Read Diospa Simin Qelqa ZACARÍAS 6 Bible Online

ZACARÍAS 6 - Diospa Simin Qelqa bible

ZACARÍAS 6

¹Yapamanta wichayman qhawarispataq rikurqani tawa carreta iskay bronce orqo chawpimanta lloqsimushaqta.

²Ñawpaqkaq carretatan puka-ch'umpi caballokuna aysasqa, iskaykaq carretatataq yana caballokuna,

³kinsakaq carretatataq yuraq caballokuna, tawakaq carretatañataq alqa caballokuna.

⁴Chaymi ñoqawan rimaq angelta tapurqani: — Wiraqocháy, ¿imataq chaykunari? nispa.

⁵Angeltaq niwarqan: — Chaykunaqa hanaq pacha tawantin wayran, chaykunan kay pachantin kamachiq Señor Diospa ñawpaqenpi kasqankumantaña lloqsishanku.

⁶Yana caballokunaq aysasqan carretaqa wichay suyumanmi rishan, yuraq caballokunaq aysasqanpas inti haykuy suyumanmi rishan, alqa caballokunaq aysasqanpas uray suyumanmi rishan, nispa.

⁷Chay kallpasapa caballokuna lloqsimuspataq kay pachantinman phawariy-phawariyllaña sayasharqanku. Angeltaq chaykunata nirqan: — Teqsimuyuntinman phawaychis, nispa. Hinan pachantinman phawarqanku.

⁸Chaymantataq angelqa waqyaspa niwarqan: — Wichay lado suyuman riqkunaqa, chay suyupin Señor Diospa phiñakusqanta thasnunqaku, nispa.

⁹Señor Diosmi niwarqan:

¹⁰Heldaiwan, Tobiaswan, Jedaiaswan, Babiloniaman preso apasqa kasqankumantan kutimpunkuña, paykunamanta ofrendata chaskimuy, hinallataq kikin p'unchay Sofoniaspa churin Josiaspa wasinta rispa ofrendata chaskimuy.

¹¹Qolqeta qorita chaskimusqaykiwanmi coronata ruwanki, hinaspa Josadacpa churin uma sacerdote Josuepa umanman churanki.

¹²Chaymantataq payta ninki: Tukuy-atiyniyoq Señor Diosmi nin: Kayqa “Ch'ikchimusqa” sutiyoq qharin, payqa ch'ikchimuspan t'ikarinqa, hinaspan Señor Diospa wasinta wasichanqa.

¹³Paymi Señor Diospa wasinta wasichanqa, rey hina hatunchasqa kanqa. Kamachikuy tiyananpin tiyaykunqa, huk ladonpitaq sacerdotepas tiyananpi tiyaykunqa, huk sonqollataq llank'anqaku, nispa.

¹⁴Chay coronaqa Helemta, Tobiasta, Jedaiasta, Sofoniaspa churin Josiastawan yuyarinapaqmi Señor Diospa wasinpi kanqa, nispa.

¹⁵Karupi kaqkunan hamunqaku, hinaspan Señor Diospa wasinta perqaysikunqaku, chaymi yachankichis Tukuy-atiyniyoq Señor Diospa qankunaman kachamuwasqanta. Chayqa kanqa Diosniykichis Señor Diospa siminta uyarispa kasukuqtiykichismi.