Read Diospa Simin Qelqa MALAQUÍAS 3 Bible Online

MALAQUÍAS 3 - Diospa Simin Qelqa bible

MALAQUÍAS 3

¹Chaymi Tukuy-atiyniyoq Señor Diosqa nin: Ñoqamanta willakuqtan ñawpaqta kachamusaq, paymi ñanta wakichipuwanqa. Maskhashasqaykichis Señor Diosqa ñoqan kani, qonqayllan yupaychana wasiyman chayamusaq. Qankunan munaykushankichis rimanakusqayta willakuq kachamunayta, payqa hamushanñan, nispa. Ñoqa Tukuy-atiyniyoq Señor Diosmi chayta nini.

²¿Pitaq Señor Diospa hamunan p'unchayta aguantanman? Chayri, ¿pitaq pay rikhurimuqtin sayayta atinman? Payqa ch'uyayachiq nina hinan, t'aqsaqkunaq lejian hinan.

³Paymi Levipa mirayninkunata ch'uyayachinanpaq tiyaykunqa, imaynan qolqetapas qoritapas ch'uyayachinku hinatan paykunata ch'uyayachinqa. Chayraqmi paykunaqa Señor Diosman ofrendakunata haywanqaku imaynan haywanankuta hinapuni.

⁴Chaymi Señor Diosqa Judá aylluq Jerusalén llaqtaq ofrendankunata chaskinqa, imaynan ñawpa p'unchaykuna chaskirqan hinata.

⁵Tukuy-atiyniyoq Señor Diosmi nin: Ñoqan qankunata juzgaq hamusaq. Hinallataqmi allin testigo kasaq layqakuna contra, wasanchaqkuna contra, llullakuspa juraqkuna contra, llank'apakuqninkuq pagonta suwakuqkuna contra, viudakunatapas, mana tayta-mamayoqkunatapas sarunchaqkuna contra, wak llaqtayoqkunapaqpas mana chaninchapuqkuna contra ima. Paykunaqa llapallanmi mana manchakuwankuchu.

⁶Ñoqaqa Señor Diosmi kani, kaqllapunin kashani. Chaymi Jacobpa mirayninkuna mana ch'usaqyachisqachu kankichis.

⁷Ñawpa taytaykichispa p'unchayninkunamantapachan kamachisqay simikunamanta t'aqakushallankichispuni, manataq kamachikusqaykunata kasuyta munashankichischu. Kutirikamuwaychis, ñoqapas kutirimullasqaykichistaqmi. Qankunataq ninkichis: ¿Imaynatataq kutirikamusqaykiku? nispa.

⁸Tapuykuykichismi: Runari, ¿Diosmanta suwakunmanchu? Manan riki. Chaypas qankunaqa suwakuwankichismi. Ninkichisraqtaq: ¿Imatataq suwakushaykiku? nispa. Suwakushawankichisqa diezmokunatapas ofrendakunatapas mana qowaspaykichismi.

⁹Arí, llapallaykichismi, suyuntin runakuna suwakushawankichis, chaymi ñakasqaykichis.

¹⁰Diezmoykichista llapallanta taqeyman apamuychis, wasiypi mikhuna kananpaq. Chaywan probaykuwaychis, ahinapin yachankichis hanaq pacha ventanakunata kicharispa saminchata llimp'arishaqta hich'aykamusqaykichischus icha manachus chayta. Ñoqa Tukuy-atiyniyoq Señor Diosmi chayta nini.

¹¹Q'aruq langostatapas phiñarisaqmi chakra ruruta mana mikhurparinankupaq. Uvas chakraykichispas allintan rurunqa. Ñoqa Tukuy-atiyniyoq Señor Diosmi chayta nini.

¹²Hallp'aykichismi munapayana kanqa, chaymi llapa suyukunaqa nisunkichis: Kusisamiyoqmi kankichis, nispa. Ñoqa Tukuy-atiyniyoq Señor Diosmi chayta nini.

¹³Señor Diosmi nin: Ñoqa contran k'arak simikunata rimarqankichis. Ninkichisraqtaq: ¿Imatan contraykita rimarqayku? nispa.

¹⁴Kaytan nirqankichis: Yanqan Dios serviyqa. ¿Ima allinninchispaqtaq kamachikusqanta hunt'ayninchisqa? ¿Ima allinninchispaqtaq Tukuy-atiyniyoq Señor Diospa qayllanpi huchanchismanta llakisqa puriyninchispas?

¹⁵Uma hoqariqkunaqa kusisamiyoqmi kanku. Millay runakunaqa tukuy imapin allillanpuni kanku, Diostapas wateqankun, manataq ima mana allintapas muchunkuchu, nispaykichis.

¹⁶Chaypachan Señor Diosta manchakuqkunaqa paykunapura ninakurqanku, chaytan Señor Diosqa maki uyarispa yacharqan. Señor Diospa ñawpaqenpitaq huk libropi qelqasqa karqan, Señor Diosta manchakuspa yupaychaqkunaq sutinkuta yuyarinapaq.

¹⁷Tukuy-atiyniyoq Señor Diosmi nin: Ñoqaq unanchasqay p'unchaymi paykunaqa aswan chaniyoq llaqtay kanqaku. Imaynan taytaqa kamachin ruwaq churinta khuyapayan, chay hinatan ñoqapas paykunata khuyapayaspa mana muchuchisaqchu.

¹⁸Hinaqtinmi qankunaqa wakmanta reparankichis allin runaq millay runaq imaynachus kasqanta, pichus ñoqata serviq, pitaqchus ñoqata mana serviq kasqantapas.