Read Diospa Simin Qelqa MATEO 6 Bible Online

MATEO 6 - Diospa Simin Qelqa bible

MATEO 6

¹Jesusqa nillarqantaqmi: — Ama runakunaq rikunallanpaqchu allintaqa ruwaychis, mana chayqa hanaq pachapi kaq Yayaykichisqa manan premiota qosunkichischu.

²Chay hinaqa, mana imayoqta yanapashaspaykiqa, ama llapa runamanraqchu willakuy, imaynan iskay uyakuna sinagogakunapipas, callekunapipas ruwanku hinataqa, runakunaq allin nisqan kanankupaq. Cheqaqtan niykichis, chay runakunaqa premioyoqñan kanku.

³Aswanpas mana imayoqta yanapashaqtiykiqa, amapuni piniykipas chayta yachachunchu.

⁴Chay hinapin mana imayoqta yanapasqaykita mana pipas yachanqachu. Hinan pakallapi ruwasqaykita rikuq Yayayki kutichipusunki, nispa.

⁵Jesusqa nillarqantaqmi: — Diosmanta mañakushaspaykichisqa, aman iskay uyakuna hinachu kankichis, paykunaqa sinagogakunapipas, calle esquinakunapipas sayaykuspan mañakunku, runakunaq rikusqan kanankupaq. Cheqaqtan niykichis, paykunaqa premioyoqñan kanku.

⁶Qan ichaqa, mañakunaykipaqqa wasiykiman haykuy, hinaspa punkuykita wisq'aykukuspa, mana rikuna Yayaykimanta mañakuy, hinan pakallapi ruwasqaykita rikuq Yayayki sut'ipi kutichipusunki.

⁷Mañakushaspaqa ama mana iñiqkuna hina thawtiychischu, paykunaqa warararasqankuwanmi Diospa uyarisqan kayta yuyanku.

⁸Amayá qankunaqa paykuna hinachu kaychis. Yayaykichisqa manaraq mañakushaqtiykichismi yachanña imakunatachus necesitasqaykichista.

⁹Chayrayku qankunaqa kay hinata mañakuychis: Yayayku hanaq pachapi kaq, sutiyki yupaychasqa kachun,

¹⁰Qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata.

¹¹Sapa p'unchay t'antaykuta qowayku.

¹²Huchaykutapas[4] pampachawayku, imaynan ñoqaykupas contraykupi huchallikuqta pampachayku hinata.

¹³Amataq wateqaymanqa urmanaykuta munaychu, aswanpas mana allinkaqmanta qespichiwayku. [Qanpan qhapaqsuyupas, atiypas, qhapaqchaypas wiñay-wiñaypaq, amén.][5]

¹⁴Runakunatachus contraykichispi huchallikusqankuta pampachankichis chayqa, qankunatapas hanaq pachapi kaq Yayaykichisqa pampachallasunkichistaqmi.

¹⁵Ichaqa contraykichispi runakunaq huchallikusqankuta mana pampachankichischu chayqa, manallataqmi Yayaykichispas huchallikusqaykichiskunata pampachasunkichischu, nispa.

¹⁶Jesusqa nillarqantaqmi: — Ayunaspaykichisqa, ama iskay uyakuna hina llakisqa uyayoqchu kaychis, paykunaqa llakisqa uyayoqmanmi tukunku ayunasqankuta runakunaq rikunanpaq. Cheqaqtan niykichis paykunaqa llapan premionkutañan chaskikapunku.

¹⁷Qan ichaqa, ayunaspaykiqa umaykita ñaqch'akuy, uyaykitapas uphakuy,

¹⁸ayunashasqaykita runakunaq ama rikunanpaq, aswanpas mana rikuna Yayaykiq rikunallanpaq ayunay, hinan pakallapi ruwasqaykita rikuq Yayayki kutichipusunki.

¹⁹Ama qhapaq kaykunata kay pachapi huñukuychischu, kaypiqa thutapas thutanmi qhoqayaypas ismuchinmi, suwakunapas wasita haykuspan suwakun,

²⁰aswanpas qhapaq kaykunataqa hanaq pachapi huñukuychis, chaypiqa thutapas manan thutanchu, qhoqayaypas manan ismuchinchu, manallataq suwapas wasita haykuspa suwakunñachu.

²¹Maypichus qhapaq kayniyki kashan chayllapitaqmi sonqoykipas kashan, nispa.

²²Jesusqa nillarqantaqmi: — Ñawiqa lámpara hinan cuerpota k'anchan, chaymi ñawiyki allin kaqtinqa lliw cuerpoykipas k'anchayniyoq kanqa.

²³Ñawiyki mana allin kaqtinqa lliw cuerpoykipas tutayaqllataqmi kanqa. Chay hinaqa, qanpi kaq k'anchaychus tutayapun chayqa, ¡imayna yanaraqtaq chay kikin tutayaqqa kanqa!

²⁴Manan pipas iskay patrontaqa serviyta atinmanchu, huknintan cheqnikunman, huknintataq munakunman. Manan Diostawan qhapaq kaytawanqa serviyta atiwaqchischu.

²⁵Chayraykun niykichis: Aman kawsayniykichismanta llakipakunkichischu imatachus mikhunaykichismantapas ukyanaykichismantapas, imawanchus p'achakunaykichismantapas. Kawsaymi astawan valen mikhunamantaqa, cuerpopas astawan valen p'achamantaqa.

²⁶Qhawariychis phalaq animalkunata: manan tarpunkupaschu, cosechankupaschu, taqenkupaschu. Chaywanpas, hanaq pacha Yayaykichismi chaykunaman mikhuchin. ¡Qankunaqa phalaq animalkunamantapas aswan chaniyoqmi kankichis!

²⁷¿Mayqenniykichistaq atinman llakikushaspa, sayayninman huk chhikallantawanpas yapaykukuyta?

²⁸¿Imanaqtintaq p'achamantapas llakikunkichis? Qhawariychis campopi hamanq'ay t'ikakunaq wiñasqanta. Manan chaykunaqa llank'ankupaschu phuskankupaschu.

²⁹Ichaqa niykichismi: Rey Salomonpas qhapaqña kashaspapas manan chay huknin t'ika hinallapas p'achakurqanchu.

³⁰Chay hinatan Diosqa campopi plantakunata p'achachin, chaykunan huk p'unchay wiñan, qhepantin p'unchaytaq hornoman wikch'uykunku. ¿Chaychu Diosqa qankunatapas mana p'achachisunkichisman? ¡Qankunaqa pisi iñiyniyoqmi kankichis!

³¹Chay hinaqa, ama llakikuychischu: ¿Imatan mikhusunchis, imatan ukyasunchis, imawantaq p'achakusunchispas? nispaqa.

³²Tukuy chaykunamantaqa mana iñiqkunallan llakipakunku, hanaq pacha Yayaykichisqa yachanmi tukuy chaykuna necesitasqaykichista.

³³Aswanpas Diospa qhapaqsuyunta, chanin-kaynintawan ñawpaqtaqa maskhaychis, payqa tukuy chaykunatapas qosunkichismi.

³⁴Ahinaqa, ama llakipakuychischu paqarinmantaqa, paqarinpas llakikuyqa kallanqapunin. Sapa p'unchay llakikuyqa chay p'unchayllapaq kachun, nispa.