Read Diospa Simin Qelqa MARCOS 12 Bible Online

MARCOS 12 - Diospa Simin Qelqa bible

MARCOS 12

¹Chaymantataq Jesusqa rikch'anachiy simikunapi paykunata yachachirqan: Huk runan chakranpi uvasta plantarqan, hinaspan muyuriqta perqarqan, uvas sarunata t'oqorqan, qhawanapaqtaq torretapas perqarqan, hinaspan llank'aqkunaman wakiypi qospa karuman ripurqan.

²Uvas cosechana chayamuqtinmi chakrayoqqa huknin kamachinta kacharqan payman tupaq uvasta llank'aqkunamanta chaskinanpaq.

³Llank'aqkunataq ichaqa payta hap'ispa maqaykurqanku, mana imayoqtataq qatirparirqanku.

⁴Wakmantataq paykunaman hukkaq kamachinta kacharqan, ichaqa umantan k'irirqanku, millayta k'amispataq qatirparirqanku.

⁵Hukkaqtañataq wakmanta kacharqan, hinan payta wañuchirqanku, ahinatan wak askha kamachikunatapas ruwarqanku, hukkunatan maqarqanku, hukkunatataq wañuchirqanku.

⁶Chakrayoqpaqa karqanraqmi pitachus kachanan, chaymi munasqan churin karqan. Paytan qhepallataña llank'aqkunaman kacharqan: Churiytaqa respetanqakupunin, nispa.

⁷Llank'aqkunataq rikurqospa ninakurqanku: — Kayqa chakrayoqpa churinmi, wañurqachisun, chakrataq ñoqanchispaq kapunqa, nispanku.

⁸Ahinatan payta hap'ispa wañuchirqanku, hinaspan uvas chakramanta wikch'umurqanku.

⁹Chaymi Jesusqa nirqan: — ¿Imananqataq uvas chakrayoqqa? Hamunqan, hinaspan chay llank'aqkunata wañuchinqa, uvas chakrantataq hukkunaman qopunqa, nispa.

¹⁰¿Manachu Diospa Simin Qelqata leerqankichis? Chaypin kay hinata nin: “Wasi perqaqkunaq wikch'usqan rumin esquina hap'iq churasqa kapun.

¹¹Señor Diospa ruwasqanmi kayqa, ñoqanchispaqtaqmi ancha musphana”, nispa.

¹²Hinan tapuqninkunaqa payta hap'irqoyta munarqanku, kay rikch'anachiy simita paykuna contra rimasqanta reparasqankurayku, ichaqa runakunata manchakuspan payta saqespa ripurqanku.

¹³Jesusmanmi wakin fariseokunata, Herodes t'aqamanta wakintawan kacharqanku, ima rimasqallanpipas pantarqoqtin payta huchachanankupaq.

¹⁴Hinan paykunaqa rispa nirqanku: — Yachachikuq, yachaykun runata mana manchakuspa cheqaq rimaq kasqaykita, qanqa manan runakunaq rikch'aynintachu qhawanki, aswanpas Diospa munayninman hinapuni kawsanatan yachachinki. Diospa kamachikuyninman hinaqa, ¿allinchu rey Cesarman contribucionta pagay? Icha, ¿manachu? ¿Paganaykuchu? Icha, ¿manachu? nispa.

¹⁵Hinan Jesusqa iskay uya kasqankuta yachaspa nirqan: — ¿Imaraykun wateqawankichis? Huk qolqeta qhawanaypaq apamuychis, nispa.

¹⁶Paykuna qolqeta haywaqtinkutaq nirqan: — ¿Piqpa uyantaq kaypi kashan, piqpa sutintaq kaypi qelqasqa kashan? nispa. Paykunataq nirqanku: — Rey Cesarpan, nispanku.

¹⁷Hinan Jesusqa paykunata nirqan: — Rey Cesarpa kaqtaqa rey Cesarman qopuychis, Diospa kaqtataq Diosman qopuychis, nispa. Chaymi paymanta muspharqanku.

¹⁸Chaymantataq, “kawsarimpuyqa manan kanchu” niq saduceokunaq wakinnin Jesusman hamuspa tapurqanku:

¹⁹— Yachachikuq, Moisesmi qelqapuwarqanku, piqpa wawqenpas casarakuspa mana wawayoq kashaspa wañukapunman chayqa, wawqenmi chay viudawan casarakunan, hinaspan wawqenpaq wawata churiyapunan, nispa.

²⁰Qanchis wawqekunan karqanku, ñawpaqkaqmi warmiwan casarakurqan, manaraq wawayoq kashaspataq wañukapurqan.

²¹Iskaykaqmi viudawan casarakurqan, manaraq wawayoq kashaspataq wañukapullarqantaq. Kinsa kaqwanpas hinallataq sucederqan.

²²Qanchisnintinmi paywanqa casarakurqanku. Manaraq wawayoq kashaspakamataq wañukapurqanku, warmipas qhepankuta wañukapullarqantaq.

²³Kawsarimpuy p'unchaypi kawsarimpuqtinkuri, ¿mayqenkaqpa warmintaq kanqa? Qanchisnintinmi paywanqa casarakurqanku, nispa.

²⁴Hinan Jesusqa paykunata nirqan: — Qankunaqa pantankichismi, Diospa Simin Qelqata, Diospa atiynintapas mana yachaspaykichis

²⁵Wañusqakuna kawsarimpuspankuqa, manan casarakunqakuchu, manallataqmi casarachisqapaschu kanqaku, aswanmi hanaq pachapi angelkuna hina kanqaku.

²⁶Wañusqakunaq kawsarimpunanmantaqa, ¿manachu Moisespa qelqanpi leerqankichis, imaynatachus t'ankar ukhumanta Diosqa payta rimaykusqanta: “Ñoqan kani Abrahampa Diosnin, Isaacpa Diosnin, Jacobpa Diosnin”, nispa nisqanta?

²⁷Diosqa manan wañusqakunaq Diosninchu, aswanpas kawsaqkunaq Diosninmi. Chay hinaqa, sinchitan qankunaqa pantashankichis, nispa.

²⁸Kamachikuy simita yachachiqkunamanta huknin asuykamuspataq, churanakusqankuta uyarispa, paykunaman Jesuspa allin kutichisqanmantapas yachaspa Jesusta tapuykurqan: — ¿Mayqentaq Diospa kamachikuyninkunamantaqa aswan chaniyoq? nispa.

²⁹Jesustaq payman kutichirqan: — Llapan kamachikuymanta aswan chaniyoqqa kaymi: “Uyariychis, Israel runakuna, Señor Diosninchisqa ch'ullallan.

³⁰Señor Diosniykitan munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima”.

³¹Iskaykaq aswan chaniyoqqa kaymi: “Runamasiykitan qan kikiykita hina munakunki”. Manan kanchu wak kamachikuy kaykunamanta aswan chaniyoqqa, nispa.

³²Chaymi kamachikuy simita yachachiqqa Jesusta nirqan: — Allinmi, Yachachikuq, cheqaqtapunin ninki ch'ullalla Diosqa kasqanta, paymanta wakqa mana kasqantapas.

³³Cheqaqtapunin nillankitaq tukuy sonqowan, tukuy yuyaywan, tukuy almawan, tukuy kallpawan Diosta munakuyqa, runamasitapas kikinta hina munakuyqa, tukuy ruphachina ofrendamanta, sacrificiokunamanta aswanraq kasqantapas, nispa.

³⁴Hinan Jesusqa yachaywan kutichiqtin payta nirqan: — Diospa qhapaqsuyunmantaqa manan karupichu kashanki, nispa. Manañataq pipas payta tapuq churakurqanchu.

³⁵Jesustaq Dios yupaychana wasipi yachachishaspa nirqan: — ¿Imaynataq kamachikuy simita yachachiqkunaqa ninku: Cristoqa Davidpa Churinmi nispa?

³⁶Kikin Davidmi Santo Espirituq yuyaychasqan nirqan: “Señor Diosmi Señorniyta nirqan: Paña ladoypi tiyaykuy, chakiykiq sarunanman awqaykikunata churanaykama”, nispa.

³⁷Kikin Davidtaq “Señor” nispa payta nin, chayri, ¿imaynapitaq Davidpa Churin kanman? nispa. Askha runakunataq kusisqa Jesusta uyarirqanku.

³⁸Jesusmi yachachishaspa paykunata nirqan: — Kamachikuy simita yachachiqkunamanta cuidakuychis, paykunaqa munanku qoysu p'achayoq puriyta, plazakunapi runakunaq napaykunanta,

³⁹sinagogakunapi kurak runakunaq tiyanankunata, hatun mikhuykunapipas allinkaq tiyanakunata.

⁴⁰Hinallataq wakcha viudakunaq kaqninta qechunku, Diosmanta unayta mañakuq tukuspataq chay ruwasqankuta pakayta munanku. Paykunan aswan huchachasqaqa kanqaku, nispa.

⁴¹Jesusqa Dios yupaychana wasipi alcanciaq chimpanpi tiyashaspan runakunaq imaynatachus alcanciaman qolqe churasqankuta rikusharqan, askha qhapaqkunan askha qolqeta churarqanku.

⁴²Huk wakcha viudapas hamullarqantaq, hinaspan iskay qolqechata churaykurqan.

⁴³Hinan Jesusqa yachachisqankunata waqyaspa nirqan: — Cheqaqtan niykichis, kay wakcha viudan alcanciaman llapan churaqkunamanta aswantaqa churaykun,

⁴⁴llapanmi qhapaq kashaspa mana munasqallanta churan, paytaq ichaqa wakcha kayninpi tukuy kawsananpaq kaqta llapanta churaykun, nispa.