Read Diospa Simin Qelqa LUCAS 1 Bible Online

LUCAS 1 - Diospa Simin Qelqa bible

LUCAS 1

¹Askha runakunañan atisqankuman hina ñoqayku ukhupi imakunachus cheqaqpuni kasqanta allin wakichisqata qelqarqanku.

²Qallariymantapacha chaykunata ñawinkuwan rikuqkunan llapanta willawarqanku, paykunan Diospa siminta willaqkuna karqanku.

³Chaykunatan ñoqapas qallariyninmanta allintapuni t'aqwirqani, hinaspan yuyaykurqani allin wakichisqa willakuyta qanman qelqamuyta ancha respetasqa Teófilo.

⁴Ahinapin yachanki yachaqasqaykiqa cheqaqpuni kasqanta.

⁵Judea hap'iypi rey Herodes kamachikushasqan tiempopin, Abiaspa t'aqan sacerdotekunamanta huk sacerdote Zacarías sutiyoq karqan, warmintaq Aaronpa mirayninmanta Elisabet sutiyoq karqan.

⁶Iskayninkutaq Diospaq chaninta kawsarqanku. Paykunaqa kasukuqkun Señor Diospa lliw kamachikuyninkunatapas, unanchayninkunatapas, ahinapin mana huchachanata kawsarqanku.

⁷Manataqmi wawanku karqanchu Elisabet mana wachakuq kasqanrayku, iskayninkupas machu-payañan karqanku.

⁸Dios yupaychana wasipi paypa t'aqanman ruwana tupamuqtinmi Zacariasqa huk kuti Diospa qayllanpi servishaqtin,

⁹sacerdotekunaq ruwananman hina, sorteopi Zacariasman tuparqan Señor Dios yupaychana wasi Ch'uya Cheqasman haykuspa inciensota q'apachinanpaq.

¹⁰Llapan runakunataq incienso q'apachina horasta Diosmanta patiopi mañakusharqanku.

¹¹Hinaqtinmi Señor Diospa angelninqa Zacariasman rikhurirqan incienso q'apachina altarpa paña ladonpi sayashaq.

¹²Zacariastaq payta rikuspa mancharisqa muspharqanraq.

¹³Hinan angelqa payta nirqan: — Zacarías, ama mancharikuychu, mañakusqaykitaqa Diosmi qosunki, warmiyki Elisabetmi qhari wawata wachakunqa, hinan Juanta sutichanki.

¹⁴Anchatapunin kusichisunki, askhataqmi nacesqanmantaqa q'ochukunqaku.

¹⁵Diospa ñawpaqenpin ancha reqsisqa kanqa. Manan vinotapas ima machanatapas ukyanqachu, mamanpa wiksanpi kashasqanmantapachan Santo Espirituwan hunt'a kanqa.

¹⁶Askha Israel runakunatan Señor Diosninkuman kutirichinqa.

¹⁷Juanqa Señorpa ñawpaqentan rinqa profeta Elías hina ancha kallpayoq atiyniyoq ima. Paymi taytakunata wawakunatawan allipunachinqa, mana kasukuqkunatapas chaninta kawsanankupaq yachachinqa. Ahinatan runakunata wakichinqa Señorta chaskinankupaq, nispa.

¹⁸Zacariastaq angelta nirqan: — ¿Imaynapitaq niwasqaykiqa cheqaq kasqanta yachasaq? Ñoqaykuqa sinchi machu-payañan kayku, nispa.

¹⁹Chaymi angelqa payta nirqan: — Ñoqaqa Diospa kamachin Gabrielmi kani, paymi qanman rimaykuspa kay kusikuy simikunata willaykunaypaq kachamuwan.

²⁰Qanman nisqay simikunaqa tiemponpipunin hunt'akunqa, qanmi ichaqa mana creenkichu, chayraykun upayanki manan rimayta atinkichu wawayki nacemunankama, nispa.

²¹Chaykamataq runakunaqa Zacariasta hawapi suyasharqanku. Paykunaqa Dios yupaychana wasipi unayta kamuqtinmi muspharqanku.

²²Lloqsimuspataq, paykunata mana rimapayayta atirqanchu, chaymi repararqanku Dios yupaychana wasipi rikhuriyta rikumusqanta. Payqa upayapuspanmi makillanwanña rimarqan.

²³Servinan p'unchaykuna hunt'akuqtintaq wasinta ripurqan.

²⁴Chaykuna qhepatataq warmin Elisabetqa wiksallikapurqan, hinaspan phisqa killata wasillapi karqan.

²⁵Payqa nirqanmi: — Kay hinatan Señor Diosqa khuyakuwaspa ruwawan runakunaq p'enqawasqanta ch'inyachinanpaq, nispa.

²⁶Soqta killamantataq, Diosqa ángel Gabrielta kacharqan, Galilea provinciapi Nazaret nisqa llaqtapi tiyaq

²⁷María sutiyoq doncella sipasman, paymi Davidpa mirayninmanta José sutiyoq qhariwan casarakunanpaq rimaykusqaña kasharqan.

²⁸Chay sipaspa kashasqanman haykuspataq angelqa nirqan: — ¡Diospa ancha saminchasqan warmi, napaykuykin! Señor Diosmi qanwan kashan, nispa.

²⁹Paytaq ichaqa angelpa rimapayasqanmanta muspharqan, sonqonpitaq tapukurqan: ¿Imataq chay rimaykuyri? nispa.

³⁰Hinaqtinmi angelqa payta nirqan: — María, ama mancharikuychu, Diosmi sumaqta qhawarimusunki.

³¹Kunanmi wiksallikunki, hinaspan huk qhari wawata wachakunki, paytan Jesusta[1] sutichanki.

³²Paymi ancha allin reqsisqa kanqa, Ancha Hatun Diospa Churin nisqan kanqa. Señor Diosmi ñawpa taytan Davidpa kamachikunanpi churanqa.

³³Hinan Jacobpa mirayninta wiñaypaq kamachinqa, kamachikuynintaq mana tukukuq kanqa, nispa.

³⁴Chaymi Mariaqa angelta nirqan: — Qhariwan manaraq kashaspayqa, ¿imaynataq wawayoq kayman? nispa.

³⁵Angeltaq payta nirqan: — Santo Espiritun qanman uraykamunqa, Ancha Hatun Diosmi atiyninwan p'istuykusunki, chaymi naceq wawaqa Diospaq t'aqasqa kanqa, Diospa Churin sutichasqataq kanqa.

³⁶Aylluyki Elisabetpas paya kayninpiñan qhari wawata wiksallikun. Paytaqa “Mana wachakuq” nirqankun, ichaqa kunanwanmi soqta killaña wiksallikusqan.

³⁷Diospaqqa manan imapas mana atikuqqa kanchu, nispa.

³⁸Chaymi Mariaqa nirqan: — Señor Diospa warmi kamachinmi kani, nisqaykiman hina Diosqa ñoqawan ruwachun, nispa. Angeltaq qayllanmanta ripurqan.

³⁹Chay p'unchaykunapin Mariaqa Judea orqo-orqoneqpi huk llaqtaman usqhaylla rirqan.

⁴⁰Zacariaspa wasinman haykuspataq Elisabet-ta napaykurqan.

⁴¹Mariaq napaykusqanta Elisabet uyariqtin hinataq, wiksanpi wawaqa “wat'ak” nirqan. Hinan Santo Espirituqa Elisabetman hunt'aykurqan,

⁴²chaymi kunkayoqta nirqan: — Llapan warmikunamanta aswan saminchasqan kanki, saminchasqataqmi qanmanta nacemuq wawapas.

⁴³Ñoqapaqqa ancha samin Señorniypa maman watukamuwayninqa.

⁴⁴Napaykuwasqayki simita uyariqtiy hinan, wiksaypi wawaqa kusisqa “wat'ak” nirqan.

⁴⁵Señor Diospa nisqasuykin hunt'akunqa, chayta creespan kusisamiyoq kanki, nispa.

⁴⁶Chaymi Mariaqa nirqan: Almaymi Señor Diosta hatunchan,

⁴⁷sonqoytaq Qespichiqniy Diospi kusikun.

⁴⁸Kay kamachin wakcha warmitan qhawariwarqan, kunanmantaqa lliw miraykunan “kusisamiyoqmi” niwanqaku,

⁴⁹hatun ruwaykunata Atiyniyoq Dios ruwapuwasqanrayku. “Ch'uya” nisqan sutinqa.

⁵⁰Diosqa manchakuqninkunatan miray-miraykama khuyapayan.

⁵¹Makinwanmi atiyninta rikuchirqan, anchaykachaqkunatan ch'eqerichirqan.

⁵²Atiyniyoqkunatan kamachikushaqtin wikch'urqan, wakchakunatataq hoqarispa hatuncharqan.

⁵³Yarqasqakunatan allinkunawan saksachirqan, qhapaqkunatataq mana imayoqta kutirichirqan.

⁵⁴Khuyapayaspanmi Israel kamachinta yuyarispa yanaparqan,

⁵⁵Abrahampa miraynintan ñawpa taytanchiskunaman prometesqanman hina wiñaypaq khuyapayarqan, nispa.

⁵⁶Mariataq kinsa killata hina Elisabetwan qhepakurqan, chaymantataq wasinta kutipurqan.

⁵⁷Elisabetpa wachakunan killa hunt'akuqtintaq, qhari wawata wachakurqan.

⁵⁸Chaymi wasimasinkuna ayllunkunapiwan Diospa ancha khuyapayasqanta uyarispa paywan kusikurqanku.

⁵⁹Pusaq p'unchaymantan wawaq qhari-kaynin qarachata señalayman runakunaqa hamurqanku, hinaspan taytanpa sutin Zacariaswan sutichayta munarqanku.

⁶⁰Chaymi mamanqa nirqan: — Manan, Juanmi sutinqa kanqa, nispa.

⁶¹Paytataq nirqanku: — ¿Imanaqtin? Manan pipas aylluykipiqa chay sutiyoqqa kanchu, nispa.

⁶²Hinaspanmi makillankuwan taytanta tapurqanku, ima sutiwanchus wawata sutichayta munasqanta.

⁶³Hinan qelqana tablachata mañakuspa qelqarqan: Juanmi sutinqa, nispa. Lliwtaq utirayarqanku.

⁶⁴Chay ratotaq siminpas kichasqa qallunpas paskasqa kaqtin Diosta yupaychaspa rimarirqan.

⁶⁵Hinan llapan wasimasinkuna mayta mancharikurqanku. Tukuy chaykunataq lliw Judea orqo-orqokunapi willasqa karqan.

⁶⁶Llapan uyariqkunataq chaykunata sonqollankupi yuyaykuspa nirqanku: — ¿Pipunitaq kay wawaqa kanqa? nispanku. Señor Diostaq wawawanpuni kasharqan.

⁶⁷Santo Espiritun Juanpa taytan Zacariasman hunt'aykurqan, chaymi profetizarqan:

⁶⁸Israelpa Señor Diosninqa yupaychasqa kachun, watukamuspa llaqtanta kacharichisqanmanta.

⁶⁹Kamachin Davidpa mirayninmantataq atiyniyoq Qespichiqta kachamuwanchis.

⁷⁰Ch'uya profetankunawanmi Diosqa ñawpaqmantaña prometerqan

⁷¹awqanchiskunamanta qespichiwananchispaq, llapan cheqnikuwaqninchismanta kacharichiwananchispaq.

⁷²Prometellarqantaqmi ñawpa taytanchiskunata khuyapayananpaq, ch'uya rimanakuyninta yuyarikunanpaqwan.

⁷³Diosmi ñawpa taytanchis Abrahamman juraspa prometerqan

⁷⁴awqanchiskunamanta kacharichisqa kananchispaq,

⁷⁵paypa ñawpaqenpi ch'uyata chaninta kawsaspa lliw p'unchayninchiskunapi mana manchakuspa servinanchispaq.

⁷⁶Qantaqmi, wawáy, Ancha Hatun Diospa profetan nisqa kanki. Señor Diospa ñawpaqenta ñanninkunata allichaspan rinki.

⁷⁷Llaqtanpa huchankunatan pampachanqa, ahinapin paykunata qespichinqa, chaytan paykunaman willanki.

⁷⁸Diosninchismi anchata khuyapayawaspanchis hanaq pachamanta Pacha-paqariy k'anchaywan watukamuwasunchis,

⁷⁹laqhayaqpi tiyaqkunatapas, wañuyta manchakuqkunatapas k'anchaykunanpaq, thak kawsay ñanpi pusawananchispaq, nispa.

⁸⁰Wawataq wiñasharqan, yuyaytapas aswan-aswanta hap'isharqan. Ch'inneqpitaq tiyarqan Israel llaqtaman rikuchikunan p'unchaykama.