Read Diospa Simin Qelqa JONÁS 3 Bible Online

JONÁS 3 - Diospa Simin Qelqa bible

JONÁS 3

¹Señor Diosmi Jonasman huktawan rimaykurqan:

²Phaway, hatun Nínive llaqtata riy, chaypitaq ñoqaq nisqayta willamuy, nispa.

³Chaymi Jonasqa Señor Diosta kasukuspa puririrqan, hinaspan Niniveta rirqan. Niniveqa sinchi hatun llaqtan karqan, llaqtantinqa kinsa p'unchay puriymi karqan.

⁴Jonasmi llaqta haykuyta qallarispa, p'unchay ch'isiyaqta purirqan: ¡Kay tawa chunka p'unchaymantan Nínive llaqta thunisqa kanqa! nispa, kunkayoqta waqyakuspa.

⁵Nínive runakunataq Diospa siminta chaskispa ayunanankupaq yuyaykurqanku, hinan hatunpas huch'uypas llakikuymanta qhasqa p'achawan p'achakurqanku.

⁶Nínive reytaq chay willakuyta yachaspa kamachikuy tiyananmanta sayarispa, p'achanta ch'utikuspa qhasqa p'achawan churakurqan, uspha patapitaq tiyaykurqan.

⁷Hinaspan reyqa kayta willachirqan. Reymi kamachikuqninkunapiwan kamachikun: Ama pipas imatapas mikhuchunchu ukyachunpaschu, animalkunatapas, ovejakunatapas, wakakunatapas ama michichunkuchu, amallataq unutapas ukyachichunkuchu.

⁸Aswanpas llakikuymanta qhasqa p'achawan llapalla p'achakuchunku, hinaspa Diosmanta anchatapuni waqyakuchunku, sapankataq millay kawsayninta mana chanin ruwasqankunatapas saqepuchun.

⁹Ichapaschá Diosqa huk-hinata yuyaykapunman, hinaspa k'arak phiñakusqanpas tiyaykunman, chhaynapi mana wañunanchispaq, nispa.

¹⁰Diostaq rikurqan chay ruwasqankuta, millay kawsasqanku saqepusqankutapas, hinan huk-hinata yuyaykapurqan, manañataq paykunata muchuchirqanñachu.