Read Diospa Simin Qelqa LUCAS 18 Bible Online

LUCAS 18 - Diospa Simin Qelqa bible

LUCAS 18

¹Mana chiriyaspa mañakunapuni kasqanta yachachispanmi Jesusqa huk rikch'anachiy simita paykunaman nirqan:

²— Huk llaqtapin karqan huk juez Diostapas mana manchakuq, runatapas mana respetaq.

³Kallarqantaq chay llaqtapi huk viudapas. Paymi sapa kuti juezman riq awqanmanta librananpaq chaninchayta mañakuspa.

⁴Chaymi juezqa unayña mana chaninchayta munashaspapas sonqonpi nirqan: — Diosta mana manchakushaspaypas, runata mana respetashaspaypas,

⁵hinata kay viudapaq qatiykachawasqanrayku chaninchapusaq, amaña hamupayawaspa pacienciayta tukuwananpaq, nispa.

⁶Señor Jesusqa nillarqantaqmi: — Uyariychis chay mana chanin juezpa nisqanta.

⁷¿Diosqa manachu akllakusqankunaq tuta-p'unchay mañakusqankuta chaninchapunman? ¿Payqa unaytachu suyachikunman?

⁸Manan, usqhayllan paykunapaq chaninchapunqa. Ichaqa Runaq Churin hamuspa, ¿Diospi iñiq runakunata kay pachapi tarinqachu? nispa.

⁹Chanin runaman tukuspa hukkunata pisichaqkunamanmi kay rikch'anachiy simitapas Jesusqa nillarqantaq:

¹⁰— Iskay runan Dios yupaychana wasiman wicharqan mañakuq. Hukninmi karqan fariseo, huknintaq contribución cobraq.

¹¹Fariseon sayaykuspa kay hinata mañakurqan: Diosníy, graciastan qoyki, manan wakin runakuna hinachu kani suwakuq, mana chanin, wasanchaq, manallataq kay contribución cobraq hinapaschu kani.

¹²Iskay kutitan semanapi ayunani, tukuy ima tarisqaymantan diezmotapas qoyki, nispa.

¹³Contribución cobraqtaq ichaqa karullapi sayaykuspa hanaq pachata qhawariyllatapas mana munarqanchu, aswanmi llakikuymanta qhasqonta takakuspa mañakurqan: Diosníy, ñoqa huchasapata khuyapayaykuway, nispa.

¹⁴Niykichismi, chay contribución cobraqmi wasinta Diospa chaninchasqan kutipurqan, manataqmi fariseochu. Pipas hatunchakuqqa k'umuykachisqan kanqa, k'umuykukuqtaqmi hatunchasqa kanqa, nispa.

¹⁵Jesusmanmi wawakunata pusamurqanku llamiykunanpaq, yachachisqankunataq chayta rikuspa paykunata phiñarirqanku.

¹⁶Jesustaq paykunata nirqan: — Wawakunaqa hinalla ñoqaman hamuchunku, ama paykunata hark'aychischu, Diospa qhapaqsuyunqa kay wawakuna hina kaq runakunallapaqmi.

¹⁷Cheqaqtan niykichis, pipas wawa hina Diospa qhapaqsuyunta mana chaskiqqa, manan chayman haykunqachu, nispa.

¹⁸Huk umalli runan Jesusta tapurqan: — Allin yachachikuq, ¿imatan ruwasaq wiñay kawsayniyoq kanaypaq? nispa.

¹⁹Hinan Jesusqa payta nirqan: — ¿Imaraykun “allin” niwanki? Manan pipas kanchu “allinqa”, aswanpas sapan Diosllan.

²⁰Diospa kamachikuy siminkunataqa yachankin riki: “Aman wasanchankichu. Aman pitapas wañuchinkichu. Aman suwakunkichu. Aman llullakuspa tumpankichu. Taytaykita mamaykita allinta respetanki”, nisqata, nispa.

²¹Hinan payqa Jesusta nirqan: — Tukuy chaykunataqa waynacha kasqaymantapachan hunt'arqani, nispa.

²²Jesustaq chayta uyarispa payta nirqan: — Kanraqmi ruwanayki, llapan kaqniykita vendemuspa wakchakunaman qomuy, hinan hanaq pachapi qhapaq kayniyki kanqa, hinaspa qhepayta hamuy, nispa.

²³Hinaqtinmi chay runaqa chaykunata uyarispa anchata llakikurqan, sinchi qhapaq kasqanrayku.

²⁴Jesustaq ancha llakisqa kasqanta rikuspa nirqan: — May sasapunin qhapaqkunapaqqa Diospa qhapaqsuyunman haykuyqa kanqa.

²⁵Camelloraqmi yawriq ninrinta suchuyta atinman Diospa qhapaqsuyunman qhapaqpa haykunanmantaqa, nispa.

²⁶Hinan chayta uyariqkunaqa nirqanku: — Chhaynaqa, ¿pillañataq qespichisqaqa kanman? nispa.

²⁷Chaymi Jesusqa nirqan: — Runakunapaqqa mana atinan, Diospaqmi ichaqa atikun, nispa.

²⁸Hinaqtinmi Pedroqa nirqan: — Ñoqaykuqa lliw imaymanaykuta saqespan qhepaykita hamuyku, nispa.

²⁹Chaymi Jesusqa paykunata nirqan: — Cheqaqtan niykichis: Pipas wasinta, tayta-mamanta, wawqenkunata, warminta, wawankunata, Diospa qhapaqsuyunrayku saqemuqqa,

³⁰kay tiempopin ancha askhata chaskinqa, qhepa tiempopitaq wiñay kawsayta chaskinqa, nispa.

³¹Jesusqa chunka iskayniyoq yachachisqankunata sapaqman pusaspan nirqan: — Kunanqa Jerusalén llaqtamanmi wicharishanchis, Runaq Churinmanta profetakunaq lliw qelqasqanmi hunt'akunqa.

³²Mana judío runakunamanmi hap'ichisqa kanqa, paykunan asipayanqaku, k'aminqaku, thoqaykunqaku ima.

³³Suq'aykusqanku qhepatataq wañuchinqaku, ichaqa kinsakaq p'unchaypitaq kawsarimpunqa, nispa.

³⁴Paykunataq mana chaykunata entienderqankuchu, manataq yacharqankuchu imamantachus rimasqantapas.

³⁵Jericó llaqtaman Jesusqa sispaykushaqtinmi, huk ñawsa ñan patapi limosnata mañakuspa tiyasharqan.

³⁶Askha runaq purisqanta uyarispataq imachus kasqanta tapukurqan.

³⁷Nazaret llaqtayoq Jesuspa purishasqanta willaqtinkutaq

³⁸ñawsaqa waqyakurqan: — ¡Davidpa churin Jesús, khuyapayaykuway! nispa.

³⁹Ñawpaqta riqkunataq phiñarikurqanku upallananpaq. Ñawsataq ichaqa aswantaraq waqyakurqan: — ¡Davidpa churin Jesús, khuyapayaykuway! nispa.

⁴⁰Chaymi Jesusqa sayaykuspa kamachikurqan pusamunankupaq. Asuykamuqtintaq payta tapurqan:

⁴¹— ¿Ima ruwapunaytan munanki? nispa. Ñawsataq nirqan: — Señor, qhawarichiwanaykitan munani, nispa.

⁴²Jesustaq payta nirqan: — Qhawariy, Diospi iñiyniykin qhaliyachisunki, nispa.

⁴³Hinan kaq rato qhawarirqan, chaymi Jesuspa qhepanta ripurqan Diosta hatunchaspa. Llapa runataq chayta rikuspa Diosta yupaycharqanku.