Read Diospa Simin Qelqa MARCOS 14 Bible Online

MARCOS 14 - Diospa Simin Qelqa bible

MARCOS 14

¹Iskay p'unchayllañan kasharqan Pascua Fiestapaq Mana Qonchuyoq T'antata Mikhuna Fiestapaqpas. Sacerdote umallikunan kamachikuy simita yachachiqkunapiwan yuyaykurqanku imaynatachus q'otullawan Jesusta hap'ispa wañuchinankupaq.

²Ichaqa nirqankun: — Ama fiesta p'unchaypiqa hap'isunchu, runakunaq ama ch'aqwananpaq, nispa.

³Betania llaqtachapi lepra onqoyniyoq nisqa Simonpa wasinpi Jesusqa kashaspa, mikhunanpaq tiyashaqtinmi huk warmi hamurqan, yuraq rumi p'uyñuchapi sinchi chaniyoq q'apaq nardo hawina apantin. P'uyñuchata p'akispataq Jesuspa umanman q'apaq hawinata hich'aykurqan.

⁴Chaymi wakinqa phiñakuspa ninakurqanku: — ¿Imapaqmi kay hawinata usuchin?

⁵Wata jornalpa chanin qolqeman vendekuspa wakchakunaman qokunman karqan, nispa. Hinaspan warmi contra rimarqanku.

⁶Jesustaq ichaqa nirqan: — Ama payta hark'aychischu, ¿imapaqmi llakichinkichis? Ñoqapaqqa allin ruwaytan ruwan.

⁷Wakchakunaqa qankunawanpunin kashan, hayk'aqpas munaspaykichisqa paykunapaq allin ruwayta atinkichismi, ñoqan ichaqa mana tukuy tiempochu qankunawan kasaq.

⁸Kay warmiqa ima atisqantan ruwan, cuerpoy p'ampasqa kananpaqmi hawiykuqniy ñawpamun.

⁹Cheqaqtan niykichis, maypipas allin willakuykuna kay pachantinpi willasqa kasqanpin kay warmiq ruwasqanpas willasqallataq kanqa payta yuyarinapaq, nispa.

¹⁰Chunka iskayniyoq yachachisqankunamanta huknin, Judas Iscarioten sacerdote umallikunaman rirqan, paykunaman Jesusta hap'ichinanpaq.

¹¹Paykunataq chayta uyarispa kusikuspanku: — Qolqeta qosqaykiku, nirqanku. Chaymi Judasqa imaynatachus Jesusta hap'ichiytapuni munasharqan.

¹²Mana Qonchuyoq T'anta Fiesta qallariy p'unchaymi Pascua Fiesta corderota nak'aqku. Chay p'unchaymi yachachisqankunaqa Jesusta tapuykurqanku: — Pascua mikhunata mikhunaykipaqqa, ¿maypin wakichimunaykuta munanki? nispa.

¹³Hinan iskay yachachisqankunata kachaspa nirqan: — Llaqtata riychis, unuta p'uyñupi apashaq runawanmi tupankichis, hinaspa qhepanta rinkichis.

¹⁴Maymanchá haykunqa chay wasiyoqtan ninkichis, yachachikuqmi nin: ¿Mayqen wasipin yachachisqaykunawan Pascua mikhunata mikhusaq? nispa.

¹⁵Hinan payqa altospi allichasqallataña hatun wasita rikuchisunkichis, chaypin ñoqanchispaq wakichimunkichis, nispa.

¹⁶Yachachisqankunataq rispanku llaqtaman haykurqanku, hinaspan Jesuspa nisqanta hina tarimuspa Pascua mikhunata wakichirqanku.

¹⁷Ch'isiyaykuqtintaq Jesusqa chunka iskayniyoqwan rirqan.

¹⁸Tiyaykuspa mikhushaqtinkutaq payqa nirqan: — Cheqaqtan niykichis, hukniykichis ñoqawan mikhuqmi awqaykunaman hap'ichiwanqa, nispa.

¹⁹Hinan paykunaqa llakikuspa sapankanku Jesusta tapurqanku: — ¿Ñoqachu kani? nispanku.

²⁰Paytaq yachachisqankunata nirqan: — Chunka iskayniyoqmanta hukniykichis ñoqawan kuska t'antata platoman challpuqmi.

²¹Runaq Churinqa Diospa Simin Qelqaman hinan wañunqa, ichaqa, ¡imaraqmi Runaq Churinta hap'ichiq runamanta kanqa! Aswan allinmi kanman karqan chay runaq mana hayk'aq naceynin, nispa.

²²Paykuna mikhushaqtintaq Jesusqa t'antata hap'ispa, saminchaspa phasmirqan, hinaspan paykunaman qorqan: — Hap'iychis, kaymi cuerpoy, nispa.

²³Vinoyoq vasotapas hap'illarqantaqmi, graciasta qospataq paykunaman haywarqan, chaymi llapallanku vasomanta ukyarqanku.

²⁴Paykunatan nirqan: — Kayqa Dioswan rimanakuyta cheqaqchaq yawarniymi, askha runarayku hich'asqa.

²⁵Cheqaqtan niykichis, uvas ch'irwasqataqa manañan ukyasaqchu, aswanpas Diospa qhapaqsuyunpiñan wakmanta mosoq vinota ukyasaq, nispa.

²⁶Himnota takispankuñataq Olivos orqoman rirqanku.

²⁷Jesustaq paykunata nirqan: — Llapaykichismi kunan tuta ñoqata saqerparipuwankichis. Diospa Simin Qelqan nin: “Michiqtan k'irisaq, ovejakunataq ch'eqeripunqaku”, nispa.

²⁸Kawsarimpusqay qhepatan ichaqa, ñawpaqeykichista Galilea provinciaman risaq, nispa.

²⁹Chaymi Pedroqa Jesusta nirqan: — Llapaña saqerparisunki chaypas, ñoqaqa manan saqesqaykichu, nispa.

³⁰Jesustaq payta nirqan: — Cheqaqtan niyki, qanmi kunan tuta, manaraq iskay kutita gallo waqashaqtin, kinsa kutita “manan reqsinichu” niwanki, nispa.

³¹Pedrotaq atipakuspa nirqan: — Qanwanña wañunay kanman chaypas, manapunin “manan reqsinichu” nisqaykichu, nispa. Hinatakamataqmi llapankupas nirqanku.

³²Getsemaní patamanmi chayarqanku, hinaspan Jesusqa yachachisqankunata nirqan: — Kaypi tiyashaychis Diosmanta mañakamunaykama, nispa.

³³Pedrota, Jacobota, Juantawanmi pusarqan. Hinaspan Jesusqa sonqonpi sinchi llakiq ñit'isqan kaspa llakikurqan.

³⁴Paykunatataq nirqan: — Llakikuymantan sonqoy phatarqoq hinallaña kashan, kayllapi kashaychis, rikch'ashaychis, nispa.

³⁵Huk chhikanta ñawpaqman rispataq pampakama k'umuykukuspa Diosmanta mañakurqan, atikuqtinqa chay ñak'arina horas payman ama chayamunanpaq.

³⁶Nirqantaq: — Taytáy, Yayáy, qanqa tukuy imaymanatan atinki, kay ñak'arinata ñoqamanta anchhurichiy, ichaqa ama ñoqaq munasqaychu kachun, aswanpas qanpa munasqayki, ruwakuchun, nispa.

³⁷Kutispataq puñushaqta paykunata tarirqan, hinaspan Pedrota nirqan: — ¿Puñushankichu Simón? ¿Manachu huk horallatapas rikch'ayta atinki?

³⁸Rikch'aychis, Diosmanta mañakuychis, ama wateqasqa kanaykichispaq, sonqoqa munallanpunin, aycha cuerpon ichaqa pisi kallpa, nispa.

³⁹Wakmanta rispataq chay kikin simikunallawantaq mañakurqan.

⁴⁰Kutimuspataq huk kutitawan paykunata puñushaqta tarirqan. Paykunata puñuy aysaqtintaq mana ima niytapas atirqankuchu.

⁴¹Kinsa kutipi hamuspataq paykunata nirqan: — ¿Puñushankichisraqchu? ¿Samashankichisraqchu? ¡Chaykamalla! Horan chayarqamun. Runaq Churinqa huchasapakunaq makinman hap'ichisqan kanqa.

⁴²Hatariychis, hakuchis, hap'ichiwaqniymi sispaykarqamunña, nispa.

⁴³Jesús rimashallaqtinraqmi Judasqa chayarqamurqan, payqa chunka iskayniyoq yachachisqanmanta hukninmi karqan. Paywantaq espadakunantin k'aspikunantin askha runakuna hamurqanku. Chaykunatan sacerdote umallikuna, kamachikuy simita yachachiqkuna, kurak runakunapiwan kachamurqanku.

⁴⁴Jesusta hap'ichiqtaq kay hinata nisqa: — Pitachus much'aykusaq chaymi kanqa, payta hap'ispan ama kacharispa apankichis, nispa.

⁴⁵Chayarqospataq Jesusman asuykuspa: — ¡Yachachikuq! nispa much'aykurqan.

⁴⁶Hinaqtinmi Jesusta presota hap'irqanku.

⁴⁷Chaypi kaqkunamanta huknintaq espadata horqokuspa, uma sacerdoteq kamachinta waqtaspa ninrinta qhorurqorqan.

⁴⁸Jesustaq paykunata nirqan: — ¿Suwaman hinachu k'aspikunantin espadakunantin hap'iwanaykichispaq hamurqankichis?

⁴⁹Sapa p'unchaymi Dios yupaychana wasipi yachachispa qankunawan kasharqani, manataq hap'iwarqankichischu. Ichaqa kaykunan sucedeshan Diospa Simin Qelqa hunt'akunanpaq.

⁵⁰Llapa yachachisqankunataq payta saqerparispa ayqerikapurqanku.

⁵¹Huk waynallan Jesusta qatiparqan linomanta awasqa llamp'unawan p'istuykusqa, hinan payta hap'irqorqanku.

⁵²Paytaq ichaqa p'istunanta saqerparispa, q'alalla ayqerikapurqan.

⁵³Uma sacerdotemanmi Jesusta apamurqanku, hinan llapan sacerdote umallikuna, kurak runakuna, kamachikuy simita yachachiqkunapiwan huñunakamurqanku.

⁵⁴Pedrotaq karu qhepallanta rirqan uma sacerdoteq pation ukhukama, hinaspan guardiakunawan ninapi q'oñikuspa tiyasharqan.

⁵⁵Sacerdote umallikunataq umalli runakunaq huñunakuyninpi kaqkunapiwan wañuchinapaq Jesuspa contranpi testigota maskharqanku, manataq tarirqankuchu.

⁵⁶Paypa contranpiqa askhan llullakurqanku, ichaqa willakusqankun mana tuparqanchu.

⁵⁷Hukkunataq sayarispa Jesuspa contranpi llullakurqanku:

⁵⁸— Ñoqaykun payta uyarirqayku: Runaq perqasqan kay yupaychana wasitan thunisaq, hinaspan kinsa p'unchaypi wakta mana runaq perqasqanta sayarichisaq, nisqanta, nispa.

⁵⁹Chaywanpas manan willakusqankuqa tuparqanchu.

⁶⁰Hinaqtinmi uma sacerdoteqa chawpipi sayaykuspa Jesusta tapurqan: — ¿Manachu imatapas kutichikunki? ¿Imatan kaykunaqa contraykipi willakushan? nispa.

⁶¹Jesustaq ichaqa ch'inlla karqan, mana imatapas kutichikuspa. Uma sacerdotetaq wakmanta payta tapurqan: — ¿Qanchu Cristo kanki, yupaychasqayku Diospa Churin? nispa.

⁶²Jesustaq payta nirqan: — Arí, ñoqan kani. Runaq Churintan rikunkichis atiyniyoq Diospa paña ladonpi tiyashaqta, hanaq pacha phuyupi hamushaqtawan, nispa.

⁶³Hinaqtinmi uma sacerdoteqa phiñakuspa p'achanta llik'ikurqan: — ¿Imapaqñataq testigokunatapas munanchis?

⁶⁴Uyarinkichismi Dios contra rimasqanta. Qankunari, ¿imaninkichistaq? nispa. Hinan llapanku huchacharqanku wañunanpaq.

⁶⁵Hinaspanmi wakinninku thoqaykurqanku, wakintaq ñawinta wataspa saqmarqanku, hinaspan nirqanku: — Watuy, ¿pin saqmashasunki? nispa. Hinallataq guardiakunapas uyanpi ch'aqlarqanku.

⁶⁶Patiopi Pedro kashaqtinmi, uma sacerdoteq warmi kamachin hamurqan.

⁶⁷Pedrota q'oñikushaqta rikuspataq payta qhawaykuspa nirqan: — Nazaret llaqtayoq Jesuswanmi qanpas kasharqanki riki, nispa.

⁶⁸Paytaq ichaqa mananchakurqan: — Manan reqsinichu, pimantas rimakushankipas, nispa. Chayta nispan hawa punkuman lloqsirqan.

⁶⁹Warmi kamachitaq wakmanta payta rikuspa chaypi kaqkunata nirqan: — Kay runaqa puriq-masinkun, nispa.

⁷⁰Pedrotaq ichaqa mananchakurqan. Asllawan qhepatañataq, chaypi kaqkunaqa huktawan payta nirqanku: — Cheqaqtapunin paykunaq puriqmasin kanki, Galileamantan kanki riki, nispa.

⁷¹Chaymi Pedroqa pay kikinta ñakakuspa jurarqan: Pimantachus rimasqaykichis runataqa manapunin reqsinichu, nispa.

⁷²Chay ratotaq iskaykaq kutita gallo waqarqan. Hinan Pedroqa Jesuspa payman: Manaraq iskay kutita gallo waqashaqtinmi kinsa kutita “manan reqsinichu” niwanki, nisqanta yuyarirqan. Chayta yuyarispataq waqaykurqan.