Read Diospa Simin Qelqa NAHÚM 3 Bible Online

NAHÚM 3 - Diospa Simin Qelqa bible

NAHÚM 3

¹¡Ay, imaynaraqmi kanki runa wañuchiq llaqta! ¡Llullakuylla-llullakuqmi kanki! ¡Qechuylla-qechuqmi kanki! ¡Suwakushallankipunin!

²¡Uyariychis! Hasut'in ch'ataqeshan, ruedakunan raqhaqeshan, caballokunan q'aqraqeshan, carretakunan phawaspa maywikushan.

³¡Caballerian phawashan! ¡Espadakunan k'anchashan! ¡Lanzakunan lliphipishan! ¡Askhallañan k'irisqakunaqa! ¡Askhallañan ayakunaqa! ¡Mana yupay atinan wañuchisqakunaqa! ¡Puriqkunan ayakunapi misk'akunku!

⁴Niniveqa sonqo suwaq munaymanmi tukurqan, rabona warmi hinataq millayllaña karqan, kusallaña layqa warmi hinan karqan, qhelli huchapi purisqankunawanmi suyukunaq sonqonta suwarqan, llaqtakunatapas layqakusqankunawanmi kamachi-kayman aparqan, chaymi kunanqa muchuchisqapuni kapushan.

⁵Tukuy-atiyniyoq Señor Diosmi nin: Ñoqaqa awqaykin kani, uyaykikaman polleraykita q'allpasqayki, hinaspan q'ala ukhuykita hatun suyukunaman rikuchisaq, p'enqayniykitapas llaqtakunamanmi qhawachisaq.

⁶Qanmanmi qhellikunata wikch'uykusqayki, qhawanapaqmi p'enqayman churasqayki.

⁷Llapa rikuqniykikunan qanmanta ayqekuspa ninqaku: ¡Nínive llaqtan thunisqa kapusqa! ¿Pin payta llakipayanqa? ¿Pin payta sonqochaykunqa? nispa.

⁸¿Qanqa Tebas llaqtamanta aswan allinchu kanki? Chay llaqtan Nilo mayu patapi kasharqan, unuwan muyuykusqan kasharqan, hark'aqninqa Nilo mayun karqan, unupas perqa hinan karqan.

⁹Etiopía suyuq, Egipto suyuq mana tukukuq kallpachayninwanmi ancha atiyniyoqña karqan, Fut runakunan, Libia runakunan payta yanaparqan.

¹⁰Chaypas payqa preso apasqan karqan, wak suyumanmi apasqa karqan. Huch'uy wawankupas llapa calle esquinakunamanmi ch'aqesqa karqan, allichachaq runankunapaqmi sortearqanku, kamachikuq runakunatan thunkurqanku.

¹¹Qanpas Nínive llaqta t'ili machasqa hinan kanki, awqamantan pakakunki, awqamanta qespikunaykipaqmi pakakunaykita maskhanki.

¹²Llapa pukaraykikunan poqosqa higosniyoq sach'a hina, chaykunata chhaphchinku chayqa, mikhuqninpa siminmanmi urmaykun.

¹³Soldadoykikunaqa warmi t'aqa hinan, suyuykiq punkunkunaqa llapallanmi awqaykikunapaq kicharayashan, punkuykiq p'utinkunataqa ninan ruphaykushan.

¹⁴Awqataq muyuykusunki chayqa, unuta huñukuy, pukaraykikunata allinta perqapay, t'uruchay, allinta saruy, ladrillota sik'iy.

¹⁵Ichaqa chaypin nina ruphaykusunki, soldadokunan wañuchisunki, langosta kuru hinan tukusunki. Langosta hinaña askhayanki chaypas, t'isku-t'isku hinaña miranki chaypas.

¹⁶Negociaqniykikunatan hanaq pacha ch'askakunamantapas astawanraq askhayachirqanki, paykunaqa langosta hinan mikhuyta tukuspa ripunku.

¹⁷Qollana runaykikunaqa langostakuna hinan, oficialniykikunapas wakwamuq langostakuna hinan, chiri p'unchaypin kancha patapi tiyarayashanku, inti lloqsimuqtintaq phalaripunku, manataq maymanchus risqanku yachakunchu.

¹⁸Yaw, Asiria suyu rey, ¡kamachikuq runaykikunan wañupunku! ¡Allichachaq runaykikunan chinkaripunku! Llaqtayki runakunaqa orqokunamanmi ch'eqeykunku, manataqmi pipas huñuykamuq kanchu.

¹⁹Manan k'irisqa kasqaykipaq hampi kanchu, mana hampiy atinan nanayniykiqa. Llapa runan millay sarunchasqaykitaqa muchurqanku, chaymi thunisqa kasqaykimanta uyarispa llapallanku kusisqa t'aqllakunku.