Read Diospa Simin Qelqa LUCAS 17 Bible Online

LUCAS 17 - Diospa Simin Qelqa bible

LUCAS 17

¹Jesusmi yachachisqankunata nirqan: — Runakunata misk'achiqkunaqa kanqapunin, ichaqa, ¡ay, chay misk'achiq runamanta!

²Paypaqqa aswan allinmi kanman karqan molino rumita kunkanman warkuykuspa lamar-qochaman wikch'uykuyninku kay huch'uykunamanta hukninta huchaman urmachinanmantaqa.

³Chhaynaqa, kikiykichista cuidakuychis. Wawqeyki qan contra huchallikuqtinqa payta anyaykuy, huchanta reqsikuqtintaq pampachaykuy.

⁴Huk p'unchaypi qanchis kuti qan contra huchallikuspa, qanchis kutillatataq chay p'unchaypi asuykamusunkiman: — Huchallikunin pampachaykuway nispa chayqa, pampachankin payta, nispa.

⁵Apostolkunataq Señor Jesusta nirqanku: — Astawan iñinaykupaq yanapaykuwayku, nispa.

⁶Hinan Señor Jesusqa nirqan: — Huk mostaza ruru sayayllapas iñiyniykichis kanman chayqa, kay sicómoro sach'ata niwaqchismi: T'irakuspa lamar-qochapi mallkikamuy, nispa, hinan kasusunkichisman.

⁷Kamachiykichista yapumusqanmantapas uywa michimusqanmantapas kutimuqtinqa, ¿mayqenniykichistaq niwaqchis: Asuykamuy, tiyaykuy, mikhunaykipaq, nispa?

⁸Manan mayqenniykichispas niwaqchischu, aswanqa niwaqchismi: Cenayta wayk'umuy, p'achaykita allichakuspataq servimuway, mikhuyta ukyayta, tukunaykama, chaymantaña qanqa mikhunkipas ukyankipas, nispa.

⁹Chay kamachitaqa manan “gracias” nillanpaschu kamachisqanta ruwasqanmantaqa.

¹⁰Chay hinallataq qankunapas tukuy kamachisqakunata ruwaspaykichisqa, ninkichis: — Kay hina kamachiykikunallan kayku, ima ruwanallaykutan ruwapuykiku, nispa.

¹¹Jerusalén llaqtata Jesús rishaspataqmi, Galilea provinciawan Samaria provinciawan tupay qorpanta pasarqan.

¹²Hinan huk huch'uy llaqtaman haykushaqtin, chunka runa lepra onqoyniyoq payman hamurqanku. Karullapi sayaykuspataq

¹³kunkayoqta waqyakurqanku: — ¡Yachachikuq Jesús, khuyapayaykuwayku! nispa.

¹⁴Jesustaq paykunata qhawarispa nirqan: — Riychis, sacerdotekunawan qhawachikamuychis, nispa. Rishaqtinkutaqmi qhaliyasqa karqanku.

¹⁵Chaymi hukninku qhaliyasqa kasqanta rikukuspa kutirqamurqan alto kunkawan Diosta yupaychaspa.

¹⁶Hinaspa Jesuspa ñawpaqenpi pampakama k'umuykuspa graciasta qorqan. Payqa Samaria runan karqan.

¹⁷Jesustaq nirqan: — ¿Manachu qhaliyasqakunaqa chunka karqanku? ¿Maypitaq isqonri?

¹⁸¿Kay wak llaqtayoq runallachu Diosta hatunchaqqa kutimun? nispa.

¹⁹Chay runatataq nirqan: — Sayarispa ripuy, Diospi iñiyniykin qhaliyachisunki, nispa.

²⁰Hayk'aqchus Diospa qhapaqsuyun hamunanmanta fariseokuna tapuqtinkutaq Jesusqa nirqan: — Diospa qhapaqsuyun hamunantaqa manan señalkunawanraqchu yachawaqchis,

²¹manataqmi ninkumanchu: — ¡Kaypin kashan! ¡Haqaypin kashan! nispapas. Diospa qhapaqsuyunqa qankunawanñan kashan, nispa.

²²Yachachisqankunatataq nirqan: — Tiempon chayamunqa Runaq Churinpa kay pachaman kutimunan punch'ayta rikuyta munanaykichispaq, manataqmi rikuyta atinkichischu.

²³Hinan runakunaqa nisunkichis: ¡Kaypin kashan! ¡Haqaypin kashan! nispa. Ichaqa aman kasunkichischu, amataqmi qhepankutapas rinkichischu.

²⁴Imaynan rayoqa tukuy hinantinman lliphllikispa k'ancharin, chay hinallataqmi Runaq Churinpa kutimuyninpas kanqa.

²⁵Ichaqa ñawpaqtaraqmi sinchita ñak'arinan, hinaspataq kay tiempo runakunaq ñak'arichisqan kanan.

²⁶Imaynan Noepa p'unchayninkunapi karqan, chay hinallataqmi Runaq Churinpa kutimunanpaqpas kanqa.

²⁷Arcaman Noepa haykusqan p'unchaykaman mikhusharqanku, ukyasharqanku, casarakusharqanku, casarakunapaq rimanakusharqanku, millp'uq para unu chayamuspataq llapallanta millp'urqan.

²⁸Kaqllataqmi Lotpa p'unchayninkunapipas karqan, mikhusharqanku, ukyasharqanku, rantisharqanku, vendesharqanku, tarpusharqanku, wasita sayarichisharqanku.

²⁹Lotpa Sodoma llaqtamanta lloqsimusqan p'unchaymi ichaqa, cielomanta azufreyoq nina para chayamurqan, hinaspan llapallanta p'uchukachirqan.

³⁰Chay hinallataqmi kanqa Runaq Churinpa rikhurimusqan p'unchaypipas.

³¹Chay p'unchaypiqa wasi patapi kaqqa amaña uraykuchunchu wasipi kaqninkunata horqonanpaq, chhaynallataq chakrapi kaqpas wasinman ama kutimuchunñachu.

³²Lotpa warminta imachus sucedesqanta yuyariychis.

³³Pipas kawsayninta waqaychakuyta munaqqa chinkachinqan, pipas kawsayninta chinkachiqmi ichaqa wiñaypaq kawsanqa.

³⁴Niykichismi, chay tutapin huk puñunapi iskay puñushanqaku. Hukninmi apasqa kanqa, huknintaq saqesqa.

³⁵Iskay warmin kuska kutashanqaku. Hukninmi apasqa kanqa, huknintaq saqesqa. [

³⁶Iskay runan chakrapi kashanqaku. Hukninmi apasqa kanqa, huknintaq saqesqa],[5] nispa.

³⁷Chaymi uyariqkunaqa payta tapurqanku: — Señor, ¿maypitaq chaykunari kanqa? nispa. Hinan paykunata nirqan: — Maypichus wañusqa kashanqa chaymanmi kunturkunapas huñunakunqa, nispa.