Read Diospa Simin Qelqa MATEO 15 Bible Online

MATEO 15 - Diospa Simin Qelqa bible

MATEO 15

¹Kamachikuy simita wakin yachachiqkunan fariseokunapiwan Jerusalén llaqtamanta hamuspa Jesusman qayllaykuspa tapurqanku:

²— ¿Imaraykun yachachisqaykikunaqa ñawpa runakunaq yachachisqan simita p'akinku? Paykunaqa manan makinkuta mayllikunkuchu mikhunankupaq, nispa.

³Chaymi Jesusqa paykunata tapurqan: — Qankunapas, ¿imaraykun Diospa kamachikuyninta p'akinkichis, ñawpa runakunaq yachachisqanta ruwaspaykichis?

⁴Diosmi kamachikurqan: “Taytaykita mamaykita respetanki”, nispa. Kamachikullarqantaqmi: “Pipas taytantapas mamantapas ñakaqqa wañuchunpuni”, nispa.

⁵Qankunataq ninkichis: Pipas taytantapas mamantapas ninman: Lliw imachus qanman qonay karqan chaytan Diosman ofrendata qopuni niqqa,

⁶manan taytantapas mamantapas yanapanqañachu, nispaykichis. Chay hinatan ñawpa runakunaq yachachisqanta ruwaspa Diospa kamachikuyninta p'akinkichis.

⁷¡Iskay uyakuna! Allintamá qankunamanta profeta Isaiasqa nisqa:

⁸“Kay runakunaqa simillanwanmi yupaychawan, sonqonkutaq ichaqa ñoqamanta karupi kashan.

⁹Yanqanpaqmi yupaychawanku, yachachikuyninkupas runaq yachachikuynillanmi”, nispa.

¹⁰Hinaspan Jesusqa runakunata qayllanman waqyaspa nirqan: — Uyariychis, hinaspa entiendeychis:

¹¹Manan imapas mikhusqanchu runataqa huchallichin, aswanpas mana allinta yuyaykuspa rimasqanmi runataqa huchallichin, nispa.

¹²Hinan yachachisqankunaqa Jesusman asuykuspa nirqanku: — ¿Yachankichu fariseokunaqa chay rimasqaykita uyarispa phiñakusqankuta? nispa.

¹³Jesustaq nirqan: — Ima yurapas hanaq pacha Yayaypa mana tarpusqanqa t'irasqan kanqa.

¹⁴Hina kashachun paykunaqa, ñawsata pusaqkunaqa ñawsallataqmi kanku. Ñawsapura pusanakuspaqa, iskayninkun t'oqoman urmaykunqaku, nispa.

¹⁵Hinan Pedroqa Jesusta nirqan: — Chay rikch'anachiy simita sut'inchawayku, nispa.

¹⁶Chaymi Jesusqa nirqan: — ¿Qankunapas manachu entiendenkichis?

¹⁷¿Manachu reparankichis ima mikhusqapas wiksaman haykusqanta, hinaspa hisp'anaman lloqsipusqanta?

¹⁸Millay rimasqakunan ichaqa sonqomanta lloqsimuspa runataqa huchallichin.

¹⁹Runaq sonqonmantan lloqsimun mana allin yuyaykuna, runa wañuchiykuna, wasanchaykuna, qhelli huchapi puriykuna, suwakuykuna, yanqa tumpakuykuna, millay k'amikuykuna.

²⁰Chaykunan runataqa huchallichin, mana mayllisqa makiwan mikhuyqa manan runataqa huchallichinchu, nispa.

²¹Chaymanta puririspataq Jesusqa rirqan Tiro ladoman, Sidón ladomanwan.

²²Hinan chay ladomanta mana judía warmi hamuspa Jesusta waqyakurqan: — ¡Señor, Davidpa churin, khuyapayaykuway! Ususiytan sinchita supay ñak'arichishan, nispa.

²³Jesustaq ichaqa mana imanirqanpaschu. Chaymi yachachisqankunaqa payman asuykuspa rogakurqanku: — Qhepanchistan waqyakuspa hamushan, kachapuy ripunanpaq, nispa.

²⁴Chaymi Jesusqa nirqan: — Israel suyumanta chinkasqa ovejakunallamanmi Yayayqa kachamuwan, nispa.

²⁵Hinan warmiqa Jesuspa ñawpaqenpi k'umuykukuspa nirqan: — ¡Señor, yanapaykullaway! nispa.

²⁶Jesustaq nirqan: — Manan allinchu wawakunaq t'antanta qechuspa alqokunaman[10] qaraykuyqa, nispa.

²⁷Hinan warmiqa nirqan: — Arí, Señor. Chaywanpas alqokunaqa uywaqninkuq mesanmanta usuqkunataqa mikhunmi, nispa.

²⁸Hinaqtinmi Jesusqa nirqan: — ¡Ususíy, ancha hatunmi iñiyniyki! Munasqaykiman hina ruwasqa kachun, nispa. Chay ratopachan ususinqa qhaliyarqapurqan.

²⁹Chaymanta ripuspataq Jesusqa Galilea qocha pataman chayarqan, hinaspan orqota wicharispa chaypi tiyaykurqan.

³⁰Askha runakunan Jesusman rirqanku, wist'ukunata, ñawsakunata, upakunata, ñuk'ukunata, wak askha onqosqakunatawan pusaspanku. Hinaspan Jesuspa ñawpaqenman qayllaykachirqanku, hinan Jesusqa paykunata qhaliyachirqan.

³¹Chaymi runakunaqa muspharqanku, upakuna rimariqtin, ñuk'ukuna haywariqtin, wist'ukuna puririqtin, ñawsakuna qhawariqtin. Hinaspan Israelpa Diosninta hatuncharqanku.

³²Jesusmi yachachisqankunata waqyaspa nirqan: — Kay runakunatan khuyapayani, kinsa p'unchayñan ñoqawan kashanku, manataqmi mikhunankupaq imapas kanchu. Manan yarqasqataqa wasinkuman kachapuymanchu, ñanpichá pisipankuman, nispa.

³³Hinaqtinmi yachachisqankunaqa Jesusta nirqanku: — ¿Maymantan askha t'antata tariykuman kay ch'inneqpi askha runakunaman saksachinaykupaq? nispa.

³⁴Jesustaq paykunata nirqan: — ¿Hayk'ataq t'antaykichisqa kashan? nispa. Paykunataq nirqanku: — Qanchisllan kashan pisi challwachakunallapiwan, nispa.

³⁵Chaymi Jesusqa runakunata kamachirqan pampapi tiyaykunankupaq.

³⁶Chay qanchis t'antata, challwachakunatawan hap'iykuspataq Diosman graciasta qospa phasmirqan, hinaspan yachachisqankunaman qorqan runakunaman rakimunankupaq.

³⁷Hinan llapanku mikhurqanku saksaykunankukama. Puchuq p'akikunatataq qanchis canasta hunt'ata hoqarirqanku.

³⁸Mikhuqkunaqa tawa waranqa qharikunan karqan, warmikunapas wawakunapas manan yupasqachu karqan.

³⁹Chay qhepatataq Jesusqa runakunata kacharparipurqan, boteman haykuspataq Magadán hap'iyman ripurqan.