Read Diospa Simin Qelqa MATEO 4 Bible Online

MATEO 4 - Diospa Simin Qelqa bible

MATEO 4

¹Chaymantataq Diospa Espiritunqa ch'inneqman Jesusta pusarikurqan, payta saqra wateqananpaq.

²Tawa chunka p'unchayta, tawa chunka tutatawan ayunaspañataq yarqachikurqan.

³Satanastaq Jesusman asuykuspa nirqan: — Diospa Churinchus kanki chayqa, kay rumikunata niy t'antaman tukunanpaq, nispa.

⁴Jesustaq ichaqa nirqan: — Diospa Simin Qelqan nin: “Manan t'antallawanchu runaqa kawsanqa, aswanpas Diospa llapa siminwanmi”, nispa.

⁵Hinan saqraqa Jerusalén llaqtaman Jesusta pusarqan, hinaspan Dios yupaychana wasi pataman sayaykachispa

⁶payta nirqan: — Diospa Churinchus kanki chayqa, kay ukhuman saltaykuy Diospa Simin Qelqan nin, “Qanraykun angelninkunata kachamunqa, chaymi qanta makinkupi hap'isunkiku ama rumipi chakiykita k'irikunaykipaq”, nispa.

⁷Jesustaq nirqan: — Diospa Simin Qelqaqa nillantaqmi, “Aman Señor Diosniykita wateqankichu”, nispa.

⁸Saqrataq wakmanta Jesusta pusarqan huk hatun orqo pataman, hinaspan kay pacha lliw suyukunata lliw hatun-atiyninkunatawan qhawarichispa

⁹Jesusta nirqan: — Qonqoriykukuspachus yupaychawanki chayqa, lliw kaykunatan qopusqayki, nispa.

¹⁰Hinaqtinmi Jesusqa nirqan: — Anchhuriy, Satanás, Diospa Simin Qelqan nin, “Señor Diosniykitan yupaychanki, pay sapallantataqmi servinkipas”, nispa.

¹¹Hinan saqraqa paymanta t'aqarikapurqan. Angelkunataq hamuspa Jesusta servirqanku.

¹²Jesusmi Juanpa preso kasqanta uyarispa Galilea provinciaman kutipurqan.

¹³Nazaret llaqtamantan Zabulón ayllu, Neftalí ayllu hallp'a qorpapi qocha pata Capernaúm llaqtaman tiyaq rirqan.

¹⁴Chay hinapin profeta Isaiaspa nisqanta hunt'arqan. Paymi nirqan:

¹⁵“Zabulón hallp'a, Neftalí hallp'a, lamar-qochaman riq ñan, Jordán mayu inti lloqsimuy lado hallp'a, mana judío runakunaq tiyanan Galilea hallp'a.

¹⁶Tutayaqpi purishaq llaqtan huk hatun k'anchayta rikurqan, manchay tutayaq pachapi tiyaq runakunatan huk k'anchay k'anchaykurqan”, nispa.

¹⁷Chaymantapachan Jesusqa willayta qallarirqan: — Huchaykichista saqepuspa Diosman kutirikuychis, hanaq pacha qhapaqsuyun sispaykamunña, nispa.

¹⁸Galilea qocha patanta purishaspataq Jesusqa rikurqan iskay wawqeta, Pedro sutiyoq Simonta, wawqen Andrestawan. Paykunaqa challwaqkunan karqanku, chaymi challwa hap'inanku llikata qochaman wikch'uykusharqanku.

¹⁹Hinan paykunata nirqan: — Qhepayta hamuychis, runakuna challwaytan yachachisqaykichis, nispa.

²⁰Chaymi paykunaqa llikankuta saqerparispa Jesuspa qhepanta ripurqanku.

²¹Chaymanta rishaspataq wak iskay wawqetawan rikurqan, Zebedeoq churinkunata Jacobota wawqen Juantawan. Paykunaqa taytankupiwanmi botepi llikankuta allichasharqanku. Hinan paykunata waqyarqan.

²²Chaymi paykunaqa botenkuta taytankutawan saqerparispa Jesuspa qhepanta ripurqanku.

²³Jesustaq Galileantinta purirqan sinagogakunapi yachachispa, Diospa qhapaqsuyunmanta allin willakuykunata willaspa, llapa onqoyniyoq, nanayniyoq runakunata qhaliyachispa.

²⁴Chaymi Siria[2] provinciantinpi Jesusmanta uyarikurqan, hinan payman apamurqanku nanayniyoqkunatapas, imaymananiraq onqoypi ñak'ariqkunatapas, supaypa ñak'arichisqankunatapas, t'uku onqoyniyoqkunatapas, such'ukunatapas, Jesustaq paykunata qhaliyachirqankama.

²⁵Askha runan Jesuspa qhepanta purirqanku: Galileamanta, Decápolis llaqtamanta, Jerusalenmanta, Judeamanta, Jordán mayu inti lloqsimuy ladomantawan.