Read Diospa Simin Qelqa ABDÍAS 1 Bible Online

ABDÍAS 1 - Diospa Simin Qelqa bible

ABDÍAS 1

¹Apu Señor Diosmi huk rikhuriypi Abdiasman rikuchispa Edom suyumanta payman rimaykurqan. Señor Diospa willakuynintan uyarirqayku. Huk willakuqtan hatun suyukunaman kacharqan: ¡Sayariychis, Edom llaqta contran awqa-tinkuq risunchis! nispa, nimunanpaq. Apu Señor Diosmi Edomta nin:

²Hatun suyukuna ukhupin huch'uyllata churayki, ancha pisichasqan kanki.

³Hatunchakuq sonqoykin q'oturqasunki. Qanqa qaqa k'aktukunapin tiyashanki, hanaqpipunin tiyashanki, sonqoykipin ninki: ¿Pitaq pampaman urmaykachiwanman? nispayki.

⁴Anka hinaña wichayman seqawaq chaypas, ch'askakuna ukhupiña q'esachakuwaq chaypas, chaymantapas urmaykachimusqaykipunin. Ñoqa Señor Diosmi chayta nini.

⁵Suwakunaña hamusunkiman chaypas, tuta suwakunaña hamusunkiman chaypas, manan llapantachu apankuman. Uvas pallaqkunaña hamusunkiman chaypas, qhellapallatapas saqenkumanmi, ichaqa llapanpunin q'alanasqa kapushanki.

⁶¡Yaw, Esaú, sinchitapunin kaqniykikunata llat'anarqasunkiku! ¡Llapallantan illaykikunata suwarqasunkiku!

⁷Llapa qanwan huñukuqkunan q'oturqasunkiku, qorpaykikunan qarqorqasunkiku. Sumaq kawsaq-masiykikunapas awqaykin sayaripurqanku, mikhuq-masiykikunapas toqllatan churarqasunkiku, ichaqa manan qanqa imatapas reparankichu.

⁸Edom suyuta muchuchisqay p'unchaymi hamawt'ankunata chinkachisaq, Esaupa orqonkunapi yachayniyoqkunatapas chinkachisaq. Ñoqa Señor Diosmi chayta nini.

⁹Temán llaqta kallpasapakunan manchasqa khatatatanqaku, Esaupa orqonkunapi tiyaq llapa runan wañunqaku.

¹⁰Jacob wawqeykita maqasqaykimanta, wañuchisqaykimantawanmi sinchi p'enqasqa kanki, wiñaypaqmi ch'inyachisqa kanki.

¹¹Karu llaqtayoqkuna kaqninkunata llat'anashaqtinkun, wak llaqtayoqkuna punkunkunata haykushaqtinkun, Jerusalenpaq sorteashaqtinkun, qanqa hukninku hinallataq karqanki, wakneqpitaq sayaykurqanki.

¹²Manan qanqa llakipi kashaqtin wawqeykita kusipayanaykichu karqan, manan chay muchushasqanku p'unchaypi Judá runakunamanta kusikunaykichu karqan, llaki-phutisqan p'unchaypiqa manan hatunchakunaykichu karqan.

¹³Manan chay waqasqan p'unchaypi llaqtay punkunta haykunaykichu karqan, manan chay muchusqan p'unchaypi mana allin kasqanta pisichanaykichu karqan, manan chay ñak'arisqan p'unchaypipas kaqninkunata suwakunaykichu karqan.

¹⁴Manan ñan palqakunapipas sayanaykichu karqan ayqekushaqkunata wañuchinaykipaq, manan hap'iykachinaykichu karqan llaki-phutiy p'unchaypi puchuqkunatapas.

¹⁵Llapa suyukunata muchuchinay p'unchaymi sispaykamushanña, chaypachan qanpa ruwasqaykita hina ruwasunkiku, qanllamantaqmi imachus chaskinaykiqa chayasunki.

¹⁶Imaynan llaqtayqa ch'uya orqoypi haya muchuyta ukyarqan, chay hinatan llapa suyukunapas hayata ukyashallanqakupuni. Ukyanqakun, machaykunqakun, t'iyusqan wañupunqaku.

¹⁷Ichaqa Sión orqopin wakillan qespikunqaku, Sionmi ch'uya kapunqa, Jacobpa mirayninkunan hallp'ankuta wakmanta hap'ikapunqaku.

¹⁸Esaupa mirayninkunaqa k'ukmu hinan kanqa, Jacobpa mirayninkunataq nina hina kanqa, Josepa mirayninkunapas nina rawray hinan kanqa, chay ninan hap'irispa ruphaykunqa, manan pipas Esaupa ayllunpiqa qhepanqachu.

¹⁹Neguev ch'inneqpi kaqkunan Esaupa orqonkunata hap'inqaku, Shefela moqo-moqopi kaqkunataq Filistea suyuta hap'inqaku. Hap'illanqakutaqmi Efraín hallp'atapas Samaria hallp'atapas, Benjamín ayllutaq Galaadta hap'inqa.

²⁰Kamachipaq apasqa askha Israel runakunan Canaán suyu runakunaq hallp'anta Sarepta llaqtakama hap'inqaku. Sefarad llaqtapi kashaq Jerusalenmanta kamachipaq apasqakunataq Neguev ch'inneqpi kaq llaqtakunata hap'inqaku.

²¹Sión orqopi qespichisqa runakunan Esaupa orqo-orqonkunata kamachinankupaq wicharinqaku, ahinapin Señor Diosqa munaychakapunqa.