Read Diospa Simin Qelqa ZACARÍAS 3 Bible Online

ZACARÍAS 3 - Diospa Simin Qelqa bible

ZACARÍAS 3

¹Chaymantataq uma sacerdote Josueta qhawachiwarqan, paymi Señor Diospa angelninpa ñawpaqenpi sayashasqa, Satanastaq payta ch'atananpaq paña ladonpi sayashasqa.

²Señor Diostaq Satanasta nirqan: — Yaw, Satanás, ñoqan phiñariyki, ñoqan Jerusalenta akllakurqani, qantataqmi phiñariyki. Kay runaqa kanaykusqamanta aysarqamusqa qoqomisqa k'ullu hinan, nispa.

³Josuetaq angelpa ñawpaqenpi qhellillaña p'achawan p'achasqa sayashasqa.

⁴Hinan angelqa kamachinkunata kamachirqan: — Chay qhelli p'achata[1] ch'utiychis, nispa. Hinaspan Josueta nirqan: — Kayqa, huchaykitan qechupuyki, sumaq p'achawantaq p'achachiyki, nispa.

⁵Chaymantataq nirqan: — Ch'uya mayt'unawan umanman churaychis, nispa. Señor Diospa angelnin sayashanankamataq chaywan umanman churaykurqanku, sumaq p'achawanpas p'achaykachirqanku.

⁶Hinan Señor Diospa angelninqa Josueta nirqan:

⁷— Tukuy-atiyniyoq Señor Diosmi nin: Ñanniykunapichus purinki, kamachikusqaykunatapas hunt'ankitaqchus chayqa, qanpas yupaychana wasiypin kamachikunki, wasi patioykunatapas waqaychallankitaqmi, qanpas qayllaykamuwayta atillankitaqmi imaynan kay kamachiykunapas qayllaykamuwan hinata.

⁸Uma sacerdote Josué, uyariway. Qankuna Josuepa ñawpaqenpi tiyashaq sacerdote-masikunapas, uyarillawaychistaq. Ñoqan “Ch'ikchimuq” nisqa sutiyoq kamachiyta pusamusaq, chayraykun qankunaqa llaqtaq allin kananpaq señalkuna kankichis.

⁹¡Qhawariychis Josuepa ñawpaqenpi churasqay rumita! Kay sapallan rumiqa qanchis ladoyoqmi, ñoqa kikiymi chay rumipi thupaspa qelqasaq, huk p'unchayllapitaqmi kay suyumanta huchata qechusaq. Ñoqa Tukuy-atiyniyoq Señor Diosmi chayta nini.

¹⁰Chay p'unchaypin sapankaykichis runa-masiykichista waqyarinkichis uvas yura k'uchupipas higos sach'a k'uchupipas kuska llanthukunaykichispaq. Ñoqa Tukuy-atiyniyoq Señor Diosmi chayta nini.