Read Diospa Simin Qelqa NÚMEROS 36 Bible Online

NÚMEROS 36 - Diospa Simin Qelqa bible

NÚMEROS 36

¹Josepa churin Manasespa churin Maquirpa miraynin Galaad ayllu familia umallikunan Moisesman, Israel ayllu umallikunamanwan

²rispa nirqanku: — Wiraqochayku Moisés, Señor Diosmi kamachirqasunki Israel ayllukunaman sorteopi t'aqaspa hallp'ata rakinaykipaq, hinallataq kamachirqasunki wawqeyku Zelofehadpa hallp'anta ususinkunaman qopunaykipaq.

³Ichaqa paykuna Israel suyuq hukkaq ayllun qharikunawan casarakunqaku chayqa, paykunaq hallp'anqa manañachá ñoqaykuq aylluykuman tupanqañachu, aswanpas mayqen ayllu qharikunawanchus chay warmikuna casarakunqa chay ayllumanchá tupapunqa. Ahinapin tupawaqniyku hallp'ata pisimanta-pisi tinkuyachinqaku.

⁴Hinallataq Israel llaqtapaq hallp'a kachariy wata chayamuqtin, chay warmikunaq hallp'anqa qosankuq ayllun hallp'aman t'aqasqa kapunqa, manañataq ñoqaykuq aylluyku hallp'apiñachu kapunqa, nispanku.

⁵Chaymi Moisesqa Señor Diospa kamachisqan kaspa Israel runakunata kamachirqan: — Josepa miraynin ayllu runakunaqa chanintan rimanku.

⁶Señor Diosmi kamachin Zelofehadpa ususinkunata pi munasqanku qhariwanpas casarakunankuta, ichaqa kikin ayllunku qharikunallawan.

⁷Sapanka Israel aylluman tupaq hallp'aqa manan huk ayllumanta huk aylluman t'aqasqa kananchu, llapan Israel ayllukunaqa sapankan chaskisqanku hallp'ata hap'ishallanqaku.

⁸Mayqen ayllu warmipas hallp'ata herencianta hina chaskinqa chayqa, kikin ayllu qhariwanmi casarakunqa. Ahinapin sapanka Israel runakuna taytankumanta chaskisqanku hallp'ata hap'ishallanqakupuni.

⁹Manan mayqen herencia hallp'apas huk ayllumanta huk aylluman t'aqasqa kananchu. Sapanka Israel ayllun tupaqnin hallp'ataqa mana kacharispa hap'inqa, nispa.

¹⁰Chaymi Zelofehadpa ususinkunaqa Señor Diospa Moisesta kamachisqanman hina kasukurqanku.

¹¹Paykunan karqan: Maala, Tirsa, Hogla, Milca, Noapiwan primonkuwantaq casarakapurqanku.

¹²Chay qharikunan karqanku Josepa churin Manasespa mirayninmanta, ahinapin chay warmikunaq herencian hallp'aqa taytankuq ayllullanpipuni qhepapurqan.

¹³Señor Diosmi chay kamachikuyninkunata unanchayninkunatawan Moiseswan Israel runakunaman willachirqan Jericó llaqta qhaway Jordán mayu qaylla Moab suyu pampapi.