Read Diospa Simin Qelqa NÚMEROS 16 Bible Online

NÚMEROS 16 - Diospa Simin Qelqa bible

NÚMEROS 16

¹Leví ayllumanta Cohatpa miraynin Izharpa churin Coré, Rubén ayllumanta Eliabpa churinkuna Datanwan Abiramwan, Peletpa churin Onpiwanmi hatunchakuspanku

²Moisés contra sayarirqanku. Paykunawantaq huñukurqan iskay pachak phisqa chunka Israel runakuna, chaykunan karqan llaqta kamachiq qharikuna, llaqtaq huñukuyninpi umalli qharikuna.

³Paykunan llapanku, Moisés contra Aarón contrapiwan huñunakurqanku, hinaspan paykunata nirqanku: — ¡Chaykamalla kachun munaychakuyniykichisqa! Llapa llaqtan Señor Diospaq t'aqasqa, payqa llapanchiswantaqmi kashan. ¿Imanaqtinmi qankunaqa Señor Diospa llaqtanta hatun atiyniyoq hina kamachinkichis? nispanku.

⁴Chayta uyarispan Moisesqa uyanpamanta pampaman wikch'ukurqan,

⁵chaymantataq Coreta llapan paywan kashaqkunatawan nirqan: — Paqarin tutamantan Señor Diosqa sut'inchanqa pichus paypa akllakusqanpas paypaq t'aqasqa kaqpas kasqanta. Chay akllakusqallantan Señor Diosqa ofrendata haywaqpaq qayllaykuchinqa.

⁶Qan, Coré, qanwan huñukuq runakunapiwan, incienso q'apachinakunata paqarin tutamanta apamuychis,

⁷hinaspa sansata churaykuspa inciensota chayman hich'aykunkichis, hinaspataq Señor Diospa ñawpaqenman apamunkichis. Mayqen qharitachus Señor Dios akllakunqa, chay qharin Señor Diospaq t'aqasqa kanqa. ¡Leví runakuna amaña hatunchakuychischu! nispa.

⁸Moisesqa Coreta ayllu-masinkunatawan nillarqantaq: — ¡Yaw, Leví runakuna, uyariwaychis!

⁹¿Imanaqtintaq pisipaq hap'inkichis Israelpa Diosnin llaqtan ukhumanta akllakuspa payman qayllaykuchisqasuykichista? Paymi akllarqasunkichis paywan Tupana Karpapi llank'anaykichispaq, kay llaqtata servinaykichispaqpas.

¹⁰Señor Diosmi munarqan qanpas Leví ayllu llapan runakunapas paypa qayllanpi kanaykichista, chaywanpas, ¿sacerdote-kaytachu munapakullankichistaq?

¹¹¿Pitaq Aaronqa pay contra chhuchupakunaykichispaq? Aswanpas kikin Señor Dios contran qanpas qanwan huñukuq runakunapas sayarishankichis, nispa.

¹²Chaymantataq Moisesqa Eliabpa churinkunata waqyachirqan Datanta Abiramtawan. Paykunataq ichaqa kutichirqanku: — Manan hamuykumanchu.

¹³Qanqa lecheq miel misk'iq askha kanan suyumantan pusamuwarqankiku kay ch'inneqpi wañunaykupaq, ¿ima astawantaq munanki? ¿Hatun atiyniyoq hinachu ñoqaykuta munaychakuyta munanki?

¹⁴Qanqa manaraqmi lecheq miel misk'iq askha kanan suyumanpas pusaykuwankikuchu, manallataq hallp'atapas uvas chakratapas qowankikuchu. ¿Mana yuyayniyoqta hinachu q'otuyta munawankiku? ¡Manan! Manan hamuykumanchu, nispa.

¹⁵Hinan Moisesqa sinchita phiñakuspa Señor Diosta nirqan: — ¡Ama ofrendankuta chaskiychu! Manan ñoqaqa huk asnollankutapas paykunamanta qechurqanichu, manataq mayqenninkutapas mana allinta ruwarqanichu, nispa.

¹⁶Chaymantataq Moisesqa Coreta nirqan: — Señor Diospa ñawpaqenman paqarin asuykamunkichis qanpas qanwan huñukuq runakunapas. Aaronpas chaypin kallanqataq.

¹⁷Paykunan sapanka incienso q'apachinankuta apamunqaku, inciensotawan churaykuspa. Qanpas Aaronpas apamullankichistaq incienso q'apachinaykichista, hinaspa Señor Diospa ñawpaqenman apamunkichis iskay pachak phisqa chunka incienso q'apachinakunata, nispa.

¹⁸Hinan paykunaqa sapanka incienso q'apachinankuta hap'ispa sansata inciensotawan churarqanku, hinaspa Dioswan Tupana Karpa punkupi Moisespiwan Aaronpiwan kuska sayaykurqanku.

¹⁹Coreqa ñan karpaq ñawpaqenpi llapa llaqtata Moisés contra Aarón contrapiwan huñuykusqaña. Chayllamanmi Señor Diospa lliphlli-kayninqa rikhurirqan llapa runakunaq rikushasqan.

²⁰Hinan Señor Diosqa Moisestawan Aarontawan nirqan:

²¹— ¡Kay llaqtamanta t'aqakuychis, kunanpachan lliwta wañuchisaq! nispa.

²²Paykunataq chayta uyarispa uyanpamanta pampaman wikch'ukurqanku, hinaspa nirqanku: — ¡Ay, Diosnillayku! Qanqa llapa runakunaman kawsay qoqmi kanki. ¿Llapa llaqtapaqchu phiñakunki huk runaq huchallanmanta? nispa.

²³Señor Diostaq Moisesman kutichirqan:

²⁴— Llapan Israel runakunata niy, Corepa, Datanpa, Abirampa tiyasqanku karpakunamanta t'aqakuychis, nispa.

²⁵Chaymantataq Moisesqa sayarispa Datanpata Abirampatawan rirqan, Israel kurak runakunapas qhepanta rillarqantaq.

²⁶Hinan Moisesqa llapa runakunata nirqan: — Chay mana chanin qharikunaq karpankumanta t'aqakuychis, amataq paykunaq ima kaqnintapas llamiykuychischu, paqtan qankunapas paykunaq huchanku hawa ch'usaqyachisqa kallawaqchistaq, nispa.

²⁷Chaymi llaqtaqa Corepa, Datanpa, Abirampa karpankumanta t'aqakurqanku. Datanwan Abiramwanqa karpanku punkupin sayasharqanku warmintin wawankunantin.

²⁸Moisestaq nirqan: — Kunanmi yachankichis Señor Diospa kamachisqan tukuy kaykunata ruwashasqayta, manataq ñoqaq munasqaytachu.

²⁹Kay qharikuna iman wañunanta wañunqaku, imaynan llapa runapas wañun hinata chayqa, manan Señor Diospa kachamusqanchu kani.

³⁰Ichaqa Señor Dioschus mana hayk'aq rikusqanchista ruwaqtin, pampa kicharqokuspa paykunata llapan kaqninkunantinta millp'unqa, kawsashaqtaq pachaq ukhunmanpas chinkaykunqaku, chaypachan yachankichis kay qharikunaqa Señor Diosta pisichaq kasqankuta, nispa.

³¹Chay simikunata Moisés rimayta tukuqtinmi paykunaq kasqan cheqas pampa kicharikurqan,

³²hinaspa Datanta Abiramtawan familiantintakama millp'urqan, hinallataq Coretapas lliw kaqninkunantinta runankunantinta millp'urqan.

³³Pachaq ukhunmanmi kawsashaq chinkaykurqanku tukuy kaqninkunantin, pachataq kaqta wisq'akapurqan. Ahinapin chay runakunaqa Israel llaqta ukhumanta ch'usaqyachisqa karqanku.

³⁴Muyuriqpi kashaq llapan Israel runakunataq chay runakunaq qaparisqanta uyarispanku usqhaylla ayqerqanku. Ninakurqankutaq: — ¡Haku! ¡Paqtan ñoqanchistapas pacha millp'uwasunman! nispa.

³⁵Hinallataq Señor Diosqa ninata kachamurqan, hinan chay iskay pachak phisqa chunka incienso haywaq qharikunata rupharqan.

³⁶Señor Diostaq Moisesta nirqan:

³⁷— Aaronpa churin Eleazarta kamachiy, ruphasqa chawpimanta incienso q'apachinakunata horqomuchun, sansan kashanmanraq chayqa karuman hich'amuchun, chaykunaqa ch'uyan.

³⁸Huchallikusqanku hawa wañurqan chay qharikunaq incienso q'apachinankuqa ch'uyanchasqan qhepan. Chhaynaqa, chaykunamanta llaphllakunata takaychis chaywan altarta qatanaykichispaq. Chay llaphllakunaqa Israel runakunaq yuyarinanpaq señalmi kanqa, nispa.

³⁹Hinan sacerdote Eleazarqa wañusqa qharikunaq broncemanta incienso q'apachinankuta hoqarirqan, hinaspataq llaphllakunata takaspanku altarta qatanankupaq kamachirqan.

⁴⁰Chay qatasqanku llaphllata rikuspan llapa Israel runakunaqa yuyariqku Aaronpa miraynillanpuni Señor Diosman inciensota haywaqqa kasqankuta. Chay llaphllaqa yuyarichillantaqmi pipas mana Aaronpa miraynin kashaspa incienso haywaqqa Corewan runankunapiwan hina ama wañunankuta. Tukuy chaykunatan ruwarqanku Señor Diospa Moiseswan Eleazarta kamachisqanman hina.

⁴¹Qhepantin p'unchaytaq llapa Israel llaqta Moisespa Aaronpa contranpi rimayta qallarispa nirqanku: — ¡Qankunaqa Señor Diospa llaqtantan wañuchishankichis! nispa.

⁴²Llapan runataq Moisespa Aaronpa muyuriqninpi ch'aqwaq huñukurqanku, hinaspan paykunaqa Dioswan Tupana Karpata qhawarirqanku. Hinan chay rato karpata phuyu pakarqorqan, Señor Diospa lliphlli-kaynintaq rikhurirqan.

⁴³Hinan Moisesqa Aaronpiwan karpa punkuman rirqanku,

⁴⁴Señor Diostaq Moisesta nirqan:

⁴⁵— ¡Kay llapa runakunamanta t'aqakuychis, kunanpachan lliwta wañuchisaq! nispa. Hinan Moisesqa Aaronpiwan uyanpamanta pampaman wikch'ukurqanku.

⁴⁶Moisestaq Aaronta nirqan: — Incienso q'apachinaykita apamuy, altarmanta sansata churaykuspataq inciensota hich'aykuy, hinaspa usqhaylla riy huñuykusqa kashaq runakunaman, paykunaq huchankumantataq Señor Diosmanta pampachayta mañakuy, Señor Diospa k'arak phiñakuyninmi q'oñirin, chaymi runakunaqa wañuyta qallarinña, nispa.

⁴⁷Hinan Aaronqa Moisespa kamachisqanman hina usqhaylla phawarirqan huñuykusqa runakunaman. Wañuy onqoyqa runakunata wañuchisharqanñan. Hinan Aaronqa incienso q'apayta haywaspa llaqtata huchankumanta pampachachirqan.

⁴⁸Chaymantataq ayakunawan, kawsaq runakunawan tupaypi sayaykurqan, hinan wañuy onqoyqa thanipurqan.

⁴⁹Chaykamaqa ñan chunka tawayoq waranqa qanchis pachak runakunaña wañurqorqan, Corepa huchan hawa ñawpaqtaraq wañuq runakunaqa sapaqmi karqan.

⁵⁰Wañuy onqoy thanipuqtintaq Aaronqa karpa punkuta Moisesman kutipurqan.