Read Diospa Simin Qelqa MARCOS 9 Bible Online

MARCOS 9 - Diospa Simin Qelqa bible

MARCOS 9

¹Jesusqa paykunata nillarqantaqmi: — Cheqaqtan niykichis, kaypi kaqkunamanta wakinkunaqa manan wañunqakuchu, Diospa qhapaqsuyunta atiywan hamushaqta rikunankukama, nispa.

²Soqta p'unchay qhepatataq Jesusqa Pedrota, Jacobota, Juantawan huk alto orqoman paykunallata pusarqan, hinaspan ñawpaqenkupi huk-niraqman rikch'aynin tukurqan.

³P'achanpas rit'i hina yuraqllaña k'ancharishaqmi rikhurirqan, manan kay pachapi mayqen t'aqsaqpas chay hina yuraqyachiyta atinmanchu.

⁴Hinan paykunaqa rikurqanku Eliasta Moisestawan Jesuswan parlashaqta.

⁵Chaymi Pedroqa Jesusta nirqan: — Yachachikuq, may allinmi kaypi kayninchisqa. Kinsa ch'ukllata ruwasaqku, hukta qanpaq, hukta Moisespaq, huktataq Eliaspaq, nispa.

⁶Ancha mancharisqan kasharqanku hinan Pedroqa mana reparakuspa chay hinata nirqan.

⁷Chayllamanmi huk phuyu hamuspa paykunata pakaykurqan, chay phuyumantan huk kunka nimurqan: Kaymi munakusqay Churiy, payta uyariychis, nispa.

⁸Muyuriqninkuta qhawarispankutaq manaña chay hukkunata rikurqankuchu, aswanpas sapan Jesusllatañan.

⁹Orqomanta uraykamushaqtinkutaq Jesusqa paykunata kamachirqan kay rikusqankuta ama pimanpas willanankupaq, aswanpas Runaq Churin wañusqanmanta kawsarimpuqtinña rimarinankupaq.

¹⁰Chaymi paykunaqa chay rikusqankuta mana pimanpas rimarirqankuchu, paykunapurallan tapunakurqanku: — ¿Imataq wañusqamanta kawsarimpuyri? nispa.

¹¹Hinaspan Jesusta tapurqanku: — ¿Imanaqtinmi kamachikuy simita yachachiqkunaqa: Eliasraqmi ñawpaqtaqa hamunan, ninku? nispa.

¹²Jesustaq paykunata nirqan: — Arí, Eliasqa ñawpaqtapunin hamun, paymi tukuy imaymanata allichan. ¿Manachu Diospa Simin Qelqapi nin: “Runaq Churinqa sinchitan ñak'arinqa, pisichasqataqmi kanqa”, nispa?

¹³Ichaqa niykichismi, Eliasqa hamurqanñan, tukuy ima munasqankutan payta ruwarqanku, paymanta Diospa Simin Qelqapi nisqaman hina, nispa.

¹⁴Jesusqa kinsa yachachisqankunapiwan hamuspankun, wakin yachachisqankunaq muyuriqninpi askha runakunata rikurqan, kamachikuy simita wakin yachachiqkunataq paykunawan churanakushaqta.

¹⁵Llapan runakunataq qonqaylla Jesusta rikuspa muspharqanku, hinaspan payman phawarispa napaykurqanku.

¹⁶Jesustaqmi paykunata tapurqan: — ¿Imamantataq paykunawan churanakushankichis? nispa.

¹⁷Hinan runa ukhumanta huknin nimurqan: — Yachachikuq, qanmanmi upayachiq mana allin espirituq ñak'arichisqan churiyta pusamurqani,

¹⁸chay mana allin espiritutaq maypi hap'ispapas wat'akichispa phosoqota aqtuchin, kiruntapas k'arkakichin, hinaspan k'aspi hina chutarikun. Yachachisqaykikunatan valekurqani chay mana allin espirituta qarqonankupaq, ichaqa manan atinkuchu, nispa.

¹⁹Jesustaq paykunata nirqan: — ¡Ay, mana iñiyniyoq runakuna! ¿Hayk'aqkaman muchusqaykichis? Chay waynata pusamuwaychis, nispa.

²⁰Pusamuqtinkutaq Jesusta rikuspa hina mana allin espirituqa waynata chhaphchirqan, pampaman urmaspataq waynaqa phosoqota aqtuspa qhosparqan.

²¹Jesustaq taytanta tapurqan: — ¿Hayk'aqmantañan payqa kay hina kashan? nispa. Taytantaq nirqan: — Wawa kasqanmantañan.

²²Askha kutin wañuchinanpaq ninamanpas unumanpas wikch'uykun, ima ruwayllatapas atispaykiqa khuyapayawaspaykiku yanapaykuwayku, nispa.

²³Hinan Jesusqa payta nirqan: — ¿Imanaqtinmi “atispaykiqa” ninki? ¡Iñiqpaqqa tukuy imapas atikunmi! nispa.

²⁴Chaymi waynaq taytanqa kunkayoqta nirqan: — Iñinin, ¡yanapaykuway astawanraq iñinaypaq! nispa.

²⁵Jesustaq askha runakunaq huñukamusqanta rikuspa hina, mana allin espirituta phiñarikurqan: — Upayachiq roqt'uyachiq mana allin espíritu, ñoqan kamachiyki: ¡Lloqsiy paymanta, amañan payman kutiykunkichu! nispa.

²⁶Hinan mana allin espirituqa qaparispa waynata sinchita chhaphchispa lloqsirqan, chaymi waynaqa aya hina karqan. Askhan nirqanku: — Wañusqan kashan, nispa.

²⁷Jesustaq ichaqa makinmanta hap'ispa sayarichirqan, hinan waynaqa sayarirqan.

²⁸Wasiman Jesús haykuqtintaq yachachisqankunaqa sapaqpi payta tapurqanku: — ¿Imanaqtintaq ñoqaykuri mana qarqoyta atirqaykuchu? nispa.

²⁹Hinan paykunata nirqan: — Kay hina espiritukunataqa Diosmanta mañakuyllawanmi, runamanta pipas qarqonman, nispa.

³⁰Chaymanta lloqsispataq Galilea provincianta purirqanku, manataq piqpa yachanantapas munarqankuchu.

³¹Jesusqa yachachisqankunata yachachispan nirqan: — Runaq Churinqa runakunamanmi hap'iykachisqa kanqa, wañuchinankupaq, ichaqa kinsakaq p'unchaypin kawsarimpunqa, nispa.

³²Paykunataq chay rimasqanta mana entienderqankuchu, tapuykuytapas manchakurqankutaq.

³³Capernaúm llaqtamanmi chayarqanku, hinan wasipi kashaspaña Jesusqa paykunata tapurqan: — ¿Imamantan ñanpi tapunakusharqankichis? nispa.

³⁴Paykunataq ch'inlla karqanku, mayqenninkuchus qollana kanankumanta ñanpi tapunakusqankurayku.

³⁵Chaymi Jesusqa tiyaykuspa chunka iskayniyoq yachachisqankunata waqyaspa nirqan: — Pipas qollana kayta munan chayqa, llapamanta huch'uyyaykukuqmi kanan, llapatataq servinanpas, nispa.

³⁶Hinaspanmi huk wawata chawpinkuman sayaykachirqan, marq'arikuspataq paykunata nirqan:

³⁷— Pipas sutiypi kay wawata hina chaskiqmi ñoqata chaskiwan, ñoqata chaskiwaqtaq mana ñoqallatachu chaskiwan, aswanpas kachamuwaqniy Diostan chaskin, nispa.

³⁸Juantaq Jesusta nirqan: — Yachachikuq, huk runatan sutiykipi supaykunata qarqoshaqta rikumuyku, payqa manan ñoqanchiswan puriqchu, chaymi hark'amurqayku, nispa.

³⁹Jesustaq nirqan: — Ama payta hark'aychischu, pipas sutiypi milagrota ruwashaspaqa manan ñoqa contraqa millayta rimanmanchu.

⁴⁰Mana contranchispi kaqqa ñoqanchiswanmi kashan.

⁴¹Pipas huk vaso unuta haywarisunkichis Cristoq kasqaykichisrayku chayqa, cheqaqtan niykichis premiotaqa chaskinqapunin, nispa.

⁴²¡Ay, pipas ñoqapi iñiq kay huch'uykunamanta hukninta huchaman urmachiqqa! Paypaqqa aswan allinmi kanman karqan kunkanman molino rumita warkuykuspa lamar-qochaman wikch'uykunanku.

⁴³Makiykitaqchus huchaman urmachisunkiman chayqa kuchurqokuy, aswan allinmi kanman ch'ulla makillayoq kawsayman haykuyniyki, iskay makiyoq kashaspa infiernoman, mana wañuy atiq ninaman rinaykimantaqa.

⁴⁴(Manan chaypiqa kurupas wañunchu, ninapas manallataq hayk'aqpas wañunchu).

⁴⁵Chakiykitaqchus huchaman urmachisunkiman chayqa kuchurqokuy, aswan allinmi kanman ch'ulla chakillayoq kawsayman haykuyniyki, iskay chakiyoq kashaspa infiernoman wikch'uykusqa kanaykimantaqa.

⁴⁶(Manan chaypiqa kurupas wañunchu, ninapas manallataq hayk'aqpas wañunchu).

⁴⁷Ñawiykitaqchus huchaman urmachisunkiman chayqa horqorqokuy, aswan allinmi kanman Diospa qhapaqsuyunman ch'ulla ñawillayoq haykuyniyki, iskay ñawiyoq kashaspa infiernoman wikch'uykusqa kanaykimantaqa.

⁴⁸Manan chaypiqa kurupas wañunchu, ninapas manallataq hayk'aqpas wañunchu.

⁴⁹Llapanmi ninawan kachiwan hina ch'uyanchasqa kanqaku.

⁵⁰Kachiqa sumaqmi, kachitaqchus q'aymayanman chayqa, ¿imawanmi kachiman tukuchiwaqchis? Kikiykichispi kachiyoq kaychis, hukkuna hukkunawantaq thak-kaypi kawsaychis, nispa.