Read Diospa Simin Qelqa ZACARÍAS 8 Bible Online

ZACARÍAS 8 - Diospa Simin Qelqa bible

ZACARÍAS 8

¹Tukuy-atiyniyoq Señor Diosmi rimaykuwaspa niwarqan:

²Tukuy-atiyniyoq Señor Diosmi nin: Sionmantan sinchitapuni sienteni, rawrashaq sonqoywanmi chay llaqtamanta sienteni.

³Sionmanmi kutipusaq, hinaspan Jerusalén ukhupi tiyasaq. Hinan Jerusalenqa “Cheqaq kaqpa kanan Llaqta” nisqa kanqa, Ñoqa Tukuy-atiyniyoq Señor Diospa orqoypas “Ch'uya Orqo” nisqan kanqa.

⁴Tukuy-atiyniyoq Señor Diosmi nin: Jerusalén plazakunapiqa tiyaykunqakuraqmi tawna hap'intin askhallaña watayoq machu qharikunapas paya warmikunapas.

⁵Qhari wawakunan, warmi wawakunan llaqta callekunaman hunt'aykunqa, hinaspan chaykunapi pukllanqaku.

⁶Tukuy-atiyniyoq Señor Diosmi nin: Chay p'unchaykunapin llaqtaymanta puchuq runakunapaq kaykunaqa musphanapaq kanqa, ñoqapaqmi ichaqa mana utirayanapaqchu kanqa. Ñoqa Tukuy-atiyniyoq Señor Diosmi chayta nini.

⁷Tukuy-atiyniyoq Señor Diosmi nin: llaqtaytan qespichimusaq inti lloqsimuy lado suyumanta, inti haykuy lado suyumantawan.

⁸Hinaspan paykunata pusamusaq, chaymi Jerusalén ukhupi tiyanqaku. Paykunan llaqtay kanqaku, ñoqataq Diosninku kasaq, hunt'aspan chaninchaspan paykunata kamachisaq, nispa.

⁹Tukuy-atiyniyoq Señor Diosmi nin: Yupaychana wasiyta teqsichayta qallarisqa p'unchaykunapin profetakuna llaqtaman rimaykurqan, kunanpas qankunaqa kaq simillatataqmi uyarishankichis, chayrayku kallpachakuychis.

¹⁰Manaraq teqsichayta qallarishaqtinkun runamanpas uywamanpas mana imatapas qorqankuchu. Awqaq manchachisqanmi mana thak-kay karqanchu, haykuq runapaqpas, lloqsiq runapaqpas, ñoqa llapan runakunata awqanachisqayrayku.

¹¹Kunanqa kay llaqtamanta puchuq runakunataqa manan ñawpa p'unchaykuna hinachu rikusaq. Ñoqa Tukuy-atiyniyoq Señor Diosmi chayta nini.

¹²Muhuta tarpunapaqmi allin p'unchaykuna kanqa, uvas chakrakunapas rurunqan, hallp'apas ruruchinqan, hanaqmantapas paramunqan. Kay llaqtamanta puchuq runakunamantaqmi tukuy kaykunata hap'inankupaq qosaq.

¹³Yaw, Judá runakuna, Israel runakuna, imaynan suyukuna ukhupi ñakasqa karqankichis, ahinatan kunan qespichisqaykichis, chaymi hukkunapaq samincha kankichis. Chayrayku, ama manchapakuychischu, aswanpas kallpachakuychis.

¹⁴Tukuy-atiyniyoq Señor Diosmi nin: Ñawpa taytaykichis k'arakta phiñachiwaqtinmi, mana khuyapayaspa qankunata mana allin ruwayta yuyaykurqani. Ñoqa Tukuy-atiyniyoq Señor Diosmi chayta nini.

¹⁵Kunanmi ichaqa Jerusalenpaqpas Judá suyupaqpas allinkaqta ruwayta yuyaykuni. Chayrayku ama manchapakuychischu.

¹⁶Kaykunatan ruwanaykichispuniqa: Sapanka runa-masiykichiswan cheqaqkaqta rimaychis, juzganaykichiskunapi chaninninpi juzgaychis, juzganaykichiskunapi chaninchaychis sumaqta kawsachinapaq.

¹⁷Ama mana allinkaqta ruwanakunaykichispaqqa sonqoykichispi yuyaykuychischu, amallataq llulla juramentotapas ruwaychischu, tukuy chaykunataqa cheqnikunin, nispa.

¹⁸Tukuy-atiyniyoq Señor Diosmi huktawan niwarqan:

¹⁹Judá runakunapaqqa tawakaq killa ayunopas, phisqakaq killa ayunopas, qanchiskaq killa ayunopas, chunkakaq killa ayunopas q'ochukuymanmi, kusikuymanmi, kusikuy fiestakunamanmi tukupunqa. ¡Munakuychis cheqaq-kaytapas thak-kaytapas! nispa.

²⁰Tukuy-atiyniyoq Señor Diosmi nillawarqantaq: Jerusalenmanqa hamunqaraqmi askha llaqta runakuna, hatuchaq llaqtakunapi tiyaqkunapas.

²¹Hinan huk llaqtapi tiyaqkunapas hukkaq llaqtaman rispa ninqaku: Haku Señor Diosmanta mañakamuq, Tukuy-atiyniyoq Señor Diosta yupaychamuq. ¡Ñoqapas risaqmi! nispa.

²²Chaymi askha llaqtakuna atiyniyoq hatun suyukunapas Jerusalenman hamunqaku ñoqa Tukuy-atiyniyoq Señor Diosta yupaychawanankupaq mañakamuwanankupaqwan.

²³Chay p'unchaykunapin suyukunapi kaq imaymana rimay rimaqkunamanta chunka runa huk judío runata capanmanta qaqata hap'iykuspa ninqa: Ñoqaykun uyariyku qankunawan Dios kashasqanta, chayrayku pusakapuwayku, nispanku.