Read Diospa Simin Qelqa MALAQUÍAS 2 Bible Online

MALAQUÍAS 2 - Diospa Simin Qelqa bible

MALAQUÍAS 2

¹Tukuy-atiyniyoq Señor Diosmi nin: Yaw, sacerdotekuna, kay simiwanmi qankunata anyaykuykichis.

²Qankunaqa manachus maki uyariwankichis, manachus tukuy sonqo yuyaykukuspa yupaychawankichis chayqa, ñakasqaykichismi, saminchasqa kanaykichismantaqa ñakasqan kapunkichis. Runakunaq qankunaman apamusqantaqa ñakaniñan, manan qankunaqa tukuy sonqo yuyaykukuspachu yupaychawankichis.

³Chayraykun mirayniykichista muchuchisaq. Fiestapi sacrificanapaq apamusqaykichis animalkunaq phusnuntan uyaykichisman hich'aykusqaykichis. Qankunapas phusnuwan kuskan picharparisqa kapunkichis.

⁴Chaymi yachankichis ñoqa kay simiwan anyaykusqayta, Leví ayllu sacerdotekunawan rimanakusqay mana p'akisqa kananpaq. Ñoqa Tukuy-atiyniyoq Señor Diosmi chayta nini.

⁵Leví aylluwan rimanakuspayqa kawsayta, thak-kayta qonaypaqmi prometekurqani, chaykunatan paykunaman qorqani manchakuwanankupaq. Chaypachan paykunaqa manchakuwarqanku k'umuykamuwarqanku.

⁶Kamachisqay simitan cheqaqta paykunaqa yachachirqanku, manataqmi mana allinkaqtaqa rimarqankuchu. Sumaqtan chanintan ñoqawan kawsarqanku, askhatataqmi mana chanin ruwaymanta t'aqachirqanku.

⁷Sacerdotekunaqa allin yachaywanmi rimananku, ñoqata reqsiwanankupaqtaq yachachinanku, munayniyman hina kawsayta yachaqanankupaq, paykunaqa ñoqa Tukuy-atiyniyoq Señor Diospa willaqniykunan kanku.

⁸Qankunan ichaqa allin ñanmanta t'aqakapurqankichis. Yachachisqaykichiswanmi askha runata misk'achirqankichis. Chhaynapin Leví aylluwan rimanakusqayta waqllichirqankichis. Ñoqa Tukuy-atiyniyoq Señor Diosmi chayta nini.

⁹Manan kasuwarqankichischu, llaqtaman kamachikuy simita yachachishaspaykichispas manan llapa runatachu allinpaq hap'irqankichis, chaymi ñoqapas llapa runawan pisichachirqaykichis qhawarparichirqaykichis, nispa.

¹⁰¿Manachu llapanchis huk taytallayoq kanchis? ¿Manachu huk Dioslla kamawarqanchis? ¿Imanaqtintaq simi kacharisqanchista mana hunt'anchischu, ñawpa taytanchiskunaq Dioswan rimanakusqanta sarunchaspa?

¹¹Israel suyupi Jerusalén llaqtapi millay-millayta ruwaspan Judá aylluqa Diosman prometekusqanta p'akirqan. Judá runakunan wak dioskuna yupaychaq warmikunawan casarakuspa, Señor Diospa munakusqan ch'uya wasinta qhellicharqan.

¹²Señor Diosmi chay hina ruwaq runataqa Jacobpa ayllunmanta wikch'unqa, pipas kakuchun, Tukuy-atiyniyoq Señor Diosman ofrenda haywaqpas kakuchun.

¹³Qankunaqa manan chayllataraqchu ruwankichis. Señor Diospa altarnintan anchata waqapayankichis, khuyaytapunin waqaykunkichis ofrendasqaykichista Señor Dios manaña kusisqachu chaskisqasuykichisrayku.

¹⁴Ninkichisraqtaq: ¿Imanaqtinmi manaña chaskiwanchischu? nispa. Qanmi wayna kashaspa casarakuq-masiyki warmiman prometesqaykita mana hunt'arqankichu, chaymi Señor Diosqa mana chaskisunkichu. Payqa warmiykin karqan, paywanmi Diospa qayllanpi rimanakurqanki.

¹⁵¿Manachu Diosqa iskayniykichista hukllaman tukuchirqasunkichis cuerpontinta espirituntinta? Chayta ruwaspari, ¿imatataq Diosri munarqan? Dios sonqo wawayoq kanaykichistan munarqan. Nispaqa, sonqoykichista waqaychakuychis, amataq wayna kashaspa casarakusqaykichis warmitapas wasanchaychischu.

¹⁶Israelpa Tukuy-atiyniyoq Señor Diosninmi nin: Ñoqaqa cheqnikunin t'aqanakuytaqa, huk qhari warminta chay hinata ñak'arichiqtinqa. Chhaynaqa, sonqoykichista waqaychakuychis, amataq chay hina mana hunt'aqchu kaychis, nispa.

¹⁷Simiykichiswanmi Señor Diosta sayk'uchirqankichis. Ninkichisraqtaq: ¿Imawantaq paytari sayk'uchirqayku? nispa. Qankunaqa sayk'uchirqankichis: Señor Diosqa pipas mana allinkaqta ruwaqtan allinpaq hap'in, paykunawanmi kusikun, nispa. Hinallataq ninkichis: ¿Maytaq chaninkaqta ruwaq Diosri? nispa.