Read Diospa Simin Qelqa JONÁS 1 Bible Online

JONÁS 1 - Diospa Simin Qelqa bible

JONÁS 1

¹Amitaipa churin Jonasmanmi Señor Diosqa rimaykurqan:

²Phaway riy hatun Nínive llaqtata, hinaspa chay llaqta contra kunkayoqta willamuy, sinchi mana chanin ruwasqankunan ñoqaman chayamun, nispa.

³Jonastaq ichaqa Señor Diospa qayllanmanta Tarsisman ayqekunanpaq puririrqan, Jope llaqtaman uraykuspantaq Tarsisman riq barcota tarirqan. Pasajenta pagaspataq chayman riqkunawan barcoman haykurqan, Señor Diospa qayllanmanta karunchakunanpaq.

⁴Señor Diosmi ichaqa lamar-qochapi sinchita wayrachimurqan, sinchitapunin phoqchiqerqan, chaymi barcopas yaqaña p'akikapusharqan.

⁵Barco purichiqkunataq maytapuni mancharikurqanku, hinan diosninkuta sapanka waqyakurqanku. Chaymi barco qasichinapaq tukuy imaymanata lamar-qochaman wikch'uykurqanku. Chaykamataq Jonasqa barco ukhuman haykuspa chaypi misk'ita puñusharqan.

⁶Hinan barcopi kamachikuqqa Jonasman qayllaykuspa nirqan: — ¿Imaynataq puñukushankiri? ¡Hatariy, diosniykimanta waqyakuy! Ichapaschá pay khuyapayawasunman, manataq wañusunmanchu, nispa.

⁷Chaykamataq barco purichiqkunaqa ninakurqanku: — Sorteasun, piqpa huchanmantachus kay mana allinpi rikukusqanchista yachananchispaq, nispa. Sorteasqankutaq Jonasman chayarqan.

⁸Hinan paykunaqa Jonasta tapurqanku: — Chay hinaqa, willawayku imanaqtinchus kay mana allinpi rikukusqanchista. ¿Imamantaq hamushanki? ¿Maymantataq hamushanki? ¿May suyumantan kanki? ¿May llaqtayoqtaq kanki? nispa.

⁹Jonastaq kutichirqan: — Hebreo runan kani, Señor Diostan yupaychani, paymi lamar-qochata hallp'a pachata kamaqqa. Paymi Hanaq Pacha Diosqa, nispa.

¹⁰Jonasqa willallarqantaqmi Señor Diospa qayllanmanta ayqekushasqanta, paykunataq chayta yachaspa sinchita mancharikurqanku. Hinaspan tapuykurqanku: — ¿Imaraykutaq chayta ruwarqanki? nispa.

¹¹Lamar-qocha aswan-aswanta phiñakuqtintaq, paytaqa tapuykullarqankutaq: — ¿Imanasqaykikutaq lamar-qochaq phiñakuynin thaninanpaq? nispa.

¹²Jonastaq kutichirqan: — Hap'ispa lamar-qochaman wikch'uykuwaychis, chaymi lamar-qochaqa thanipusunkichis. Ñoqaqa yachanin huchay hawa kay sinchi wayra wayramusqanta, nispa.

¹³Chaypas chay runakunaqa barcota hallp'a pataman chayachiyta munaspan tukuy kallpawan lloqenawan qachirqanku, ichaqa manan atirqankuchu, lamar-qocha paykunapaq aswan-aswanta phiñakuqtin.

¹⁴Chaymi Señor Diosmanta waqyakuspa nirqanku: — ¡Señor Dios, ama kay runa hawa wañuchiwaykuchu, manataqchus huchallikun chayqa wañusqanmanta ama huchachawaykuchu, Señor Dios, qanqa maychus munayniykiman hina ruwaqmi kanki! nispa.

¹⁵Hinaspan Jonasta hap'ispa lamar-qochaman wikch'uykurqanku, chaymi lamar-qochaqa manaña phiñakapurqanchu.

¹⁶Hinan chay runakunaqa Señor Diosta anchatapuni manchakurqanku, hinaspan Señor Diosman sacrificiota haywarqanku, prometekurqanku ima.

¹⁷Señor Diostaq hatunkaray challwata wakichirqan Jonasta millp'uykunanpaq, hinan Jonasqa kinsa p'unchay, kinsa tuta challwaq wiksanpi kasharqan.