Read Diospa Simin Qelqa HABACUC 2 Bible Online

HABACUC 2 - Diospa Simin Qelqa bible

HABACUC 2

¹Qhawana patapin makilla qhawashasaq, perqa patapin sayashasaq, imatachus Señor Diospa niwanantan suyakusaq, quejakusqayman imatachus nimuwanantan suyakusaq.

²Hinan Señor Diosqa nimuwarqan: Rikuchisqayki chayta qelqay, p'alta k'arpapi sut'ita qelqay, chayta phawaylla leenapaq.

³Manaraqmi tiempo chayamunchu kay rikhuriypa hunt'akunanpaq, ichaqa hunt'akunqapunin, chay p'unchayqa sispaykamushanñan, qheparimunqaña chaypas, suyallay, tiemponpipunin chayamunqa.

⁴Chayrayku kay willakuyta qelqay: Mana chaninta ruwaq runaqa pisi kallpayanqan, chanin runan ichaqa Diospi iñispallapuni kawsanqa, niqta.

⁵Qhapaq kayqa runatan pantachin, imaymanata munapakuq runaqa k'ankaykachanmi, sonqonqa manan tiyanchu, Wañuy-pacha hinan hanllarin, wañuy hinan mana saksanchu, chaymi llapa suyukunapi munaychakun, llapa llaqtakunatan kamachiman tukuchin.

⁶Chay llapallan suyukunan payta takipayanqaku, pay contran k'askachita takinqaku: ¡Imaynaraqmi kanki! Qanqa hukkunamanta suwakuspaykin qhapaqyashanki. ¿Hayk'aqkamataq prenda hap'isqaykiwan qhapaq kaykunata huñushallanki?

⁷Qonqayllan manukuqniykikunaqa sayarimunqaku, paykunaqa rikch'arimuspan mancharichisunkiku, hinaspan imaymanaykita qechusunkiku.

⁸Askhallaña suyukunamantan llat'anarqanki, runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi wakin suyukunapas llat'anasunkiku.

⁹¡Ay, imaynaraqmi kanki! Familiaykitan suwakusqaykikunawan qhapaqyachirqanki, wasiykitapas mana piqpa chayananpin wasicharqanki mana piqpa imanananta yuyaspayki.

¹⁰Qanqa askha llaqta runakunatan waqllichirqanki, wasiykipi kaqkunatan p'enqayman churarqanki, qan kikillaykitataqmi waqllichikurqankipas.

¹¹Perqa rumikunapas qan contran qaparinqaku, chakasqa kurkukunapas chay qaparisqatan yachapayanqaku.

¹²¡Ay, imaynaraqmi kanki! Runata wañuchispan llaqtata perqarqanki, mana chaninkunata ruwaspan llaqtata teqsicharqanki.

¹³Ahinaqa, chay runakunaq llank'asqanqa ninapaq llant'a hinan, suyukunaqa yanqan sayk'unku. ¿Manachu chayqa Tukuy-atiyniyoq Señor Diospa kamachikusqan?

¹⁴Imaynan lamar-qochaqa unuwan hunt'a kashan, chay hinan kay pachaqa Señor Diospa qhapaq-atiyninta reqsiq runakunawan hunt'a kanqa.

¹⁵¡Ay, imaynaraqmi kanki! Runamasiykitan chhaqrusqa vinowan machachirqanki, hinaspan q'ala kayninta qhawapayarqanki.

¹⁶Qanqa manan hatunchasqachu kanki, aswanpas p'enqaypin rikukunki. Qanpas kunanqa ukyallankitaqmi, hinaspan q'ala kayniykita rikuchikunki. Señor Diosmi paña makinwan phiñakuy hunt'a vasota haywamusunki, hinan hatun-kayniykiqa p'enqayman tukupunqa.

¹⁷Líbano orqokunapin sach'akunata kumparqanki, qantapas kumpasunkikun. Salqa animalkunatapas wañuchirqankin, qantapas wak animalkunan mancharichisunki. Runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi chay muchuchiyqa taripamusunki.

¹⁸¿Imapaqtaq valen llaqllasqa idoloqa? Runallan chaytaqa llaqllarqan. ¿Imapaqtaq valen ninapi unuyachispa hich'asqa diospas? Llullakuyta yachachiqllan chayqa. Manan idolokunaqa rimayta atinchu, chaypas ídolo ruwaqqa chaykunamanpunin hap'ipakun.

¹⁹¡Ay, imaynaraqmi kanki! Qanmi k'ullu idolota: ¡Rikch'ariy! ninki. Mana rimariq rumitapas: ¡Sayariy! ninki. ¿Chaykunaqa imallatapas runata yuyaychanmanchu? Chaykunaqa qoriwan qolqewan qatasqan kashan, ichaqa manan kawsankuchu.

²⁰Señor Diosmi ichaqa ch'uya wasinpi kashan, paypa qayllanpiqa kay pachantin runakuna upallachun.