismanta karqan?

³Qankunaqa hatun llaki p'unchay chayamunantan mana kasurparinkichischu, chay hinapin mana chanin ruwayta suyupi askhayachishankichis.

⁴¡Ay, imaynaraqmi kankichis marfilwan sumaqchasqa puñunakunapi chutarayaqkuna! ¡Ay, imaynaraqmi kankichis munay tiyanakunapi aysarayaqkuna! Oveja t'aqamanta apamusqa borregokunatan mikhunkichis, hinallataq wirayachisqa torillokunatapas.

⁵Arpaq waqasqanpin takikunata paqarichinkichis, David hinan taki tocanakunata kamarinkichis.

⁶Hatun vasokunapin vinota ukyankichis, ancha chaniyoq hawinakunawanmi hawikunkichis, manataq Josepa muchusqanmantaqa llakikunkichischu.

⁷Chaymi kunanqa preso riqkunaq ñawpaqenta wak suyuman rinkichis, aycha kusichiqkunaq q'ochukuynintaq tukukunqa, nispa.

⁸Apu Señor Diosmi pay kikinpa sutinpi juran, Tukuy-atiyniyoq Señor Diosmi nin: Jacobpa anchaykachasqantan millakuni, qhapaq wasinkunatapas cheqnikunin, awqamantaqmi hap'iykachisaq, llaqtatapas chaypi ima hayk'a kaqtapas, nispa.

⁹Kay hinataq kanqa, chunka runachus huk wasipi qhepanqa chayqa, chunkantinmi wañunqa.

¹⁰Sinchipunin manchakuyqa kanqa, huk wawqechus mayqen ayatapas wasinmanta horqonanpaq hoqarishaspa, wasi ukhuman haykuqta ninqa: ¿Pipas qanwan kashanraqchu? nispa chayqa, hukninmi: Manan, nimunqa. Ñawpaqkaqtaq ninqa: ¡Upallay, paqtan Señor Diospa sutinta rimariwaq! nispa.

¹¹Señor Diosmi kamachikun: Hatuchaq wasita thuninanpaq, huch'uykaq wasita ñut'unanpaq.

¹²¿Caballokunaqa qaqa-qaqanta phawanchu? ¿Lamar-qochata torokunawan yapunkuchu? ¡Chaypas qankunaqa chaninchaytan venenoman tukuchirqankichis, kuskachaytapas ajenjoman tukuchirqankichis!

¹³Qankunaqa yanqan kusikunkichis, kallpanchiswanmi atiyniyoq kanchis nispan alabakunkichis.

¹⁴Allintapuni qhawariy, Israel ayllu, Tukuy-atiyniyoq Señor Diosmi nin: Qankuna contran huk hatun suyuta sayarichimusaq, chaymi Hamat q'asamanta Arabá wayq'oman haykuq mayukama sarunchasunkichis, nispa.