Read Diospa Simin Qelqa MARCOS 15 Bible Online

MARCOS 15 - Diospa Simin Qelqa bible

MARCOS 15

¹Pacha illarimuyta hinataq huñunakuspa sacerdote umallikuna, kurak runakuna, kamachikuy simita yachachiqkuna, Sanedrinpi llapa kaqkunapiwan rimanakuspaña Jesusta watasqata apaspanku kamachikuq Pilatoman entregamurqanku.

²Hinan Pilatoqa Jesusta tapurqan: — ¿Qanchu judío runakunaq reynin kanki? nispa. Jesustaq nirqan: — Arí, nisqayki hinapunin, nispa.

³Sacerdote umallikunataq Jesustaqa imaymanamanta huchacharqanku.

⁴Chaymi Pilatoqa huktawan tapurqan: — ¿Manachu imatapas kutichikunki? Qhawariy, imaymanamantan qanta huchachasunkiku, nispa.

⁵Jesustaq ichaqa manapuni kutichikurqanchu. Chaymi Pilatoqa muspharqanraq.

⁶Sapa wata fiestapin Pilatoqa huk presota kachariq mayqentapas runakunaq mañakusqanta.

⁷Chaypachan huk runa Barrabás sutiyoq preso kasharqan Roma suyu kamachiq contra sayariq-masinkunawan kuska, paykunan chay sayariypi runata wañuchisqaku.

⁸Runakunataq Pilatoman qayllaykuspa mañakurqanku sapa wata ruwanaman hina huk presota kacharinanpaq.

⁹Hinan Pilatoqa paykunata nirqan: — ¿Judío runakunaq reynintachu kacharinayta munankichis? nispa.

¹⁰Payqa yacharqanmi envidiakuspa sacerdote umallikuna Jesusta payman entregasqankuta.

¹¹Sacerdote umallikunataq ichaqa runakunata tanqarqanku Barrabasta kacharinanta mañakunankupaq.

¹²Pilatotaq paykunata tapurqan: — ¿Imatataq judío runakunaq Reynin nisqawan ruwanayta munankichis? nispa.

¹³Paykunataq wakmanta qaparirqanku: — ¡Paytaqa chakatay! nispanku.

¹⁴Pilatotaq paykunata nirqan: — ¿Imanaqtin? ¿Ima mana allintataq ruwarqan? nispa. Hinan paykunaqa astawan qaparirqanku: — ¡Paytaqa chakatay! nispanku.

¹⁵Chaymi Pilatoqa runakunawan allinpi kayta munaspa, Barrabasta mañakusqankuman hina kacharirqan, Jesustataq hasut'ichispaña chakatanankupaq entregarqan.

¹⁶Chaymi soldadokunaqa Palacio wasi patioman Jesusta apaykurqanku, hinaspan llapan soldadokunata waqyarqanku.

¹⁷Yana-puka p'achawantaq p'achaykachirqanku, khiskamanta simp'asqa coronata churaspataq

¹⁸napaykurqanku: — ¡Kawsachun judío runakunaq reynin! nispa.

¹⁹Hinaspan huk soqoswan umanpi waqtarqanku, thoqaykurqanku, qonqoriykukuspataq payta yupaychaq tukurqanku.

²⁰Chhaynata asipayasqankumantañataq yana-puka p'achata horqorqanku, hinaspan kikin p'achanwan p'achaykachispa chakatanankupaq Jesusta aparqanku.

²¹Alejandroq Rufoq taytan, Cirene llaqtayoq Simontaq campomanta hamusharqan, paymanmi Jesuspa cruzninta q'epichirqanku.

²²Jesustaqa Gólgota patamanmi aparqanku. (Golgotaqa “Calavera pata” ninantan nin).

²³Hinan mirrayoq vino chhaqrusqata ukyananpaq haywarqanku, Jesustaq ichaqa mana ukyarqanchu.

²⁴Paytan chakatarqanku, hinaspan p'achanta rakinakunankupaq sortearqanku imantachus sapanka apakunankupaq.

²⁵Chakatarqankuqa las nueve horastan.

²⁶Huchachasqa kaynintaq: JUDIO RUNAKUNAQ REYNIN, nisqa qelqasqa karqan.

²⁷Jesustaqa iskay suwakunatawanmi chakatarqanku, hukninta paña ladonpi, huknintataq lloq'e ladonpi. [

²⁸Ahinapin Diospa Simin Qelqa hunt'akurqan: “Huchasapakunawanmi yupasqa karqan”, niq].[7]

²⁹Chayninta puriqkunataq umankuta chhaphchirispa k'amirqanku: — ¡Yaw! Dios yupaychana wasita thuniq kinsa p'unchaypi sayarichiyta munaq,

³⁰qan kikiykitayá qespichikuy, hinaspa cruzmanta uraykamuy, nispanku.

³¹Chay hinallatataq sacerdote umallikunapas kamachikuy simita yachachiqkunapiwan asipayaspa ninakurqanku: — Hukkunataqa qespichirqanmi, pay kikintataqmi mana qespichikuyta atinchu.

³²Israelpa reynin Cristo kaspaqa cruzmanta kunan uraykamuchun, rikuspa iñinanchispaq, nispa. Chakatasqa-masinkunapas paytaqa k'amillarqankutaqmi.

³³Chawpi p'unchayña kashaqtinmi las tres horaskama kay pachantinpi tutayaykurqan.

³⁴Hinan Jesusqa las tres horasta sinchita waqyakurqan: — ¡Eloi, Eloi! ¿Lama sabactani?[8] nispa. Chayta nispaqa: ¡Diosníy, Diosníy! ¿Imanaqtinmi saqerpariwanki? ninantan nin.

³⁵Chaypi wakin kaqkunataq payta uyarispa: — Profeta Eliastan waqyakushan, nirqanku.

³⁶Hukninkutaq phawarispa vinagreman esponjata challpuykurqan, hinaspan soqosman churaykuspa ch'onqananpaq qospa nirqan: — Suyaychis qhawasunchis hamunqapaschá profeta Elías payta uraykachiq, nispa.

³⁷Jesustaq ichaqa kunkayoqta waqyakuspa wañukapurqan.

³⁸Hinan Dios yupaychana wasi ukhupi cortina iskayman llik'ikurqan wichaymanta urayman.

³⁹Hinan paypa ñawpaqenpi sayashaq pachak soldado kamachiqqa, chay hinata wañukapusqanta rikuspa nirqan: — Cheqaqtapunin kay runaqa Diospa Churin kasqa, nispa.

⁴⁰Wakin warmikunapas kashallarqankutaqmi karumanta qhawaspanku. Paykunawanmi kasharqan Magdalá llaqtayoq María, sullk'akaq Jacoboq Josepa maman María, Salomepiwan.

⁴¹Paykunan Galilea provinciapi Jesús kashaqtinraq paywan purirqanku, servirqanku ima. Chaypiqa kashallarqantaqmi wakin askha warmikunapas paywan kuska Jerusalenman wicharimuqkuna.

⁴²Viernes tarde samana p'unchaypaq wakichikuna kaqtintaq,

⁴³hamurqan umalli runakunaq huñunakuyninmanta huknin allin respetasqa runa Arimatea llaqtayoq José, payqa Diospa qhapaqsuyuntan suyasharqan. Mana manchakuspa Pilatoman haykuspataq Jesuspa cuerponta mañakurqan.

⁴⁴Hinan Pilatoqa wañusqaña kasqanta yachaspa muspharqan. Pachak soldado kamachiqta waqyachimuspataq tapurqan: — ¿Ñachu wañurqonña? nispa.

⁴⁵Pachak soldado kamachiq willaqtintaq payqa Joseman ayata entregachirqan.

⁴⁶Josetaq sumaq lino telata rantirqan, Jesusta uraykachispataq chay telapi p'istuykuspa qaqapi t'oqosqaman churaykurqan. Hinaspataq chay punkuta hatun rumiwan wisq'aykurqan.

⁴⁷Magdalá llaqtayoq Mariataq, Josepa maman Mariapiwan, maypichus churasqa kasqanta qhawasharqanku.