Read Diospa Simin Qelqa ZACARÍAS 4 Bible Online

ZACARÍAS 4 - Diospa Simin Qelqa bible

ZACARÍAS 4

¹Ñoqawan rimaq angelmi kutimurqan, hinaspan rikch'arichiwarqan puñushaq runata rikch'achiq hina.

²Tapuykuwarqantaq: — ¿Imatan rikushanki? nispa. Hinan kutichirqani: — Qorimanta candelerotan rikushani, patanpi aceite churanayoqta. Aceite churana muyuriqpitaq qanchis lamparachakunata rikushani, sapankata mechapaq wirp'ayoqtakama.

³Candelero qayllapin iskay olivo sach'a[2] kashasqa, hukninmi pañanpi, huknintaq lloq'enpi, nispa.

⁴Huktawanmi ñoqawan rimaq angelta tapurqani: — Wiraqocháy, ¿ima ninantan chaykunaqa nin? nispa.

⁵Paytaq niwarqan: — ¿Manachu yachanki chaykunaq imachus kasqanta? nispa. Ñoqataq: — Manan yachanichu wiraqocháy, nirqani.

⁶Chaymi payqa niwarqan: — Tukuy-atiyniyoq Señor Diosmi Zorobabelta nin: Kay ruwaytaqa manan ejercitowanchu, manan runaq kallpawanchu, aswanpas Espirituywanmi tukunki.

⁷Hatunkaray orqotan: ¿Imataq qanri kanki? ninki, ñawpaqeykipin, Zorobabel, chay orqoqa pampayachisqa kanqa. Wasi perqa allin hap'iq rumita churaykushaqtiykin, runakunaqa kusisqa qaparinqaku: ¡Ima sumaqmi! ¡Ima munaymi! nispanku.

⁸Chaymantataq Señor Diosqa rimaykuwarqan:

⁹Zorobabelmi kay wasi teqsita churarqan, payllataqmi tukunqapas. Chaymi llaqtayqa yachanqa ñoqa Tukuy-atiyniyoq Señor Dios, qanta paykunaman kachasqayta.

¹⁰Wasi perqay qallariypin pisillata ruwasqata qhawarispa wakin pisicharqanku, paykunan wasita Zorobabelpa tukusqanta rikuspa kusikunqaku, nispa. Angelmi nillawarqantaq: — Chay qanchis lamparachakunaqa Señor Diospa ñawinkunan, chaykunan teqsimuyuntinta qhawashan, nispa.

¹¹Astawanmi tapuykurqani: — ¿Iman chay candeleroq pañanpi lloq'enpi kashaq iskay olivo sach'akunaqa? nispa.

¹²Tapuykullarqanitaq: — ¿Imataq chay iskay olivo k'allmari? Chaykunan iskay qori toqorokuna qayllapi kashan, chay toqorokunamantan qori color aceite lloqsin, nispa.

¹³Angelmi niwarqan: — ¿Manachu chaykunaq imachus kasqanta yachanki? nispa. Chaymi nirqani: — Manan yachanichu wiraqocháy, nispa.

¹⁴Paytaq niwarqan: — Chaykunaqa kay pachantinpa Señor Diosninta servinankupaq aceitewan hawisqa iskaynin qharikunan, nispa.