Read Diospa Simin Qelqa NÚMEROS 25 Bible Online

NÚMEROS 25 - Diospa Simin Qelqa bible

NÚMEROS 25

¹Israel runakuna Sitimpi tiyashaqtinmi Israel qharikunaqa Moab suyu warmikunawan qhelli hucha ruwayta qallarirqanku.

²Chay warmikunan paykunata waqyarqan diosninkuman sacrificiota haywanankupaq. Hinan Israel runakunaqa paykunawan mikhurqanku, diosninkutataq yupaycharqanku.

³Ahinapin paykunaqa Peor nisqa cheqaspi Baal idolota yupaychayta qallarirqanku. Chaymi Señor Diosqa Israel runakuna contra k'arakta phiñakurqan,

⁴hinaspan Moisesta nirqan: — Israel llaqta llapan umallikunata huñuy, hinaspa ñawpaqeypi p'unchayraq kashaqtin paykunata seq'oy. Hinan Israel contra mana phiñakusaqñachu, nispa.

⁵Chaymi Moisesqa Israel juezkunata kamachirqan: — Sapankaykichispa aylluykichispi Peor nisqa cheqaspi Baal idolota yupaychaq qharikunata wañuchiychis, nispa.

⁶Dioswan Tupana Karpa punkupi Israel runakuna huñuykusqa waqashaqtinkutaq, huk Israel qhari Madián warmita karpanman pusasharqan, Moisespas huñuykusqa llapa runakunapas rikushaqtin.

⁷Hinan chayta rikuspa sacerdote Aaronpa nieton Eleazarpa churin Fineesqa Israel runakuna huñunasqamanta t'aqarikuspa huk lanzata hap'irqan.

⁸Hinaspa chay Israel runaq qhepanta qatiparqan puñunan karpakama, chaypitaq Israel qharita Madián warmitawan wiksankumanta lanzawan sat'irqorqan. Ahinapin Israel runakunata wañuchishaq millay onqoyqa thanipurqan,

⁹ichaqa ñan iskay chunka tawayoq waranqa runakunaña wañurqorqan.

¹⁰Hinan Señor Diosqa Moisesta nirqan:

¹¹— Eleazarpa churin Fineesmi Israel runakuna contra phiñakuyniyta thanichin, imaynan ñoqaqa paykunamanta sientini, chhaynallataqmi Fineesqa ñoqamanta sientin. Chayraykun ñoqallatapuni yupaychawanankuta munaspapas, Fineespa ruwasqan hawa mana paykunata lliwtachu wañuchini.

¹²Chhaynaqa Fineesta niy, Señor Diosmi nin: Ñoqan qanwan rimanakuni allillan kawsanaykipaq.

¹³Hinallataq qanwan rimanakuni qanpas mirayniykipas wiñaypaq sacerdote kanaykichispaq, ñoqamanta sienteq kaspa Israel runakunata pampachachiwasqaykirayku, nispa.

¹⁴Madián warmiwan kuska wañuchisqa qhariqa Salupa churin Zimrin karqan, Saluqa Simeón ayllupi huk familia umallin karqan.

¹⁵Madián warmiq sutintaq Cozbi karqan, paypa taytan Zurqa Madián runakunaq huk ayllunpa umallinmi karqan.

¹⁶Señor Diosmi Moisesta nirqan:

¹⁷— Madián runakunata phawaykuspa wañuchimuychis.

¹⁸Paykunan awqankuta hina q'oturqasunkichis Peor nisqa cheqaspi Baal ídolo yupaychaywan, Madián umalliq ususin Cozbiq qhellichasqanwan. Baalta yupaychasqa hawa millay onqoy chayamuqtinmi chay Cozbiqa lanzawan wañuchisqa karqan, nispa.