Read Diospa Simin Qelqa NÚMEROS 28 Bible Online

NÚMEROS 28 - Diospa Simin Qelqa bible

NÚMEROS 28

¹Señor Diosmi Moisesta nirqan:

²— Israel runakunata kamachiy, Señor Diosmi nin: Unanchasqa kasqan tiempopin mikhuna ofrendakunata haywawankichis, chay ofrendaq sumaq q'apaynin sonqoyman chayaq kananpaq.

³Ruphachina sacrificiota hina sapa p'unchay haywawanaykichis mikhuna ofrendaqa mana imanasqa allinnin watayoq iskay borregon kanqa.

⁴Chaykunatan haywawankichis, tutamanta hukta tardentaq hukkaqta.

⁵Borregotawan kuskan ruru ofrendata haywawankichis huk litro olivo aceitepi pitusqa iskay kilo ñut'u hak'uta.

⁶Ruphachina sacrificiota hina sapa p'unchay haywawanaykichis mikhuna ofrendaqa Sinaí orqopi unanchasqan karqan, chaypa sumaq q'apaynin sonqoyman chayaq kananpaq.

⁷Hinallataq sapanka borregotawan kuska huk litro vinota haywawankichis, hinaspa altar qayllapi ñoqapaq hich'ankichis.

⁸Tarde haywana borregotaqa tutamanta ruwasqaykichis kikillantan haywawankichis, ruru ofrendantinta, hich'aykunapaq vino ofrendantinta ima. Chaykunaqa mikhuna ofrendakunan, sumaq q'apaynintaq sonqoyman chayan.

⁹Samana p'unchaykunapiqa haywawankichis mana imanasqa watayoq iskay borregokunata, ruru ofrendatawan aceitepi pitusqa tawa kilo ñut'u hak'uta, hich'aykunapaq vino ofrendatawan.

¹⁰Chay ruphachina sacrificiotan samana p'unchaykunapi haywawankichis, sapa p'unchay ruphachina sacrificiotaqa hich'aykunapaq vino ofrendantinta haywallawankichispunin.

¹¹Sapa killa qallariy p'unchaymi ruphachina sacrificiota ñoqaman haywawankichis, mana imanasqa iskay torillota, huk anejota, watayoq qanchis borregotawan.

¹²Sapanka torillotan haywawankichis ruru ofrendatawan aceitepi pitusqa soqta kilo ñut'u hak'uta, anejotataq aceitepi pitusqa tawa kilo ñut'u hak'utawan,

¹³hinallataq sapanka borregotapas aceitepi pitusqa iskay kilo ñut'u hak'utawan. Chaykunaqa mikhuna ofrendan kanqa, sumaq q'apaynintaq sonqoyman chayaq kanqa.

¹⁴Sapankaman tupaqnin hich'aykuna vino ofrendan kanqa, iskay litro vino sapanka torillopaq, huk litro phasmin vino sapanka anejopaq, huk litro vinotaq sapanka borregopaq. Chay ruphachina sacrificiokunataqa sapa mosoq killa rikhuriypin haywawankichis.

¹⁵Hinallataq haywawankichis huk orqo cabrata hucha pampachay sacrificiopaq, sapa p'unchay ruphachina sacrificiotaqa hich'aykunapaq vino ofrendantintan haywallawankichispuni.

¹⁶Wata qallariy killaq chunka tawayoq p'unchayninpin ñoqaq sutiypi Pascua Fiestata ruwankichis.

¹⁷Chunka phisqayoq p'unchaypin hatun fiestata qallarinkichis, hinaspan qanchis p'unchay mana qonchuyoq t'antata mikhunkichis.

¹⁸Chay fiesta qallariy p'unchaypiqa yupaychawanaykichispaqmi huñukunkichis, amataq imatapas llank'ankichischu.

¹⁹Ruphachina sacrificiota hinan mikhuna ofrendata haywawankichis mana imanasqa iskay torillota, huk anejota, watayoq qanchis borregotawan.

²⁰Sapanka torillota haywawankichis ruru ofrendatawan aceitepi pitusqa soqta kilo ñut'u hak'uta, anejota aceitepi pitusqa tawa kilo ñut'u hak'utawan,

²¹sapanka borregotapas aceitepi pitusqa iskay kilo ñut'u hak'utawan.

²²Haywallawankichistaq huk orqo cabrata hucha pampachay sacrificiopaq.

²³Tukuy chay sacrificiokunatan haywawankichis, sapa p'unchay tutamanta haywawanaykichis ruphachina sacrificioqa sapaqmi kanqa.

²⁴Ahinatan chay fiestapi sapa p'unchay mikhuna ofrendakunata haywawankichis, chaykunaq sumaq q'apaynin sonqoyman chayaq kananpaq. Sapa p'unchay ruphachina sacrificiotaqa hich'aykunapaq vino ofrendantintan haywallawankichispuni.

²⁵Qanchiskaq p'unchaypiqa yupaychawanaykichispaqmi huñukunkichis, aman imatapas llank'ankichischu.

²⁶Semanakuna Fiesta nisqa Cosecha Fiestapi ñawpaqkaq ruruta haywaspa yupaychawanaykichispaqmi huñukunkichis, amataq imatapas llank'ankichischu.

²⁷Chay p'unchaymi ruphachina sacrificiota haywawankichis iskay torillota, huk anejota, watayoq qanchis borregotawan.

²⁸Sapanka torillota haywawankichis ruru ofrendatawan aceitepi pitusqa soqta kilo ñut'u hak'uta, anejota aceitepi pitusqa tawa kilo ñut'u hak'utawan,

²⁹sapanka borregotapas aceitepi pitusqa iskay kilo ñut'u hak'utawan.

³⁰Haywallawankichistaqmi huk orqo cabrata hucha pampachay sacrificiopaq.

³¹Chay ruphachina sacrificiokunapas tupaqnin ruru ofrendakunapas, hich'aykunapaq vino ofrendakunapas, sapa p'unchay haywawanaykichis ruphachina sacrificiomantaqa sapaqmi kanqa. Chay haywawanaykichis uywakunaqa mana imanasqan kanqa.