Read Diospa Simin Qelqa HAGEO 1 Bible Online

HAGEO 1 - Diospa Simin Qelqa bible

HAGEO 1

¹Rey Darío iskaykaq watapiña kamachikushaqtinmi, soqtakaq killaq qallariynin p'unchaypi Señor Diosqa profeta Hageowan rimaykachirqan Salatielpa churin Zorobabelta, paymi Judá suyupi kamachikuq karqan, Josadacpa churin Josuetaq uma sacerdote karqan.

²Tukuy-atiyniyoq Señor Diosmi nin: Kay llaqta runakunan nishanku, manaraqmi tiempo chayamunchu Señor Diospa wasinta wakmanta sayarichinapaq, nispanku.

³Chaymantataqmi Señor Diosqa profeta Hageowan rimaykachirqan:

⁴¿Ima allinmi qankunapaq sumaqchasqa wasikunapi tiyayniykichis, yupaychawanaykichis wasitaq kay hina raqay-raqay kashaqtin?

⁵Manapunin, aswanpas imaynatachus kawsashasqaykichista allinta qhawarikuychis. Ninmi Tukuy-atiyniyoq Señor Diosqa.

⁶Askhatan tarpurqankichis, ichaqa pisillatan cosecharqankichis. Askhatan mikhunkichis, ichaqa manan saksankichischu. Ukyankichismi, ichaqa ch'akichikushallankichismi. P'achakunkichismi, ichaqa manan q'oñirinkichischu. Llank'apakuqpas t'oqo ch'uspaman hinan pagonta churaykun.

⁷Chhaynaqa, ñoqa Tukuy-atiyniyoq Señor Diosmi nini: Imaynatachus kawsasqaykichista allinta qhawarikuychis.

⁸Orqokunata wichaspa kurkukunata apamuychis, hinaspa yupaychana wasita wakmanta sayarichiychis. Ñoqan chaywan kusikusaq, hinaspan hatunchasqa kasaq, ninmi Señor Diosqa.

⁹Askha cosecha hoqariytan yuyaykurqankichis, ichaqa pisillatan hoqarirqankichis. Wasiman taqesqaykichistapas phukurparispan ch'usaqyachirqani. ¿Imanaqtin? Wasiyqa raqay-raqayraqmi kashan, qankunataqmi wasillaykichista ruwakushankichis. Ñoqa Tukuy-atiyniyoq Señor Diosmi chayta nini.

¹⁰Chaymi parapas mana paramurqanchu, chakrapas manan rururqanchu.

¹¹Ñoqan ch'akiriyta chayachimurqani chakrakunamanpas, orqokunamanpas, trigomanpas, uvas chakramanpas, olivo sach'akunamanpas, llapa hallp'a rurumanpas, runakunamanpas, uywakunamanpas, llapa llank'akusqaykichismanpas, nispa.

¹²Hinaqtinmi Zorobabelpas, uma sacerdote Josuepas, Babilonia suyumanta llapa kutimpuqkunapas Diosninku Señor Diospa siminta uyarispa, kachasqan profeta Hageoq siminta kasukurqanku. Hinaspan llapallanku Señor Diosta manchakurqanku.

¹³Hinamantan Señor Diospa willaqnin Hageoqa paykunaman willarqan, Señor Diosmi nin: Ñoqaqa qankunawanmi kashani, nispa.

¹⁴Ahinatan Señor Diosqa Salatielpa churin Judá suyupi kamachikuq Zorobabelpa sonqonta kuyurichirqan, hinallataq Josadacpa churin uma sacerdote Josuepa sonqontapas, hinallataq Babilonia suyumanta llapa kutimuqpa sonqontapas kuyurichirqan. Ahinapin Tukuy-atiyniyoq Señor Diosninkuq wasinta wakmanta sayarichiyta qallarirqanku.

¹⁵Chaymi karqan rey Darío iskay kaq watapiña kamachikushaqtin, soqtakaq killaq iskay chunka tawayoq p'unchayninpi.