Read Diospa Simin Qelqa NÚMEROS 13 Bible Online

NÚMEROS 13 - Diospa Simin Qelqa bible

NÚMEROS 13

¹Señor Diosmi Moisesta nirqan:

²— Sapanka ayllumanta huk kamachikuqta akllay, hinaspa paykunata kachay Canaán suyuta qhamiyamunankupaq, chay suyutan Israel runakunaman qosaq, nispa.

³Hinan Moisesqa Señor Diospa kamachisqanman hina Parán ch'inneqmanta qhamiyaqkunata kacharqan. Llapan chay qharikunaqa Israel ayllukunapi kamachikuqkunan karqanku.

⁴Sutinkutaq kaykuna karqan:

⁵Rubén ayllumanta Zacurpa churin Samúa,

⁶Judá ayllumanta Jefoneq churin Caleb,

⁷Isacar ayllumanta Josepa churin Igal,

⁸Efraín ayllumanta Nunpa churin Oseas,

⁹Benjamín ayllumanta Rafuq churin Palti,

¹⁰Zabulón ayllumanta Zodiq churin Gadiel,

¹¹Josepa miraynin Manasés ayllumanta Susiq churin Gadi,

¹²Dan ayllumanta Gemaliq churin Amiel,

¹³Aser ayllumanta Micaelpa churin Setur,

¹⁴Neftalí ayllumanta Vapsiq churin Nahbi,

¹⁵Gad ayllumanta Maquiq churin Geuel.

¹⁶Chaykunan karqan Canaán suyuta Moisespa qhamiyaqta kachasqan qharikuna. Nunpa churin Oseastaqa Moisesmi Josué sutiwan churarqan.

¹⁷Moisesmi paykunata Canaán suyu qhamiyaqta kachashaspa nirqan: — Neguev ch'inneqninta riychis, hinaspa orqo-orqonta puriychis.

¹⁸Imaynachus suyu kasqantaqa allintan qhawamunkichis, hinallataq chaypi tiyaq runakunapas atiyniyoqchus icha pisi kallpachus, askhachus icha pisillachus kanku chaykunatawan qhawamunkichis.

¹⁹Llaqtankunatapas allintan qhawamunkichis, karpa-karpapichus tiyanku icha muyuriq perqayoq llaqtapichus tiyanku chaykunata. Tiyasqanku hallp'apas allinchus icha manachus,

²⁰tarpuna hallp'achus icha manachus, sach'akunapas kanchus icha manachus chaykunatawan qhawamunkichis. Kallpachakuychis, ama qonqaychischu chay suyupi wakin rurukunata apamuyta, nispa. Risqanku tiempoqa ñawpaqkaq uvas cosecha hoqariy tiempon karqan.

²¹Hinan paykunaqa rispanku Canaán suyuta qhamiyarqanku, uray ladopi Zin ch'inneqmanta wichay ladopi Hamat Q'asawan kuska kashaq Rehob llaqtakama.

²²Neguevninta rispankun Hebronkama chayarqanku. Chaypin tiyasqaku Anacpa miraynin Ahimán, Sesai, Talmaipiwan. (Hebrón llaqtaqa Egipto suyupi Zoán llaqtamanta qanchis wata ñawpaqtaraqmi sayarichisqa kasqa).

²³Escol wayq'oman chayaspankun, huk k'allmata wit'urqanku uvas ruru ch'ampantinta, k'aspiman warkuykuspataq iskaymanta wantupi apamurqanku. Apamullarqankutaq granadakunatapas higostapas.

²⁴Chay wayq'otan suticharqanku Escol[4] nispa, Israel runakuna chaypi uvas ch'ampa k'allmata wit'usqankurayku.

²⁵Chaymantataq suyuta tawa chunka p'unchay qhamiyaspaña kutimpurqanku

²⁶Parán ch'inneqpi Cadesman, chaypin kasharqanku Moisespas Aaronpas llapan Israel runakunapas. Hinan qhamiyaq kachasqakunaqa tukuy rikusqankuta paykunaman willarqanku, chay suyumanta apasqanku rurutapas rikuchirqanku.

²⁷Hinaspan Moisesta nirqanku: — Kachawasqaykiku suyutaqa rirqaykun, cheqaqtapunin lecheq miel misk'iq askha kanan hallp'a kasqa, kaymi chay hallp'aq rurun.

²⁸Chaypi tiyaq runakunan ichaqa atiyniyoq kasqaku, llaqtankupas sinchi hatuntaq allin perqasqataq kasqa. Hinallataq rikumurqayku Anacpa miraynin hatuchachaq runakunata.

²⁹Neguev hap'iypin Amalec runakuna tiyasqaku, orqo-orqopitaq Het runakuna, Jebus runakuna, Amor runakunapiwan tiyasqaku, lamar-qocha patapitaq Jordán mayu qayllapiwan Canaán runakuna tiyasqaku, nispanku.

³⁰Hinan Calebqa Moisespa ñawpaqenpi kashaq runakunata ch'inyachispa nirqan: — ¡Haku puririsun, hap'isunmi chay suyuta, ñoqanchisqa paykunata atipasunpunin! nispa.

³¹Riqmasin qharikunataq ichaqa kutichirqanku: — ¡Manan chay runakunataqa phawaykuyta atisunmanchu! ¡Paykunaqa aswan atiyniyoqmi ñoqanchismantaqa! nispa.

³²Hinallataq Israel runakunaman qhamiyaq risqanku suyumanta mana allinta willaspa nirqanku: — Qhamiyaq risqayku hallp'aqa yarqaymanta wañuna hallp'an kasqa, chaypi tiyaq llapan qharikunapas sinchi hatunmi kasqaku.

³³Rikumullarqaykutaqmi Anacpa miraynin hatuchachaq runakunatapas. Paykunaq qayllanpi kaspaykuqa t'isku-t'isku hina huch'uylla kasqaykutan reparakurqayku, paykunapas ahinatan qhawariwarqanku, nispanku.