Read Diospa Simin Qelqa LUCAS 15 Bible Online

LUCAS 15 - Diospa Simin Qelqa bible

LUCAS 15

¹Contribución cobraqkunan huchasapamanta qhawasqakunapiwan Jesusta uyariq llapalla asuykurqanku.

²Chaymi fariseokunaqa kamachikuy simita yachachiqkunapiwan ninakurqanku: — Kayqa huchasapakunatan chaskin, paykunawantaq mikhunpas, nispanku.

³Chaymi Jesusqa kay rikch'anachiy simita paykunaman nirqan:

⁴— Mayqenniykichispas pachak ovejayoq kashaspa, huknin chinkaqtin, ¿manachu isqon chunka isqonniyoqta ch'inneqpi saqeykuspa, chinkaq ovejata maskhaq rinman tarimunankama?

⁵Tarimuspataq kusisqa rikranpi q'epiykakamunman.

⁶Wasinman chayamuspataq, amigonkunata wasi-masinkunatawan huñuykuspa ninman: — Q'ochukusunchis, chinkasqa ovejayta tarikampusqaymanta, nispa.

⁷Niykichismi, chay hinan hanaq pachapipas astawan q'ochukuy kanqa huk huchasapaq Diosman kutirikusqanmanta, isqon chunka isqonniyoq chaninkunamantaqa, paykunaqa manañan Diosman kutirikunankuñachu.

⁸Huk warmiqmi ancha munasqa chunka qolqen karqan. Huknin chinkaqtinqa, ¿manachu lamparanta hap'iykachispa, wasintapas pichaspa tarinankama allintapuni maskhanman?

⁹Tarispataq amigankunata wasi-masinkunatawan huñuspa ninman: Q'ochukusunchis, chinkasqa qolqeyta tarikapusqaymanta, nispa.

¹⁰Niykichismi, chay hinatan Diospa angelninkunaqa q'ochukunku huk huchasapaq Diosman kutirikusqanmanta, nispa.

¹¹Jesusqa nillarqantaqmi: — Huk runan iskay churiyoq karqan.

¹²Sullk'akaqmi taytanta nirqan: — Taytáy, kaqniykimanta tupaqniyta qoykapuway, nispa. Chaymi kaqninmanta paykunaman rakiykapurqan.

¹³Pisi p'unchaykunamantataq sullk'a churiqa lliwta huñuykuspa karu llaqtaman ripurqan. Chaypin mana allinta kawsaspa kaqninta lliwta q'arurqan.

¹⁴Lliwta tukuqtintaq chay suyupi muchuy karqan. Hinan paypas pisichikuspa

¹⁵chay suyupi huk runata valekurqan imallapipas llank'ananpaq, paytaq khuchikunata michiqta chakranman kacharqan.

¹⁶Hinan waynaqa khuchikunaq mikhunanta mikhuykuyta munarqan, manataq pipas chayllatapas qorqanchu.

¹⁷Chaymi yuyayninta hap'ikuspa nirqan: — ¡Taytaypa llapa llank'apakuqninkunaqa puchu-puchu mikhunayoqmi kashanku, ñoqataq kaypi yarqaymanta wañushaniña!

¹⁸Hatarispa taytayman ripusaq, hinaspa nisaq: Taytáy, Dios contran qan contrapiwan huchallikuni,

¹⁹manañan “churíy” niwanaykipaq hinañachu kani, huknin llank'apakuqniykita hinallaña chaskiykuway, nispa.

²⁰Hatarispataq taytanman ripurqan. Karullapiraq kashaqtintaqmi taytanqa payta rikurqan, hinaspan mayta khuyapayaykuspa phawarirqan, oqllaykuspataq much'aykurqan.

²¹Churintaq nirqan: — Taytáy, Dios contran qan contrapiwan huchallikuni, manañan “churíy” niwanaykipaq hinañachu kani, nispa.

²²Taytataq ichaqa kamachinkunata nirqan: — Aswan sumaq p'achata usqhaylla horqomuychis, hinaspa payta p'achachiychis, anillotapas dedonman churaykuychis, usut'atapas chakinman churaychis.

²³Hinallataq wirayachisqa torillotapas apamuspa nak'aychis, mikhuspanchistaq q'ochukusunchis.

²⁴Kay churiyqa wañusqan karqan, kawsarimpuntaq, chinkasqan karqan, tarisqataq kapun, nispa. Chaymi q'ochukuyta qallarirqanku.

²⁵Kurakkaq churintaq chakramanta kutimuspa wasiman qayllaykushaspa tocashaqta tusushaqtawan uyarirqan.

²⁶Hinaspan huk kamachita waqyaspa tapurqan: — ¿Iman kashan? nispa.

²⁷Chaymi payqa nirqan: — Wawqeykin kutimpusqa, taytaykitaqmi wirayachisqa torillota nak'achin, allillanta chaskisqanrayku, nispa.

²⁸Hinan phiñakuspa mana haykuyta munarqanchu. Chaymi taytanqa lloqsimuspa haykunanpaq rogarqan.

²⁹Paytaq ichaqa taytanta nirqan: — Qhawariy, kay tukuy watañan serviyki mana hayk'aqpas kamachikuyniykita p'akispa, chaywanpas manan hayk'aqpas huk cabrachallatapas qowarqankichu amigoykunawan q'ochukunaypaq.

³⁰Ichaqa, rabona warmikunawan purispa kaqniykita tukuq churiyki chayamuqtintaq, wirayachisqa torillotaraq nak'achisqanki, nispa.

³¹Hinaqtinmi taytanqa nirqan: — Churíy, qanqa ñoqawanpunin kashanki, tukuy kaqniykunapas qanpapunin.

³²Kay wawqeykiqa wañusqa kashaspan kawsarimpun, chinkasqa kashaspan tarisqa kapun, chayraykun q'ochukuspa kusikunanchispuni, nispa.