Read Diospa Simin Qelqa MATEO 24 Bible Online

MATEO 24 - Diospa Simin Qelqa bible

MATEO 24

¹Dios yupaychana wasimanta lloqsispataq Jesusqa ripusharqan, hinan yachachisqankunaqa payman asuykuspanku, Dios yupaychana wasikunata payman qhawachirqanku.

²Jesustaq paykunata nirqan: — ¿Rikushankichischu lliw kaykunata? Cheqaqtan niykichis, manan kaypiqa rumi patapi huk rumillapas qhepanqachu, llapanmi thunisqa kanqa, nispa.

³Olivos orqopi Jesús tiyaykuqtintaq yachachisqankunaqa sapaqllapi payman asuykuspa tapurqanku: — Niwayku, ¿hayk'aqtaq chaykunaqa kanqa? Kutimunaykiña kashaqtinqa kay tiempopas p'uchukapunanpaqña kashaqtinqa, ¿imakunatan rikusaqku? nispa.

⁴Jesustaq paykunata nirqan: — Cuidakuychis, paqtataq pipas pantachisunkichisman.

⁵Askhan sutiywan sutichakuspa hamunqaku: Ñoqan Cristoqa kani, nispa. Hinaspan askhata pantachinqaku.

⁶Awqa-tinkuykunamanta, ch'aqwaykunamantawan rimaytan uyarinkichis, ichaqa aman mancharikunkichischu, lliw chaykunaqa hinapunin kanan, chaywanpas manaraqmi p'uchukaychu.

⁷Llaqtakunan huk llaqtakuna contra maqanakunqa, suyukunapas suyukuna contran sayarinqa. Kallanqataqmi askha cheqaskunapi yarqaypas pacha chhaphchiykunapas.

⁸Tukuy chaykunaqa nanay qallariyllaraqmi.

⁹Chay p'unchaykunapin ñak'arichinasuykichispaq kamachikuqkunaman hap'iykachisunkichis, hinaspan wañuchisunkichis. Ñoqaraykun lliw llaqtakuna cheqnikusunkichis.

¹⁰Chay p'unchaykunaqa askhan ñoqapi manaña iñipunqakuchu, cheqninakuspataq paykunapura kamachikuqkunaman hap'iykachinakunqaku.

¹¹Askha llulla profetakunan rikhurimunqaku, hinaspan askha runata pantachinqaku.

¹²Mana allin ruwaqkuna sinchita askhayaqtinmi manaña askha runa munanakapunqakuchu.

¹³Ichaqa pipas p'uchukaykama qaqata sayaqmi qespichisqa kanqa.

¹⁴Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p'uchukayqa chayamunqa.

¹⁵Profeta Danielmi qelqarqan Diospa millakusqan qhellichaq runamanta, Dios yupaychana wasipi chay qhellichaqta rikuqtiykichisqa, (kayta leeqqa entiendichun)

¹⁶Judea hap'iypi kaqkuna orqokunaman ayqechunku.

¹⁷Wasi patapi kaqpas ama uraykuchunchu wasinmanta imatapas horqomunanpaq.

¹⁸Campopi kaqpas ama wasinman kutichunchu p'achankunata apananpaq.

¹⁹¡Ay, chay p'unchaykunapi wiksallikuqkunamanta! ¡Ay, ñuñuq wawayoq warmikunamantapas!

²⁰Diosmanta mañakuychis chaykuna ama paray tiempopipas samana p'unchaypipas kananpaq.

²¹Chay p'unchaykunaqa manchay ñak'ariymi kanqa, chay hinaqa manan hayk'aqpas kay pacha qallariymantapacha kunankama karqanchu, manataqmi kanqapaschu.

²²Chay p'unchaykunatachus Diosqa mana pisiyachinmanchu karqan chayqa, manan pipas qespichisqachu kanman. Ichaqa, akllakusqankunaraykun chay p'unchaykunata pisiyachinqa.

²³Pipas nisunkichisman: “¡Qhawariychis, kaypin Cristoqa kashan!, otaq ¡qhawariychis, haqaypin Cristoqa kashan!” nispa chayqa, aman creenkichischu.

²⁴Llulla cristokunan llulla profetakunan rikhurimunqaku, hinaspan musphay señalkunatapas milagrokunatapas ruwanqaku, ahinapi atispaqa Diospa akllakusqankunatapas pantachinankupaq.

²⁵Chaykunataqa ñawpaqmantañan willashaykichis.

²⁶Chayrayku: “Qhawariychis, ch'inneqpin kashan” nisunkichis chayqa, aman lloqsinkichischu. Otaq “Qhawariychis, chay wasi ukhupin kashan” nisunkichis chaypas, aman creenkichischu.

²⁷Imaynan lliphllikiyqa inti lloqsimuymanta lliphllikispa inti haykuykama k'ancharin, chay hinallatataqmi Runaq Churinpas hamunqa.

²⁸Maypichus wañusqa kashanqa, chaymanmi kunturkunapas huñukunqaku, nispa.

²⁹Jesusqa nillarqantaqmi: — Chay ñak'ariy p'unchaykuna pasaqtin hinan inti tutayanqa, killapas mana k'anchanqachu, qoyllurkunapas cielomanta t'akakamunqa, hanaq pachapi ch'askakunapas chhaphchirisqan kanqa.

³⁰Hinaqtinmi Runaq Churinta hanaq pachamanta hamushaqta rikunqaku, chaymi kay pachapi llapa runakuna khuyayta waqaykunqaku. Runaq Churintan rikunqaku hatun atiywan lliphlli-kaywan phuyupi hamushaqta.

³¹Paytaqmi angelninkunata kachamunqa trompetata sinchita tocaqtinku teqsimuyuntinmanta akllakusqankunata huñumunankupaq.

³²Higos sach'amanta kay yachachikuyta yachaychis: K'allman q'omeryamuqtin, raphinkunapas ch'ikchirimuqtinmi yachankichis poqoy tiempo qayllamushasqanta.

³³Chay hinallataq qankunapas tukuy chaykunata rikuspaykichisqa, yachaychis tiempoqa qayllallapiña kashasqanta.

³⁴Cheqaqtan niykichis, manan kay mirayqa tukukunqachu lliw chaykuna hunt'akunankama.

³⁵Hanaq pachapas kay pachapas tukukunqan, simiykunan ichaqa kashallanqapuni.

³⁶Chay p'unchayta chay horatawanmi ichaqa mana pipas yachanchu, manallataq hanaq pachapi kaq angelkunapas, Churipas, aswanpas Yayallan yachan.

³⁷Imaynan Noepa p'unchayninkunapi karqan, chay hinallataqmi Runaq Churin hamuqtinpas kanqa.

³⁸Runakunata manaraq unu millp'ushaqtinmi, mikhusharqanku, ukyasharqanku, casarakusharqanku, casaranankupaq rimanakusharqanku Noepa arcaman haykusqan p'unchaykama,

³⁹manataq imatapas repararqankuchu millp'uq unu chayamuspa llapanta millp'unankama. Chay hinallataqmi Runaq Churin hamuqtinpas kanqa.

⁴⁰Campopin iskay runa kashanqaku, hukninmi apasqa kanqa, huknintaq saqesqa.

⁴¹Iskay warmin maranpi kutashanqaku, hukninmi apasqa kanqa, huknintaq saqesqa.

⁴²Makilla kashaychis, manan yachankichischu ima horatachus Señorniykichispa kutimunanta.

⁴³Kayta yachaychis, wasiyoq runachus yachanman ima hora tutatachus suwa hamunanta chayqa, rikch'anmanmi manataq wasinta suwachinmanchu.

⁴⁴Runaq Churinqa hamunqa mana yachasqaykichis horatan, chayrayku qankunapas makilla kashaychis, nispa.

⁴⁵Jesusqa nillarqantaqmi: — Allin yuyayniyoq hunt'aq kamachi hina kaychis. Paytan patronninqa wasinpi kaqkunata kamachinanpaq churarqan, tiempollanpi kamachinkunaman mikhunatapas qonanpaqwan.

⁴⁶Chay kamachiqa kusisamiyoqmi patronnin kutimuspa chay hina ruwashaqta payta tariqtinqa.

⁴⁷Cheqaqtan niykichis, paytan patronninqa churanqa tukuy kaqninkunata qhawananpaq.

⁴⁸Ichaqa chay kamachi millay kanman chayqa, sonqonpin ninman: Manaraqmi patronniyqa kutimunqachu, nispa.

⁴⁹Hinaspa kamachi-masinkunata maqayta qallarinman, machaqkunawantaq mikhunmanpas ukyanmanpas chayqa,

⁵⁰chay kamachiq patronninqa kutimunqa mana suyasqan p'unchaypin, mana yachasqan horapin.

⁵¹Hinaspan sinchita payta muchuchinqa, iskay uyakunatawantaq churanqa, chaypin waqaypas kiru k'achachachaypas kanqa, nispa.