Read Diospa Simin Qelqa AMÓS 7 Bible Online

AMÓS 7 - Diospa Simin Qelqa bible

AMÓS 7

¹Kaytan Apu Señor Diosqa rikuchiwarqan: Paytan askhallaña langostata kamashaqta rikurqani qhepa wiñay q'achu wiñarimushaqtin. Chayqa reypaq ichhusqanmantaña wiñamuq q'achun kasqa.

²Suyuntinpi qorata langosta mikhuyta tukushaqtintaq, ñoqa nirqani: — Apu Señor Diosníy, pampachaykuwayku, ¿pitaq Jacob llaqtaykita aysarinqa? Payqa huch'uyllan riki, nispa.

³Hinan rikuchiwasqanmanta huk-hinata yuyaykuspa Señor Diosqa nirqan: — ¡Manan chayqa kanqañachu! nispa.

⁴Kaytan Apu Señor Diosqa rikuchiwarqan: Señor Diostan rikurqanki, llaqtanta juzgananpaq ninata waqyashaqta. Hinan ninaqa manchay lamar-qochata ch'akirparichishasqa, campokunatapas ruphaykushasqa.

⁵Chaymi nirqani: — ¡Apu Señor Diosníy sayapullayña! ¿Pitaq Jacob llaqtaykita aysarinqa? Payqa huch'uyllan riki, nispa.

⁶Hinan rikuchiwasqanmanta huk-hinata yuyaykuspa Apu Señor Diosqa nirqan: — ¡Manan chaypas kanqañachu! nispa.

⁷Kaytapas Señor Diosqa rikuchillawarqantaqmi: Paymi plomadawan perqasqa perqa qayllapi sayashasqa, makinpitaq perqaqpa plomadanta hap'ishasqa.

⁸Hinan Señor Diosqa tapuwarqan: — Amós, ¿imatan rikushanki? nispa. Ñoqataq: — Perqaqpa plomadantan, nirqani. Chaymi payqa niwarqan: — Kay plomadawanmi yachasaq Israel llaqtayqa cheqanchus q'ewichus kashasqanta. Manan payta astawanpas pampachasaqchu.

⁹Isaacpa wak'a dioskunata yupaychanan cheqaskunan thunisqa kanqa, Israelpa yupaychana wasinkunapas purunyachisqan kanqa. ¡Jeroboampa ayllun contran espadantin sayarisaq! nispa.

¹⁰Hinan Betelpi kaq sacerdote Amasiasqa Israel rey Jeroboamman willachimurqan: Amosmi Israel runakuna ukhupi awqayki sayarimun, llaqtaqa manañan rimashasqanta uyarinmanchu.

¹¹Kay hinata rimaspan Amosqa purin: Espadan Jeroboamtaqa wañuchinqa, Israeltaq llaqtanmanta karuman presopuni apasqa kanqa, nispa.

¹²Hinan Amasiasqa Amosta kamachirqan: — ¡Yaw, profeta, ripuy! ¡Judá suyuman ayqey! Chaypin profetizayta atinki mikhunaykita tarinaykipaq.

¹³Amaña Betelpiqa profetizaychu, kayqa reypa ch'uya wasinmi, suyuq hatun yupaychana wasinmi, nispa.

¹⁴Amostaq Amasiasman kutichirqan: — Manan profetachu kani, manataqmi profeta t'aqamantapaschu, aswanpas uywa michiqllan kakuni, k'ita higostataqmi pallakunipas.

¹⁵Ichaqa Señor Diosmi uywa michinamanta pusamuwaspa niwarqan: Riy, Israel llaqtayman simiyta willamuy, nispa.

¹⁶Chayrayku, Señor Diospa siminta uyariy: Qanqa nishankin: Ama Israel contraqa profetizaychu, amallataq Isaacpa ayllun contrapas rimaychu, nispa.

¹⁷Chayraykun Señor Diosqa nin: Warmiykin llaqta ukhupi rabonaman tukupunqa, wawaykikunan espadawan wañuchisqa kanqa, hallp'aykipas sorteopin rakikunqa, qantaqmi wak runakunaq suyunpi wañunki, Israeltaqmi llaqtanmanta karuman preso apasqa kanqa, nispa.