Read Diospa Simin Qelqa ZACARÍAS 7 Bible Online

ZACARÍAS 7 - Diospa Simin Qelqa bible

ZACARÍAS 7

¹Rey Darío tawakaq watapiña kamachikushaqtinmi, Quisleu nisqa isqonkaq killaq tawakaq p'unchayninpi Zacariasman Señor Diosqa rimaykurqan.

²Chay pachan Betel llaqta runakunaqa Sarezerta Regem-melecta runankunatawan Tukuy-atiyniyoq Señor Diospa wasinman kacharqanku paymanta mañakamunankupaq,

³Señor Diospa wasinpi kashaq sacerdotekunata profetakunata tapukamunankupaq: ¿Wakin watakunapi ruwamusqaykuta hinachu sapa wata phisqakaq killapi waqaspa ayunashallasaqku? nispa.

⁴Hinan Tukuy-atiyniyoq Señor Diosqa niwarqan:

⁵Suyuntin runakunatapas sacerdotekunatapas tapumuy: Kay qanchis chunkantin wata phisqakaq killapipas qanchiskaq killapipas ayunaspaykichis waqaspaykichisqa, ¿ñoqallapaqchu ayunarqankichis?

⁶Mikhuspaykichispas ukyaspaykichispas, ¿manachu allinniykichispaq mikhurqankichispas ukyarqankichispas?

⁷¿Manachu qankunaqa yachankichis ñawpaq profetakunata Señor Diospa rimaykusqanta, Jerusalenpas muyuriqnin llaqtakunapas runa hunt'ataq thak-nisqataq kashaqtin, Neguev ch'inneqpas Shefela moqo-moqopas runa hunt'a kashaqtin? nispa.

⁸Señor Diosmi ñoqa Zacariasta nillawarqantaq:

⁹Ñoqa Tukuy-atiyniyoq Señor Diosmi llaqtaytaqa ñawpaqtaña nirqani: Chanintapuni juzgaychis, khuyapayanakuychis, llakipayanakuychis.

¹⁰Ama sarunchaychischu viudatapas, mana tayta-mamayoqtapas, wak llaqtayoqtapas, wakchatapas. Amataq sonqoykichispi yuyaykuychischu mana allinta runamasiykichis contra mana allin ruwayta, nispa.

¹¹Ichaqa manan kasukuyta munarqankuchu, aswanpas qheparpariwarqankun, uyariq roqt'un kapurqankupas.

¹²Sonqonkutapas ch'ila rumiman hinan tukuchirqanku yachachikuy simitapas kamachikuykunatapas mana uyarinankupaq, chaykunatan Espirituyqa ñawpa profetakunawan willachirqan. Chaymi ñoqa Tukuy-atiyniyoq Señor Diosqa sinchita phiñakurqani.

¹³Imaynan paykunaman waqyakuqtiy mana uyariwarqankuchu, chhaynatan ñoqapas waqyakamuwaqtinku mana uyarirqanichu. Ñoqa Tukuy-atiyniyoq Señor Diosmi chayta nini.

¹⁴Aswanmi mana rikusqanku llapa suyukunaman muyuq wayrawan hina paykunataqa ch'eqechirqani. Chay suyunkutaq mana pipas tiyaq kapuqtin qhepankuta purunyapurqan. ¡Chay hina sumaq suyutan purunman tukuchipurqanku! nispa.