Read Diospa Simin Qelqa NÚMEROS 1 Bible Online

NÚMEROS 1 - Diospa Simin Qelqa bible

NÚMEROS 1

¹Israel runakunaq Egipto suyumanta lloqsimusqan iskaykaq wataña kashaqtinmi, iskaykaq killaq qallariynin p'unchaypi Sinaí ch'inneqpi Dioswan Tupana Karpapi Señor Diosqa Moisesta nirqan:

²— Israel llapan runakunata yupay, ayllunkuman hina familiankuman hina sutinmantakama llapan qharikunata.

³Qanpiwan Aaronpiwanmi yupaspa qelqankichis iskay chunka watayoqmanta wichayman, awqa-tinkuy atiq qharikunata.

⁴Sapanka ayllumantan huk umalli yanapasunkichis,

⁵chay umallikunan kaykuna: Rubén ayllumanta: Sedeurpa churin Elisur,

⁶Simeón ayllumanta: Zurisadaipa churin Selumiel,

⁷Judá ayllumanta: Aminadabpa churin Naasón,

⁸Isacar ayllumanta: Zuarpa churin Natanael,

⁹Zabulón ayllumanta: Helonpa churin Eliab,

¹⁰Josepa miraynin Efraín ayllumanta: Amiudpa churin Elisama, Josepa miraynin Manasés ayllumanta: Peduarpa churin Gamaliel,

¹¹Benjamín ayllumanta: Gedeoniq churin Abidán,

¹²Dan ayllumanta: Amisadaipa churin Ahiezer,

¹³Aser ayllumanta: Ocranpa churin Pagiel,

¹⁴Gad ayllumanta: Reuelpa churin Eliasaf,

¹⁵Neftalí ayllumanta: Enanpa churin Ahira, nispa.

¹⁶Chaykunan Israel runakunamanta akllasqa karqan, sapankataq ayllunkupi umalli karqanku.

¹⁷Moisesmi Aaronpiwan sutinmanta akllasqa runakunapiwan huñurqanku,

¹⁸llapan Israel runakunata iskaykaq killaq qallariynin p'unchaypi ayllunkuman hina familiankuman hina, pikunachus ñawpa taytanku kasqanta willakusqankuman hina. Chaymi iskay chunka watayoqmanta wichayman sapanka qharikunata sutinmantakama qelqarqanku,

¹⁹Señor Diospa Moisesta kamachisqanman hina. Chay hinatan Moisesqa Sinaí ch'inneqpi runakunata yuparqan.

²⁰Iskay chunka watayoqmanta wichayman awqa-tinkuy atiq qharikunatan sutinkumantakama yuparqanku ayllunkuman hina familiankuman hina: Jacobpa phiwi churin Rubén ayllumantan yuparqanku tawa chunka soqtayoq waranqa phisqa pachak qharikunata.

²²Simeón ayllumantan yuparqanku phisqa chunka isqonniyoq waranqa kinsa pachak qharikunata.

²⁴Gad ayllumantan yuparqanku tawa chunka phisqayoq waranqa soqta pachak phisqa chunka qharikunata.

²⁶Judá ayllumantan yuparqanku qanchis chunka tawayoq waranqa soqta pachak qharikunata.

²⁸Isacar ayllumantan yuparqanku phisqa chunka tawayoq waranqa tawa pachak qharikunata.

³⁰Zabulón ayllumantan yuparqanku phisqa chunka qanchisniyoq waranqa tawa pachak qharikunata.

³²Josepa miraynin Efraín ayllumantan yuparqanku tawa chunka waranqa phisqa pachak qharikunata. Josepa miraynin Manasés ayllumantan yuparqanku kinsa chunka iskayniyoq waranqa iskay pachak qharikunata.

³⁶Benjamín ayllumantan yuparqanku kinsa chunka phisqayoq waranqa tawa pachak qharikunata.

³⁸Dan ayllumantan yuparqanku soqta chunka iskayniyoq waranqa qanchis pachak qharikunata.

⁴⁰Aser ayllumantan yuparqanku tawa chunka hukniyoq waranqa phisqa pachak qharikunata.

⁴²Neftalí ayllumantan yuparqanku phisqa chunka kinsayoq waranqa tawa pachak qharikunata.

⁴⁴Chaykunatan yuparqanku Moisespiwan Aaronpiwan chunka iskayniyoq umallikunapiwan. Chay umallikunan ayllunkuq rantinpi akllasqa karqanku.

⁴⁵Llapan Israel qharikunataq iskay chunka watayoqmanta wichayman awqa-tinkuy atiqkuna

⁴⁶soqta pachak kinsayoq waranqa phisqa pachak phisqa chunka karqanku.

⁴⁷Leví ayllu familiakunaqa manan wakin ayllukunawan yupasqachu karqan,

⁴⁸Señor Diosmi Moisesta nisqa:

⁴⁹Israel ayllukunata yupaspaykiqa, aman Leví ayllutaqa yupankichu.

⁵⁰Aswanpas kamachikuy simiykuna waqaychana karpapi llank'anankupaqmi churanki, tukuy servicionkunata lliw kaqninkunatawan waqaychanankupaq. Paykunan astanqaku chay karpata tukuy serviciokunatapas. Karpaq muyuriqninpitaq karpakuspa tiyanqaku.

⁵¹Chay karpata astana kaqtinqa, paykunan karpataqa paskanqakupas sayarichinqakupas. Pipas mana Leví runa kashaspa chay karpaman asuykuqqa wañuchisqan kanqa.

⁵²Israel wakin ayllukunataq t'aqa-t'aqa karpakuspa tiyanqaku, sapanka t'aqa banderantinkama.

⁵³Leví runakunataq Ñoqawan Tupana Karpaq muyuriqninpi tiyanqaku, chay karpata cuidaspanku, Israel runakuna contra mana phiñakunaypaq, nispa.

⁵⁴Hinan Israel runakunaqa Moisesta Señor Diospa kamachisqanman hina lliwta ruwarqanku.