Read Diospa Simin Qelqa HABACUC 1 Bible Online

HABACUC 1 - Diospa Simin Qelqa bible

HABACUC 1

¹Kaymi Señor Diospa huk rikhuriypi profeta Habacucman rikuchisqan.

²Señor Diosnilláy, ¿hayk'aqkamataq waqyakamusqayki, manataq uyariwankichu? ¿Hayk'aqkamataq: ¡Sarunchashawankun! nispa qaparimusqayki, manataq qespichiwankichu?

³¿Imanaqtintaq mana chaninkaqta rikuchiwanki? ¿Imanaqtintaq ñak'arichiytaqa ch'inlla qhawanki? Runa ch'utiqllatan runa maqaqllatan rikushani, quejanakushankun churanakushankun.

⁴Kamachikuy simiqa waqllichisqan kapun, manan cheqaq chaninchaypas kanñachu, arí, millay runan chanin runata mat'iykun, chaymi chanin-kayta q'ewispa juzganku.

⁵Señor Diosmi nin: Suyukunata qhawariychis, chaykunata qhawarispan musphankichispuni. Musphay ruwanatan kay p'unchaykunapi ruwasaq, piña chayta willasuqtiykichispas manan creewaqchischu.

⁶Caldea runakunatan atiyniyoqta sayarichimusaq, paykunaqa mana khuyapayakuqmi, hawan-ukhunta ruwaqmi kanku, hallp'a pachantinmanmi mast'arikunku wak runakunaq hallp'anta qechunankupaq.

⁷Paykunaqa manchakuy millay runakunan kanku, manan ima kamachisqa simitapas kasunkuchu, aswanpas anchaykachaspan munayllankuta ruwanku.

⁸Caballonkuqa leopardokunamantapas aswan phawaqmi, tuta hap'iq lobokunamantapas aswan k'uchin, caballopi soldadokunapas wayra hinan phawanku, karu llaqtakunamantan phawamunku, mikhunaman phawaykuq anka hinan p'aktiykukunku.

⁹Llapallankun maqashaspalla atipanankupaq chayanku, ch'inneqmanta ruphashaq wayra hinan askhallaña chayarparinku, aqota hinan presokunata huñurqonku.

¹⁰Reykunatan pisicharparinku, kamachikuqkunatapas asipayankun, pukarakunata qhawarispapas asikunkun, hallp'a seqanakunatan ruwarqonku, hinaspan pukarakunata munaychakunku.

¹¹Chaymantataq sinchi wayra hina pasapunku, kallpankun diosninkuqa, chaypin iñinku, chay ruwasqankuwantaq huchallikunku, nispa.

¹²Señor Diosnilláy, qanqa wiñay-wiñaymantan kanki. Diosnilláy, qanqa Ch'uya Diosmi kanki, chaymi mana wañusaqkuchu. Señor Diosnilláy, juzganankupaqmi Babilonia runakunataqa churarqanki. Qanmi pakakunay Qaqa kanki, muchuchinankupaqmi paykunataqa churarqanki.

¹³Sinchi ch'uyan kanki, chaymi millaykaqtaqa mana hinallatachu qhawanki, mana chaninkaqtapas manan rikuyta atinkichu. Chayri, ¿imanaqtintaq runa hap'iykachiqkunataqa ch'inlla qhawanki? ¿Imanaqtintaq mana ima ninkipaschu, paymanta aswan chanin runata mana chanin runa wañuchiqtin?

¹⁴Qanqa qochapi challwakunata hinallan runakunata rikunki, mana piniyoq suchuq animalkunata hinallan runakunata qhawanki.

¹⁵Babilonia runakunaqa llapallantan anzuelowan hina aysanku, llikawan challwaq hinan hap'inku, huñuykusqata rikuspataq kusikunku q'ochukunku.

¹⁶Hinaspan llikankuta yupaychaspa sacrificiota haywanku, inciensowanmi llikankuta q'apachinku, ahinapin askha kaqniyoq kanku, sumaq mikhunatan mikhunkupas.

¹⁷¿Chay hinatachu runakunataqa hap'ishallanqaku? ¿Chay hinatachu suyukunataqa mana khuyapayaykuspa thunishallanqaku?