Read Diospa Simin Qelqa NAHÚM 2 Bible Online

NAHÚM 2 - Diospa Simin Qelqa bible

NAHÚM 2

¹Yaw, Nínive llaqta, thuniqniykin qan contra phawamushan. ¡Pukarapi soldadoykikunata sayarichiy! ¡Ñanta makilla qhawachiy! ¡Allinta kallpachakuy! ¡Kallpasapaykikunata huñuykuy!

²Qechuqninkunaña llat'anarqanku chaypas, uvas chakrankutaña chaqorqanku chaypas, Señor Diosmi Jacobpa hatun-kayninta wakmanta t'ikarichinqa, Israelpa hatun-kayninta wakmanta rikhurichinqa.

³Awqa soldadokunaq escudonqa pukan, maqanakuqkunaq p'achanqa sansaq pukan. Phawaykunankupaqmi wakichikunku, llusk'achasqa carretankun k'anchaywan lliphipin, caballonkun phawariy-phawariyllaña kashan.

⁴Carretakunan callekunapi phawaykachan, plazakunapin phawaykachan, hap'ichisqa nina hinan k'anchan, illapa hinan q'enqo-q'enqota phawan.

⁵Umalliqa allinnin soldadonkunatan waqyan, paykunataqmi tanqarparinakusparaq hamunku, llaqta perqamanmi phawaykunku, patankupin qatana hina escudokuna kashan perqa patamanta ch'aqemusqakunawan mana k'irisqa kanankupaq.

⁶Mayu hark'achisqakunan q'asarparikun, reypa wasintaq thunirparikun.

⁷Llaqta reinatan presota apanku, kamachin warmikunan urpi hina khuyayta anchinku, qhasqonkuta takakuspankun waqashanku.

⁸Nínive llaqtaqa qocharayaq unu hinan, q'asarparisqa qochamanta hinan runankunaqa wakwarqonku. Paykunatan kunkayoqta waqyanku: ¡Sayaykuychis! ¡Kutirimuychis! nispa, manataqmi mayqenpas kutirimunchu.

⁹¡Qolqeta horqoychis! ¡Qorita qechuychis! ¡Imaymanan hunt'a kasqa! ¡Imaymana illan kasqa!

¹⁰¡Thunisqan, llat'anasqan, ch'usaqyachisqan Niniveqa kapushan! Runakunan mancharisqa chiriyanraq, tullunkun mana takyanchu, cuerponkun manchasqa khatatatan, uyankupas q'ellumanraqmi tukun.

¹¹¿Maytaq leonkunaq t'oqon hina Nínive llaqtaqa? Chaypin uña leonkunaman mikhuchirqanku, orqo leonpas, china leonpas, uña leonkunapas chaypin mana imanasqalla tiyarqan.

¹²Chay leonqa[1] askhatan uñankunapaq wañuchirqan, chinanpaqpas hap'isqanta llik'irqarirqan, t'oqonkunatapas mikhunawan hunt'achirqan.

¹³Tukuy-atiyniyoq Señor Diosmi nin: Ñoqaqa qan contran kashani, awqa-tinkuna carretaykikunata kanaykuspan q'osñirichisaq, awqa-tinkuypin soldadoykikunata wañuchisaq, manañan hukkunata llat'anankiñachu, manañataqmi hayk'aqpas kachapuriykikunaqa manchachispa rimanqakuñachu, nispa.