Read Diospa Simin Qelqa DEUTERONOMIO 13 Bible Online

DEUTERONOMIO 13 - Diospa Simin Qelqa bible

DEUTERONOMIO 13

¹Profetapas otaq mosqoypi rikuqpas qankuna ukhupi señalmantapas milagromantapas willasunkichis chayqa,

²hinataq chay willasqasuykichis hunt'akunqa chayqa, nisunkimantaq: Haku mana reqsisqanchis dioskunata yupaychamusunchis, nispa chayqa,

³aman kasunkichu chay profetaq rimasqantapas mosqoypi rikusqantapas. Diosniykichis Señor Diosmi chaywanqa probasunkichis tukuy sonqochus tukuy almachus payta munakunkichis chayta yachananpaq.

⁴Diosniykichis Señor Diosllatapunin servinkichis, manchakunkichis, kamachikuyninkunatapas hunt'ankichis, paytan kasunkichispas yupaychankichispas, payman k'askasqataq kawsankichispas.

⁵Chay profetatapas mosqoypi rikuqtapas wañuchinkichismi, Egiptopi kamachi-kaymanta horqomuqniykichis Diosniykichis Señor Dios contra sayarichiyta munasqasuykichismanta, hinallataq Señor Diosniykichismanta t'aqayta munasqasuykichismantawan. Ahinapin chay mana allinta qankuna ukhumanta wikch'unkichis.

⁶Kay suyuntinpi runakunaqa karupi tiyaqkunapas qayllapi tiyaqkunapas wak dioskunatan yupaychanku, chay dioskunataqa manan ñawpa taytaykichispas qankunapas yupaycharqankichischu. Ichaqa ancha munasqa amigoykipas, wawqeykipas, churiykipas, ususiykipas, munasqa warmiykipas pakallapi tanqasunki: wak dioskunata yupaychasun, nispa chayqa,

⁸aman kasunkichu, amataq uyarinkipaschu, amataq payta khuyapayankichu, amataq hinallata qhawankichu, amallataq payta pakaykunkichu,

⁹aswanpas wañuchinkin. Qanmi ñawpaqta rumiwan ch'aqenki, chaymantataq llaqtallantin ch'aqenqa.

¹⁰Wañunankaman ch'aqenki, Egiptopi kamachi-kaymanta horqomuqniyki Diosniyki Señor Diosmanta t'aqayta munasqasuykirayku.

¹¹Ahinapin llapa Israel runakuna chayta uyarispanku manchakunqaku, manataq hayk'aqpas chay millay mana chaninta ruwanqakuñachu.

¹²Diosniykichis Señor Diospa tiyanaykichispaq qosqasuykichis llaqtakunapi kashaspaykichis, rimayta uyariwaqchis:

¹³Millay runakunan rikhurimuspa, chay llaqta runakunata waqllichishan haku mana reqsisqanchis wak dioskunata yupaychamusun nispa, niqta chayqa,

¹⁴allintapunin qankunaqa tapupakunkichis. Cheqaqtapunitaq chay rimay uyarisqaykichisman hina llaqtaykichiskunapi chay millay mana chanin ruwasqa kanman chayqa,

¹⁵wañuchinkichispunin chay llaqtapi llapan tiyaqkunata, hinallataq llapan uywakunatapas, llapantapuni hayk'an chaypi kaqta wañuchinkichis.

¹⁶Qechusqaykichis tukuy kawsayninkutataq plaza pampaman montoykuspaykichis, llapa llaqtantinta ninawan kanaykunkichis Diosniykichis Señor Diospaq ruphachina ofrendata hina. Chaymi chay llaqta wiñaypaq purunyachisqa kapunqa, manataq hayk'aqpas wakmanta sayarichisqachu kanqa.

¹⁷Chay ñakasqa llaqtamantaqa aman imatapas qankunapaq waqaychakunkichischu, Señor Diospa phiñakuynin thaninanpaq. Hinan payqa allinta qhawarisunkichispas khuyapayasunkichispas, hinallataq askhayachisunkichispas ñawpa taytaykichisman prometesqanman hina,

¹⁸ichaqa Diosniykichis Señor Diosllatan kasunaykichis, kunan kamachisqay Señor Diospa tukuy kamachikuyninkunatataq hunt'anaykichis, paypa munayninta ruwaspaykichis.