Read Diospa Simin Qelqa JONÁS 4 Bible Online

JONÁS 4 - Diospa Simin Qelqa bible

JONÁS 4

¹Nínive runakunata Dios mana muchuchisqanmi mana Jonaspa sonqonpaq hinachu karqan, chaymi phiñakurqan.

²Señor Diosmanta mañakuspataq nirqan: — Señor Diosníy, kay hinapuni kanantan llaqtaypi kashasparaq yacharqani. Chaymi Tarsisman ayqekapuyta munarqani, ñoqaqa yacharqanin sumaq sonqo, khuyapayakuq, mana usqhay phiñakuq Dios kasqaykita. Tukuy tiempo munakuqmi kanki, muchuchinayki kashaqtinpas huk-hinata yuyaykuqmi kanki.

³Kunanqa, Señor Diosníy, wañuchipuwanaykitan mañakuyki, aswan allinmi wañukapunay kawsashanaymantaqa, nispa.

⁴Señor Diostaq payta nirqan: — ¿Allinchu qanpaq kay phiñakusqayki? nispa.

⁵Hinan Jonasqa llaqtamanta lloqsispa llaqtaq inti lloqsimuy ladonpi tiyarqan, chaypi ch'ukllakuspataq chay ukhupi llanthukurqan llaqtapi imachus kananta rikunanpaq.

⁶Señor Diostaq calabazata wiñachirqan, chay calabazan wiñarqan Jonaspa umanta llanthuykunanpaq, allinpi kananpaq. Hinaqtinmi Jonasqa chay calabazata qhawarispa anchatapuni kusikurqan.

⁷Paqarisnin p'unchay illarimuqtintaq Diosqa huk kuruta kachamurqan, hinan chay kuru calabazata k'uturqan, chaymi ch'akipurqan.

⁸Inti lloqsimuqtintaq Diosqa inti lloqsimuy ladomanta rupha wayrata wayrachimurqan, Jonaspa umanta inti kankaqtintaq yuyaynin chinkarqan, hinan wañuyta mañakurqan: — Aswan allinmi wañukapunay kawsashanaymantaqa, nispa.

⁹Diostaq ichaqa Jonasta nirqan: — ¿Allinchu calabazaq ch'akisqanmanta sinchita phiñakusqayki? nispa. Paytaq kutichirqan: — ¡Arí, sinchi phiñasqapunin wañusaqpas! nispa.

¹⁰Hinaqtinmi Señor Diosqa payta nirqan: — Calabazataqa manan qanchu plantarqanki, wiñachirqanki, huk tutallapin wiñamurqan hukkaq tutapitaq ch'akipurqan, qantaq chay calabazamanta llakikushanki.

¹¹Chayri, ¿manachu ñoqaqa chay hatun Nínive llaqtata khuyapayayman? Chaypin pachak iskay chunka waranqa kurak runakuna kashan, paykunaqa manan reparankuchu allinkaqta mana allinkaqmanta, kallantaqmi askha animalkunapas, nispa.