Read Diospa Simin Qelqa LUCAS 5 Bible Online

LUCAS 5 - Diospa Simin Qelqa bible

LUCAS 5

¹Genesaret qocha patapi Jesús kashaqtinmi, runakunaqa payman mat'ipakurqanku Diospa siminta uyarinankupaq.

²Jesustaq qocha patapi iskay boteta rikurqan. Challwaqkunan botekunamanta uraykamuspa llikankuta t'aqsasharqanku.

³Jesusmi Simonpa botenman haykuspa valekurqan qocha ukhuman asllata apaykunanpaq. Hinaspan tiyaykuspa botemantapacha runakunata yachachimurqan.

⁴Rimayta tukuspataq Simonta nirqan: — Aswan qocha ukhuneqman haykuspa llikaykichista wikch'uykuychis challwanapaq, nispa.

⁵Simontaq payta nirqan: — Yachachikuq, tutantinmi llank'arqayku manataqmi imallatapas hap'imurqaykuchu, aswanpas nisqaykiman hina llikata wikch'uykusaq, nispa.

⁶Wikch'uykuspataq askha challwata hap'irqanku, hinan llikankuraq yaqa llik'ikurqan.

⁷Chaymi huknin botepi kaq challwaq-masinkuta makinkuwan waqyarqanku yanapaq hamunankupaq, hamuqtinkutaq iskaynin boteman hunt'achirqanku yaqa chinkaykunankukama.

⁸Simón Pedrotaq chayta rikuspa Jesuspa ñawpaqenpi qonqoriykukurqan: — Señorníy, huchasapa runan kani, anchhuriykuy ñoqamanta, nispa.

⁹Challwa hap'isqankumantan Simonqa paywan kaqkunapiwan anchatapuni mancharikurqanku.

¹⁰Mancharikullarqankutaqmi Simonpa challwaq-masin Zebedeoq churinkuna Jacobowan Juanpiwan. Jesustaq Simonta nirqan: — Ama mancharikuychu, kunanmantaqa runakunata challwaqmi kanki, nispa.

¹¹Hinan botekunata qocha pataman chayachispanku lliwta saqespa Jesuspa qhepanta ripurqanku.

¹²Huk llaqtapi Jesús kashaqtinmi, lepra onqoypa tukusqan runa hamurqan, paymi Jesusta rikuspa pampakama k'umuykukuspa rogakurqan: — Señor, munanki chayqa atinkin qhaliyachiwayta, nispa.

¹³Chaymi Jesusqa makinta haywarispa llamiykurqan: — Munanin, qhali kapuy, nispa. Rimariqtin hinataq chay onqoyqa chinkapurqan.

¹⁴Hinan Jesusqa kamachirqan: — Aman pimanpas willakunkichu, aswanpas rispayki sacerdotewan qhawachikamuy, Moisespa kamachikusqanman hina qhaliyasqaykimanta ofrendata haywamuy, chaymi qhaliyasqaykita llapa yachanqaku, nispa.

¹⁵Chaywanpas aswantaraqmi Jesusmantaqa uyarikurqan. Askha runakunataq huñukamurqanku Jesusta uyarinankupaq, onqoyninkumanta qhaliyachisqa kanankupaqwan.

¹⁶Jesustaq ch'inneqman rispa Diosmanta chaypi mañakamuq.

¹⁷Huk p'unchay Jesús yachachishaqtinmi fariseokunaqa kamachikuy simita yachachiqkunapiwan tiyasharqanku. Paykunan Galilea provincia huch'uy llaqtakunamanta, Judea hap'iymanta Jerusalén llaqtamantawan hamusqaku. Señor Diospa atiynintaq Jesuspi kasharqan onqosqakunata qhaliyachinanpaq.

¹⁸Hinan wakin runakunaqa such'u runata puñunapi wantumuspanku Jesuspa ñawpaqenman churaykunankupaq apaykuytapuni munarqanku.

¹⁹Askha runakuna kasqanrayku mana maynintapas apaykuyta atispataq, wasi pataman wicharqanku, hinaspan t'oqospa paykuna chawpiman, Jesuspa ñawpaqen cheqasman puñunantinta warkuykurqanku.

²⁰Jesustaq iñisqankuta rikuspa such'uta nirqan: — Runa, huchaykikunatan pampachayki, nispa.

²¹Hinaqtinmi kamachikuy simita yachachiqkunaqa fariseokunapiwan sonqonkupi yuyaykurqanku: ¿Pitaq kayri Diosta pisichaspa riman? ¿Pitaq huchakunata pampachaytari atinman? ¿Manachu Dioslla? nispanku.

²²Chay hina yuyaykusqankuta yachaspan Jesusqa paykunata nirqan: — ¿Imaraykun chay hinata sonqoykichispi yuyaykunkichis?

²³¿Mayqentaq aswan atikuq: Huchaykikunatan pampachayki, niychu, icha: Sayarispa puriy, niytaqchu?

²⁴Yachanaykichispaqpas Runaq Churinqa atiyniyoqmi, kay pachapi huchakunata pampachananpaq, chayta nispataq such'uta nirqan: — Qantan niyki: Hatariy, puñunaykita hoqarispa wasiykita ripuy, nispa.

²⁵Chaymi rikushaqtinku such'uqa puñunanta hoqarispa wasinta ripurqan, Diosta hatunchaspa.

²⁶Llapankutaq musphaspanku Diosta hatuncharqanku. Hinaspan ancha mancharisqa nirqanku: — Kunan p'unchaymi mana hayk'aq rikusqanchiskunata rikunchis, nispanku.

²⁷Chaykuna qhepatataq Jesusqa lloqsimuspa Leví sutiyoq runata contribución cobrashaqta rikurqan, contribución cobrana cheqaspi sisata cobrashaqta, hinaspan nirqan: — Qhepayta hamuy, nispa.

²⁸Lliwta saqespataq sayarispa Jesuspa qhepanta ripurqan.

²⁹Hinaspan Leviqa hatun mikhuyta wasinpi haywarqan, askhataq contribución cobraqkunapas hukkunapas paykunawan mikhuq tiyaykurqanku.

³⁰Kamachikuy simita yachachiqkunataq fariseokunapiwan Jesuspa yachachisqankuna contra rimaspa nirqanku: — ¿Imaraykun contribución cobraqkunawan huchasapakunapiwan mikhunkichispas ukyankichispas? nispa.

³¹Chaymi Jesusqa paykunata nirqan: — Qhalikunaqa manan hampiqta necesitankuchu, aswanpas onqosqakunallan necesitanku.

³²Manan chanin runakunata waqyaqchu hamurqani, aswanpas huchasapakunata Diosman kutirichinaypaqmi, nispa.

³³Hinaqtinmi paykunaqa Jesusta nirqanku: — ¿Imaraykun Juanpa yachachisqankunapas fariseokunaq yachachisqankunapas sapa kuti ayunanku mañakunku, yachachisqaykikunataq mana ayunaspa mikhunkupas ukyankupas? nispa.

³⁴Jesustaq paykunata nirqan: — ¿Casamientoman invitasqakunataqa, ayunachinkumanchu novio paykunawan kashaqtinqa? Manan.

³⁵Ichaqa chayamunqan p'unchaykuna, noviota aparqoqtinku ayunanankupaq, nispa.

³⁶Huk rikch'anachiy simitapas paykunaman nillarqantaqmi: — Manan pipas mosoq p'achata llik'ispaqa mawk'a p'achaman siranmanchu, chay hinata ruwaqtinqa mosoq remiendon llik'inman, mosoq remiendoqa manan allinchu mawk'a p'achapaqqa.

³⁷Manan pipas upi vinotaqa mawk'a odrekunaman hillp'unchu, chay hina kaqtinqa, upi vinon poqospa odrekunata phatachinman, vinopas hich'akunman, odrekunapas llik'ikapunman.

³⁸Aswanmi upi vinotaqa mosoq odrekunaman hillp'unku.

³⁹Pipas poqosqa vinota malliykuspaqa manan upi vinotaqa munanñachu. Payqa ninmi: Poqosqan aswan sumaqqa, nispa.