Read Diospa Simin Qelqa NÚMEROS 11 Bible Online

NÚMEROS 11 - Diospa Simin Qelqa bible

NÚMEROS 11

¹Huk p'unchaymi Israel runakunaqa Señor Dios contra chhuchupakurqanku sasachakuykunapi kashasqankurayku. Señor Diostaq chayta uyarispa k'arakta phiñakurqan, hinaspan nina rawrayta kachamurqan, chaymi karpa-karpaq muyuriq huk cheqasninta rupharqan.

²Hinaqtinmi runakunaqa qaparispa Moisesta valekurqanku, Moisestaq paykunapaq Señor Diosmanta mañapurqan. Hinan ninaqa wañupurqan.

³Chaymi chay cheqasta Tabera[2] nispa suticharqanku, chaypi Señor Diospa ninan paykuna contra rawrarisqanrayku.

⁴Israel runakunaqa tukuy t'aqa runakunawanmi huñu tiyarqanku, chay runakunan huk rikch'aq mikhunata munapakuqku. Chaymi Israel runakunapas paykunata qatichikuspa waqarqanku, hinaspa nirqanku: — ¡Ay, aychallapas kanchu mikhunanchispaq!

⁵Egipto suyupiqa yanqallan challwata mikhurqanchis. Mikhullarqanchistaqmi pepinota, sandiata, porota, cebollata, ajostapas.

⁶Kunantaq kaypi yarqaymanta wañupushanchisña, maná nisqa mikhunallan kakushan, manan imapas kanchu, nispanku.

⁷Chay maná nisqa mikhunaqa q'elluman samaq resina hinan karqan, culantro muhumantaq rikch'akurqan.

⁸Runakunaqa chay manata hoqariqmi lloqsirqanku hinaspa rumi molinopi kutarqanku, maranpi ima saqtarqanku, chaymantataq mikhuyta wayk'urqanku, mana chaytaq tortatapas ruwakurqanku. Saborninmi karqan aceitewan chapusqa t'anta hina.

⁹Tuta karpa-karpa pataman sulla chayaqtinmi maná nisqa mikhunapas chayamullarqantaq.

¹⁰Israel llapa familiakunan karpanku punkupi waqasharqanku, chaytan Moisesqa uyarirqan, hinan mana allinchu payman rikch'akurqan. Hinallataq Señor Diospas waqashasqanku hawa k'arakta phiñakurqan.

¹¹Moisestaq Señor Diosta nirqan: — ¿Imanaqtintaq kay kamachiykita mana allinta ruwawanki? ¿Imamantataq ñoqa contra phiñakunki, kay runakunaq sasachakuyninta ñoqaman wikch'uykuwaspayki?

¹²Manan ñoqachu paykunaq, tayta-mamanqa kani, chaychu niwankimanpas: Ñuñuq wawata hina marq'ayniykipi apay ñawpa taytankuman prometesqay suyuman, nispa.

¹³¿Maymantataq horqomusaq aychata kay llapan runakunaman mikhuchinaypaq? Waqakuspan hamushallawanku: ¡Aychata qowayku mikhunaykupaq! nispa.

¹⁴Sapallayqa manan atiymanchu kay llapan runakuna pusayta, sinchi sasan ñoqapaqqa kay llaqta pusayqa.

¹⁵Chay hinallatapuni ruwawanayki kaqtinqa, khuyapayawaspayki kawsayniyta qechupuway, aswan allinmi kanqa, manaña sinchi sasachakuypi rikukuyniyqa, nispa.

¹⁶Hinan Señor Diosqa kutichirqan: — Qanchis chunka kurak runakunata huñumuway, ayllukunapi reqsisqayki kamachikuqkunata, hinaspa Ñoqawan Tupana Karpaman pusay, chaypitaq qanpiwan suyawankichis.

¹⁷Ñoqan uraykamuspa qanwan rimasaq, hinaspa qanman atiyniy qosqayta wakinta paykunaman qosaq, kay llaqta pusayta yanapanasuykipaq, ahinapin mana sapallaykiñachu kanki.

¹⁸Chhaynaqa, runakunata kamachiy: Paqarinpaq ch'uyanchakuychis, paqarinmi aychata mikhunkichis, Señor Diosmi uyarirqan waqaspa nisqaykichista: ¡Ay, aychallapas kanchu mikhunaykupaq! ¡Egipto suyupiqa aswan allinmi karqanchis! nispa. Chaymi Señor Diosqa aychata qosunkichis,

¹⁹hinan mikhunkichis manan huk p'unchayllachu, iskay p'unchayllachu, phisqa p'unchayllachu, manataq chunka p'unchayllapaschu, iskay chunka p'unchayllapaschu,

²⁰aswanpas huk killa hunt'an mikhunkichis amikunaykichiskama, millakunaykichiskama qankunawan Señor Dios kashaqtin pisichasqaykichisrayku, hinaspa: ¡Imapaqmi Egipto suyumanta hamurqanchis! nispa ñawpaqenpi waqasqaykichisraykupiwan, nispa.

²¹Hinan Moisesqa kutichirqan: — Ñoqawan hamuq runakunaqa soqta pachak waranqa qharikunan kanku chakillapi puriqkuna, ninkitaq: Huk killa hunt'an aychata mikhunkichis, nispa.

²²¿Maypitaq kashan askha ovejapas askha wakapas, chayta nak'aspa llapan runaman aypachinaypaq? Lamar-qochapi kaq llapan challwakunataña qosunman chaypas manan aypanmanchu, nispa.

²³Señor Diostaq ichaqa kutichirqan: — ¿Atiyniyqa pisillachu? Kunanmi rikunki simiy hunt'akunqachus manachus chayta, nispa.

²⁴Chaymi Moisesqa lloqsispa Señor Diospa nisqan simikunata runakunaman willarqan, hinaspa qanchis chunka Israel kurak runakunata huñurqan, kamachirqantaq karpa muyuriqpi kashanankupaq.

²⁵Hinan Señor Diosqa phuyupi uraykamuspa Moiseswan parlarqan. Chaymantataq Moisesman qosqan wakin atiyninta qanchis chunka kurak runakunaman qorqan. Paykunataq atiyta chaskirqospapacha profetizayta qallarirqanku, ichaqa manan chay hina ruway wakmanta karqanñachu.

²⁶Qanchis chunka akllasqa kurak runakunamanta iskay qharikuna Dioswan Tupana Karpata mana risqakuchu, aswanpas karpa-karpapi qhepakusqaku, paykunaq sutinmi karqan hukpa Eldad hukkaqpataq Medad. Chaywanpas paykunaqa Diospa atiyninta chaskillarqankutaqmi, chaymi karpa-karpapi profetizayta qallarirqanku.

²⁷Huk waynataq Moisesman willaq phawarirqan: ¡Eldadpiwan Medadpiwanmi karpa-karpapi profetizashanku! nispa.

²⁸Hinan wayna-kayninmantapacha Moisespa kamachin Nunpa churin Josueqa nirqan: — ¡Wiraqocháy Moisés, hark'ay chay runakuna ama rimanankupaq! nispa.

²⁹Moisestaq kutichirqan: — ¿Ñoqamantachu sienteshanki? ¡Allinchá kanman llapan runakunamanpas Señor Diosqa atiyninta qonman, hinaspa llapanku profeta kankuman! nispa.

³⁰Chaymantataq Moisesqa Israel kurak runakunapiwan karpankuman kutipurqanku.

³¹Señor Diosmi lamar-qocha cheqasmanta wayrachimurqan, chay wayran yuthukunata apamurqan huk metro altollanta phalashaqta. Hinan yuthukunaqa karpa-karpaq muyuriqninman hunt'aykurqan huk p'unchay puriykama pampaman.

³²Chaymi Israel runakunaqa chay p'unchay tuta illariq, qhepantin p'unchay ch'isiyaq yuthukunata hap'irqanku. Pisi hap'iqmi chunka carga yuthuta hap'irqan, chaykunatan ch'arkikurqanku karpa-karpaq muyuriqninpi.

³³Ichaqa Israel runakuna chayllaraq yuthu aychata khamuykushaqtinmi Señor Diosqa paykuna contra k'arakta phiñakurqan, hinaspan muchuchispa askha runakunata wañuchirqan.

³⁴Chaymi chay cheqasta suticharqanku Kibrot-hataava[3] nispa, huk rikch'aq mikhunata munapakuq runakunata chaypi p'ampasqankurayku.

³⁵Kibrot-hataavamantan Israel runakunaqa Hazerotkama purirqanku, hinaspa chaypi qhepakurqanku.