Read Diospa Simin Qelqa MIQUEAS 3 Bible Online

MIQUEAS 3 - Diospa Simin Qelqa bible

MIQUEAS 3

¹Ñoqan nirqani: Jacobpa kurak runankuna, uyariychis, Israel suyupi umallikuna, uyariychis: ¿Manachu qankunaqa imaynachus chaninchay kasqanta qhawanaykichis?

²Chaypas qankunaqa allinkaqtan cheqnikunkichis, mana allinkaqtataq munakunkichis, qarantan ch'utinkichis, aychantataq tullunankichis.

³Llaqtaytan kawsashaqllata mikhunkichis, qarantan ch'utinkichis, tulluntan p'akinkichis, perolpaq hinan kuchurqarinkichis, mankapaq aychata hinan wakichinkichis.

⁴Chaypachan Señor Diosta waqyakunkichis, ichaqa, manan payqa kutichimusunkichischu. Millaykunata ruwasqaykichisraykun, chay p'unchaykunapi Señor Diosqa mana qhawarimusunkichischu.

⁵Señor Diosmi llaqta pantachiq profetakunamanta nin: Mikhuchiqninkupaqmi sumaq kawsayta willanku, mana mikhuchiqninkupaqtaqmi ch'aqwata sayarichinku.

⁶Chaymi chay profetakunapaqqa tutayaykapunqa, rikhuriytaqa manañan rikunqakuñachu, manañan watuytapas atinqakuñachu. Chay profetakunapaqmi inti haykupunqa, p'unchaymi paykunapaq tutayaykapunqa.

⁷Hinaqtinmi profetakunaqa p'enqakunqaku, watuqkunapas p'enqasqa pukamanraq tukunqaku. Dios mana imatapas kutichimuqtinmi llapallanku usphurayanqaku, nispa.

⁸Ñoqatan ichaqa Señor Diospa Espiritun hunt'aykuwan atiywan, kuskachaywan, kallpawan ima. Dios contra sayarisqanmanta Jacobta ch'atanaypaq, Israelta huchanmanta huchachanaypaq.

⁹Jacobpa kurak runankuna, kayta uyariychis, Israel suyupi umallikuna, uyariychis. Qankunan chaninchayta cheqnikunkichis, kuskachaytapas llapantan q'ewinkichis.

¹⁰Qankunan runata wañuchispa Sión llaqtata perqankichis, mana chaninta ruwaspan Jerusalenta sayarichinkichis.

¹¹Juezninkuqa lluk'iykusqaraykun juzganku, sacerdotenkutaq qolqerayku yachachinku, profetankupas qolqepaqmi watunku, chaypas Señor Diosmanmi hap'ipakunku: Ñoqanchiswanmi Señor Diosqa kashan, manan ima mana allinpas chayamuwasunchu, nispa.

¹²Chaymi huchallikusqaykichis hawa Sionqa chakra hina yapusqa kanqa, Jerusalenpas thunisqa soqyan kapunqa, yupaychana wasi orqotaq ch'aphrawan hunt'a kapunqa.