Read Diospa Simin Qelqa ZACARÍAS 13 Bible Online

ZACARÍAS 13 - Diospa Simin Qelqa bible

ZACARÍAS 13

¹Chay p'unchaykunapin Davidpa mirayninpaq, Jerusalenpi tiyaqkunapaqpas phawashaq unu pukyu kanqa, huchamantapas qhellimantapas chaypi ch'uyanchakunankupaq, nispa.

²Tukuy-atiyniyoq Señor Diosmi nin: Chay p'unchaykunapin idolokunata chinkachisaq, manañataqmi hayk'aqpas chaykunata yuyarinqakuñachu. Hinallataq profetakunatapas llapa millay espiritutapas kay suyumanta chinkachisaq.

³Piña profetizaqtinpas, tayta-mamanmi payta ninqa: Qanqa wañunkin, Señor Diospa sutinpi llullakusqaykirayku, nispa. Hinaspan tayta-mamanqa profetizashaqtin payta t'urpuspa wañuchinqa.

⁴Chay p'unchaykunapin profetakunaqa rikhuriyta rikusqankumanta profetizaspanku p'enqakunqaku. Manañataqmi hayk'aqpas profeta hina suphu p'achawan churakunqakuchu runata q'otunankupaq.

⁵Aswanpas sapankan ninqa: Manan profetachu kani, chakra llank'aqmi kani, wayna kasqaymantapachan chakrata llank'ani, nispa.

⁶Pipas payta: ¿Ima k'iri sich'ukunan makiykipi kaqqa? nispa tapuqtinqa, kutichinqa: Chaykunaqa amigoykunaq wasinpi k'irichikusqaykunan, nispa.

⁷Tukuy-atiyniyoq Señor Diosmi nin: ¡Yaw, espada, michiqniy contra sayariy! ¡Kawsaq-masiy contra sayariy! Michiqta k'iriy, ovejakunataq ch'eqechisqa kanqa, uñachakunatataq ñoqa qatiykachasaq.

⁸Kay suyuntinpi tiyaqkunamantan kinsa t'aqamanta iskay t'aqa wañunqa, huknin t'aqataq chaypi qhepanqa. Ñoqa Señor Diosmi chayta nini.

⁹Chay huknin t'aqatan ninaman wikch'uykusaq, hinaspan paykunata ch'uyanchasaq qolqe ch'uyanchasqata hina, paykunatan ch'uyanchasaq qori ch'uyanchasqata hina. Chaymantan paykunaqa mañakamuwanqaku, ñoqataq paykunata uyarispa nisaq: Llaqtaymi kankichis, nispa. Paykunataq ninqa: Señor Diosmi Diosninchisqa, nispanku.