Read Diospa Simin Qelqa MATEO 7 Bible Online

MATEO 7 - Diospa Simin Qelqa bible

MATEO 7

¹Jesusqa nillarqantaqmi: — Ama hukkunata huchachaychischu, ahinapin Diosqa mana huchachasunkichischu.

²Imaynatachus hukkunata huchachankichis chay hinallatataqmi Diospas qankunataqa huchachasunkichis, imaynatachus hukkunata ruwankichis chay hinallatataqmi Diospas qankunataqa ruwasunkichis.

³¿Imaraykun wawqeykiq ñawinpi qhellita qhawanki, manataq ñawiykipi kaq kurkutaqa reparakunkichu?

⁴Chay hinari, ¿imaynatan wawqeykita ninki: Ñawiykimanta qhellita horqosqayki, nispa, ñawiykipitaq kurku kashaqtin?

⁵¡Iskay uya! ñawpaqtaqa ñawiykimantaraq kurkuta horqokuy, chayraqmi wawqeykiq ñawinmanta qhellita horqonaykipaq allinta rikunki.

⁶Ama alqokunaman Diospaq t'aqasqa kaqta qaraychischu, paqtan kutirimuspa llik'irqarisunkichisman, amallataq perla walqaykichistapas khuchikunaman wikch'uychischu, paqtan perlakunata sarunkuman, nispa.

⁷Jesusqa nillarqantaqmi: — Diosmanta mañakuychis qosunkichismi, maskhaychis tarinkichismi, waqyakuychis kicharimusunkichismi.

⁸Pipas Diosmanta mañakuqqa chaskinmi, maskhaqpas tarinmi, waqyakuqtapas kicharimunqan.

⁹¿Mayqenniykichistaq wawaykichis t'antata mañakushaqtin rumita qowaqchis?

¹⁰Challwata mañakushaqtinpas, ¿mach'aqwayta qowaqchis?

¹¹Qankunapas mana allin millay runa kashaspa, allin kaqkunata wawaykichiskunaman qoyta yachankichismi, chaymantapas astawanraqmi hanaq pachapi kaq Yayaykichisqa allin kaqkunata mañakuqtiykichis qosunkichis.

¹²Chay hinaqa, imaynatachus runakunaq ruwanasuykichista munankichis, chhaynallatataq qankunapas paykunata ruwaychis, chay hinatan kamachikun Diospa kamachikuy siminpas profetakunaq qelqasqanpas, nispa.

¹³Jesusqa nillarqantaqmi: — K'illku punkunta haykuychis. Hatun punkunta haykuspa hatun ñanninta riqkunaqa infiernomanmi askhallaña rishanku.

¹⁴K'illku punkunta haykuspa ñañu ñanninta kawsayman riqkunaqa pisillan kanku.

¹⁵Llulla profetakunamanta allinta cuidakuychis. Paykunan hamusunkichis ovejaman tukuspa, sonqonkupitaq ichaqa yarqasqa atoqkuna hina kanku.

¹⁶Paykunataqa imayna ruwasqankupin reqsinkichis. Manan uvasqa khiskakunamantachu pallakun, manallataq higospas kisakunamantachu pallakun.

¹⁷Llapa allin sach'aqa allin rurukunatan rurun, mana allin sach'akunan ichaqa mana allin rurukunata rurun.

¹⁸Allin sach'aqa allintakamallapunin rurun, mana allin sach'ataq mana allintakamallapuni rurun.

¹⁹Mana allinta ruruq sach'ataqa wit'uspan ninaman kanaykapunku.

²⁰Chay hinaqa, ruwasqankunapin llulla profetakunataqa reqsinkichis.

²¹Manan llapa “¡Señor! ¡Señor!” niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa.

²²Askhan taripay p'unchaypi niwanqaku: ¡Señor! ¡Señor! ¿Manachu qanmanta willakurqayku, sutiykipi supaykunatapas qarqorqayku, sutiykipi askha milagrokunatapas ruwarqayku? nispa.

²³Chaymi paykunata nisaq: Manapunin reqsiykichischu,[6] qayllaymanta anchhuriychis mana allin ruwaqkuna, nispa.

²⁴Pipas uyariwaspan nisqaykunata hunt'aq runataqa qaqa patapi wasinta ruwaq yuyayniyoq runawanmi rikch'anachisaq.

²⁵Para chayamuqtinmi mayukuna wasapaspa wasiman haykurqan, wayrapas sinchita wayramuspa wasiman waqtakurqan, ichaqa qaqa patapi teqsichasqa kaspanmi chay wasiqa mana thunikurqanchu.

²⁶Pipas nisqaykunata uyarishaspa mana hunt'aq runataqa aqo patapi wasinta ruwaq mana yuyayniyoq runawanmi rikch'anachisaq.

²⁷Para chayamuqtinmi mayukuna wasapaspa wasiman haykurqan, wayrapas sinchita wayramuspa wasiman waqtakullarqantaq, hinan wasiqa manchayta thunikurqan, nispa.

²⁸Chaykunata rimayta Jesús tukuqtintaq runakunaqa yachachikuyninmanta muspharqanku.

²⁹Atiywanmi paykunataqa yachachirqan, manan kamachikuy simita yachachiqkuna hinallachu.