Read Diospa Simin Qelqa NÚMEROS 8 Bible Online

NÚMEROS 8 - Diospa Simin Qelqa bible

NÚMEROS 8

¹Señor Diosmi Moisesta nirqan:

²— Aaronta niy: Candeleroq qanchis lamparachankunata k'allman pataman churaspaqa, ñawpaqen ladoman k'anchananpaq hinapunin churanki, nispa.

³Hinan Aaronqa Señor Diospa Moiseswan kamachisqanta hunt'arqan, chaymi lamparachakunata ñawpaqen ladoman k'anchananpaq churarqan.

⁴Candeleroqa qorimanta takaspa ruwasqan karqan chakinmanta lamparacha churanakama. Señor Diospa Moisesman rikuchisqan rikch'ayman hinan candeleroqa ruwasqa karqan.

⁵Señor Diosmi Moisesta nirqan:

⁶— Leví runakunata Israel runakuna ukhumanta t'aqaspaykin ch'uyanchanki.

⁷Kay hinatan paykunata ch'uyanchanki: Ch'uyanchana unuwanmi paykunata ch'aqchunki. Paykunataq cuerpo suphunkuta llapanta k'isukunqaku, p'achankutapas t'aqsakunqaku, ahinapin ch'uya kapunqaku.

⁸Chaymantataq paykunaqa huk torillota hap'inqaku ruru ofrendantinta, chay ofrendaqa aceitewan ñut'u hak'uwan pitusqan kanqa. Qantaq huk torillota hap'inki hucha pampachay sacrificiopaq.

⁹Hinaspa Leví runakunata Ñoqawan Tupana Karpaman qayllaykuchinki, llapan Israel runakunatataq huñuykunki.

¹⁰Chaymantataq Leví runakunata ñawpaqeyman asuykachimunki, Israel runakunataq paykunaq uman pataman makinkuta churaykunqaku.

¹¹Aaronmi Leví runakunata t'aqapuwanqa Israel runakunaq ofrendanta hina. Ahinapin Leví runakunaqa ñoqata serviwanankupaq t'aqasqa kanqa.

¹²Hinamantataq Leví runakunaqa torillokunaq uman pataman makinkuta churanqaku, chaymi huknin torillo hucha pampachay sacrificio haywasqa kanqa, hukkaq torillotaq ruphachina sacrificio haywasqa kanqa, Leví runakuna ch'uyanchasqa kananpaq.

¹³Hinallataq Aaronman churinkunamanwan Leví runakunata qayllaykachinki, hinaspan paykunata haywawanki ñoqapaq ofrendata hina.

¹⁴Ahinapin Leví runakunata t'aqanki Israel runakuna ukhumanta ñoqapaq kanankupaq.

¹⁵Ch'uyanchasqayki sapaqchasqayki qhepatataq paykunaqa Ñoqawan Tupana Karpapi llank'aq hamunqaku.

¹⁶Llapan Israel runakuna ukhupiqa paykunan ñoqapaq t'aqasqapuni kanku. Ñoqaqa Israel runakunaq llapan phiwi churinpa rantinpin Leví ayllu runakunataqa akllakurqani,

¹⁷ñoqamanmi tupawan Israel runakunaq llapan phiwi churinkunaqa, hinallataq uywankuq llapan ñawpaq wachay uñankunapas. Egipto suyu runakunaq phiwi churinkunata wañuchishaspaymi, Israel runakunaq phiwi churinta ñoqapaq t'aqakurqani,

¹⁸paykunaq rantinpitaqmi Leví runakunata akllakurqani.

¹⁹Leví ayllutaqa Israel ayllukuna ukhumanta t'aqaspaymi Aaronman churinkunamanwan qokuyta hina qorqani Israel runakunaq rantinpi Ñoqawan Tupana Karpapi llank'anankupaq, Israel runakuna karpaq ch'uya kanchanman asuykuspa muchuchisqa kanankuta hark'anankupaqwan, nispa.

²⁰Hinan Moisesqa Aaronpiwan llapan Israel runakunapiwan Leví runakunamanta Señor Diospa kamachisqanta hunt'arqanku, Señor Diospa Moisesta kamachisqanman hina.

²¹Leví runakunan ch'uyanchakurqanku, p'achankutapas t'aqsakurqanku, hinan Aaronqa ofrendata hina paykunata Señor Diosman qorqan, hinaspataq hucha pampachay sacrificiota haywarqan paykuna ch'uyanchasqa kanankupaq.

²²Tukuy chaykuna qhepatataq Leví runakunaqa Dioswan Tupana Karpata rirqanku llank'anankupi llank'aq, kamachiqninkutaq karqan Aaronwan churinkunapiwan. Señor Diospa Moisesta kamachisqanman hinan Leví ayllu runakunawan ruwarqanku.

²³Señor Diosmi Moisesta nirqan:

²⁴— Leví runakunaqa iskay chunka phisqayoq watayoq kashaspanmi Ñoqawan Tupana Karpapi llank'ayta qallarinqaku,

²⁵samapunqakutaq llank'anankumanta phisqa chunka watayoq kashaspa.

²⁶Chay qhepataqa llank'aq-masinkunata yanapanmanmi llank'anapi, ichaqa manan llank'aq churasqa hinañachu llank'anqa. Ahinatan Leví runakunaq llank'anantaqa wakichinki, nispa.