Read Diospa Simin Qelqa LUCAS 7 Bible Online

LUCAS 7 - Diospa Simin Qelqa bible

LUCAS 7

¹Runakunaman lliwta yachachisqan qhepatataq Jesusqa Capernaúm llaqtaman haykurqan.

²Chaypin Roma soldado capitanpa munasqa kamachin onqosharqan, yaqañan wañupusharqan.

³Hinan capitanqa Jesusmanta uyarispa judío runakunamanta wakin kurak runakunata payman kacharqan kamachinta qhaliyachinanpaq rogakuqta.

⁴Paykunataq Jesusman asuykuspa tukuy sonqowan rogakuspa nirqanku: — Payqa yanapaykunaykipaq hinan.

⁵Payqa suyunchista munakunmi, hinaspan Sinagogata sayarichipuwarqanku, nispa.

⁶Hinan Jesusqa paykunawan rirqan. Wasinman chayashaqtinkuñataq capitanqa amigonkunata Jesusman kacharqan kay hinata nimunankupaq: — Señorníy, amaña hamuychu, ¿pitaq ñoqari kani wasiyman haykuykamunaykipaq?

⁷Manan qanman hamunaypaq hinachu kani. Rimarimullay, hinan kamachiyqa qhaliyarqapunqa.

⁸Ñoqaqa kamachina runan kani, hinallataq soldadokunata kamachini. Chaymi hukninta “Riy” niqtiy, rin. Hukninta “Hamuy” niqtiypas, hamun. Kamachiypas “Kayta ruway” niqtiy, ruwan, nispa.

⁹Jesustaq chayta uyarispa chay capitanmanta muspharqan, hinaspan kutirispa qhepan hamuq runakunata nirqan: — Niykichismi, manan Israel runakunapipas kay hina iñiyniyoq runataqa tarirqanichu, nispa.

¹⁰Kachamusqakuna capitanpa wasinman kutipuspankutaq onqosqa kamachitaqa qhalitaña tarirqanku.

¹¹Chaymantataq Jesusqa Naín nisqa llaqtata rirqan yachachisqankunawan askha runakunapiwan.

¹²Hinaspanmi llaqta punkuman qayllaykushaqtin, llaqtamanta askha runakuna viudata hamuysirqanku. Paykunan viudaq sapallan churin wañusqata wantumusharqanku.

¹³Hinan Señor Jesusqa viudata rikuspa khuyapayaykuspa nirqan: — Ama waqaychu, nispa.

¹⁴Asuykuspataq aya wantunata llamiykurqan, wantuqkuna sayaykachiqtintaq nirqan: — ¡Wayna, qantan niyki, sayariy! nispa.

¹⁵Chaymi wañuq waynaqa sayarispa rimarirqan. Jesustaq payta mamanman qopurqan.

¹⁶Hinan llapanku mancharikuspa Diosta hatunchaspa nirqanku: — Huk hatun profetan ñoqanchis ukhupi rikhurin, Diosmi llaqtanta watukamun, nispanku.

¹⁷Jesuspa chay ruwasqanmi Judea provinciantinpi lliw muyuriqnintinpiwan uyarikurqan.

¹⁸Tukuy chaykunatataq Juanpa yachachisqankunaqa Juanman willamurqanku, chaymi payqa iskay yachachisqankunata waqyaspa,

¹⁹Jesusman kacharqan tapumunankupaq: — ¿Qanchu kanki Diospa kachamusqan? Icha, ¿huktataqchu suyakusaqku? nispa.

²⁰Hinan yachachisqakunaqa Jesusman qayllaykuspa nirqanku: — Bautizaq Juanmi qan tapuqta kachamuwanku: ¿Qanchu kanki Diospa kachamusqan? Icha, ¿huktataqchu suyakusaqku? nispa.

²¹Chay raton qhaliyachirqan askha onqosqakunata, nanayniyoqkunata, millay supaypa ñak'arichisqankunatapas, askha ñawsakunatataq qhawarichirqan.

²²Hinaspan Jesusqa paykunata nirqan: — Kutispa Juanman willamuychis rikusqaykichista, uyarisqaykichistawan. Ñawsakunan qhawarin, wist'ukunan puririn, lepra onqoyniyoqkunan qhaliyan, roqt'ukunan uyarin, wañusqakunan kawsarimpun, wakchakunamantaq allin willakuykuna willakun.

²³Kusisamiyoqtaqmi ñoqamanta mana p'enqakuqqa, nispa.

²⁴Juanpa kachamusqankuna kutipuqtintaq Jesusqa Juanmanta runakunata tapurqan: — ¿Ima qhawaqtaq ch'inneqman rirqankichis? ¿Wayraq chhaphchiykachasqan soqos qhawaqchu rirqankichis?

²⁵Icha, ¿ima qhawaqchu rirqankichis? ¿Sumaq p'achawan p'achasqa runa qhawaqchu? Sumaq p'achawan p'achakuqkunapas aycha kusichiyllapi kawsaqkunapas reykunaq wasinpin kashanku riki.

²⁶¿Ima qhawaqpunitaq rirqankichis? ¿Profeta qhawaqchu? Arí, profeta qhawaqmi. Niykichismi payqa profetamantapas aswan kurakmi.

²⁷Paymantan Diospa Simin Qelqaqa nin: “Willaqniytan ñawpaqeykita kachani, paymi ñanta hamunaykipaq allichanqa”, nispa.

²⁸Niykichismi, warmimanta nacemuqkuna ukhupiqa Bautizaq Juanmanta aswan kurak profetaqa manan kanchu. Ichaqa, Diospa qhapaqsuyunpiqa aswan huch'uy kaqmi Juanmanta aswan kurak, nispa.

²⁹Hinan llapan runakuna, contribución cobraqkunapas Jesuspa nisqanta uyarispanku yacharqanku Diospa chanin kasqanta. Paykunaqa ñan Juanpa bautizasqanña karqanku.

³⁰Ichaqa fariseokunataq kamachikuy simita yachachiqkunapiwan kikinkupaq Diospa munayninta wikch'uykukuspanku Juanwan mana bautizachikurqankuchu.

³¹Jesusqa nillarqantaqmi: — ¿Imamantaq rikch'achisaq kay miray runakunata? ¿Imamantaq rikch'akunku?

³²Rikch'akunmi plazapi tiyaykuspa waqyanakuq erqekunaman. Paykunan waqyanakunku: — Qenatan tocapuykiku, manataq tusunkichischu, llakiy-llakiy takitan takipuykiku, manataq waqankichischu, nispa.

³³Bautizaq Juanmi hamurqan, payqa manan t'antata mikhuqchu, manallataq vinotapas ukyaqchu, chaymi nirqankichis: Supaypa hunt'aykusqanmi kashan, nispa.

³⁴Runaq Churinmi hamurqan hinaspan mikhurqan ukyarqan, ninkichistaq: Kayqa rakrapun, machaqmi, contribución cobraqkunaq, huchasapamanta qhawasqakunaq amigonmi, nispa.

³⁵Yachaypa chanin kasqantaqa wawankunallan reqsichin, nispa.

³⁶Huk fariseon Jesusta waqyarqan paywan mikhunanpaq. Hinan fariseoq wasinman haykuspa mikhuq tiyaykurqan.

³⁷Llaqtaq reqsisqan huchasapa warmitaq fariseoq wasinpi mikhunanpaq Jesusqa tiyaykusqanta yachaspa, yuraq rumi p'uyñuchapi q'apaq hawinantin haykurqan.

³⁸Hinaspan Jesuspa chakin qayllapi qonqoriykukurqan, waqaspataq weqenwan chakinta ch'aqchurqan, hinaspan chukchanwan ch'akichirqan, chakintapas much'aykuspataq q'apaq hawinawan hawiykurqan.

³⁹Waqyaqnin fariseotaq chayta rikuspa sonqonpi nirqan: Kayqa profeta kanman chayqa, llamiqnin huchasapa warmi pichus kasqantapas imayna kasqantapas yachanmanchá, nispa.

⁴⁰Hinaqtinmi Jesusqa payta nirqan: — Simón, hukta nisqayki, nispa. Paytaq: — Niway, yachachikuq, nirqan.

⁴¹Huk qolqe manuqpan iskay manukuqnin karqan, hukninmi phisqa pachak qolqe manu, huknintaq phisqa chunka manu.

⁴²Mana imankupas kutichipunankupaq kaqtintaq, manuqqa iskayninkuta pampachapurqan. Niway, ¿mayqenninkutaq astawanqa payta munakunqa? nispa.

⁴³Hinan Simonqa nirqan: — Yuyaykuni chay askha manuta pampachasqa kaqmi paytaqa munakunqa, nispa. Jesustaq: — Chanintan ninki, nirqan.

⁴⁴Chay warmita qhawarispataq Simonta nirqan: — ¿Rikushankichu kay warmita? Wasiykimanmi haykumurqani, manataq chakiypaq unuta qowarqankichu, paytaq ichaqa weqenkunawan chakiyta ch'aqchuykuspa chukchanwanraq ch'akichin.

⁴⁵Manan much'aykuwarqankichu, paytaq ichaqa haykumusqanmantapacha chakiyta much'ashallan.

⁴⁶Manan umayta aceitewan hawiykuwarqankichu, paytaq ichaqa q'apaq hawinawan chakiyta hawiykuwan.

⁴⁷Chayraykun niyki, paypa askha huchankunatan pampachani sinchita munakuwasqanrayku. Pisillata pampachasqaqa pisillatan munakun, nispa.

⁴⁸Warmitataq nirqan: — Huchaykikunatan pampachayki, nispa.

⁴⁹Mikhuq-masinkunataq ninakurqanku: — ¿Pitaq kayri huchakunatapas pampachaqqa? nispanku.

⁵⁰Chaymi Jesusqa warmita nirqan: — Diospi iñiyniykin qespichisunki, thak kaypi ripuy, nispa.