Read Diospa Simin Qelqa DEUTERONOMIO 15 Bible Online

DEUTERONOMIO 15 - Diospa Simin Qelqa bible

DEUTERONOMIO 15

¹Sapa qanchiskaq watapin manuykichiskunata pampachapunkichis.

²Chaytaqa kay hinatan ruwankichis: Pipas llaqtamasinman imatapas manuqqa, chay manutan pampachapunqa. Manataq llaqta-masintapas wawqentapas: Pagapuway, ninqañachu, kikin Señor Dios chay manuta pampachasqanrayku.

³Wak llaqtayoqmantaqa manusqaykichista pagachikapuwaqchismi, llaqta-masiykichismantan ichaqa ama pagachikunkichischu.

⁴Chay hinapin qankuna ukhupi mana wakchakuna kanqachu, Diosniykichis Señor Diosmi hap'ikapunaykichispaq qonasuykichis suyupi saminchasunkichis,

⁵Señor Diosniykichistachus kasukunkichis, kunan kamachisqay paypa tukuy kamachikuyninkunatachus hunt'ankichis chayqa,

⁶prometesqasuykichisman hinan Diosniykichis Señor Diosqa saminchasunkichis. Askha llaqtakunamantaq mañankichis, qankunataq ichaqa mana pimantapas mañakunkichischu. Askha suyukunatan kamachinkichis, qankunatataq ichaqa mana pipas kamachisunkichischu.

⁷Diosniykichis Señor Dios qosunkichis chay suyu llaqtakunapi mayqen llaqta-masiykichispas wakcha kaqtinqa, aman sonqoykichista rumiyachinkichischu amataq maqllakunkichischu.

⁸Aswanpas yanapankichismi mañankichismi necesitasqantaqa.

⁹Paqtataq mana allinta yuyaykuwaqchis: Qanchiskaq wataqa qayllamushanñan, manu pampachana wata, nispaykichis. Hinaspataq llaqta-masiykichis wakchakunata millay ñawiykichiswan qhawariwaqchis, manataq imatapas qoykuwaqchischu. Chaymi qankuna contra Señor Diosman waqyakuqtin, huchachasqa kawaqchis.

¹⁰Imatapas qoykuspaykichisqa tukuy sonqon qonkichis ama maqllakuspa, chay hinata ruwaqtiykichismi Diosniykichis Señor Diosqa tukuy llank'asqaykichispi ima ruwasqaykichispipas saminchasunkichis.

¹¹Kay suyupiqa kashallanqapunin wakchakuna, chayrayku, kamachiykichis llaqta-masiykichista, wakchakunata, mana imayoqkunatapas ama mich'akuspa yanapanaykichispaq.

¹²Hebreo wawqeykichistapas panaykichistapas kamachiykichispaq rantikunkichis chayqa, soqta watallatan servichikunkichis, qanchiskaq watapitaq kacharipunkichis.

¹³Kacharipuspaykichisqa aman hinallatachu kacharparinkichis,

¹⁴aswanpas sonqopas-sonqo qoykunkichis uywaykichismanta, hinallataq trigota, vinota ima. Señor Diosniykichispa saminchasqasuykichisman hinan qonkichis.

¹⁵Yuyariychis qankunapas Egipto suyupi kamachi kasqaykichista, chaymanta Diosniykichis Señor Dios horqomusqasuykichistawan. Chayraykun chay hinata kunan kamachiykichis.

¹⁶Ichaqa qankunatapas wawaykichistapas munakuspa, qankunawanpas allillantaq kashaspa, kamachiykichis nisunkichis: Manan ripuymanchu, nispa chayqa,

¹⁷huk t'oqonata hap'ispa punkuman k'iraykuchispa ninri ura puntanta t'oqonkichis. Hinan chaymanta kamachillaykichispuni kapunqa. Hinallatataq warmi kamachiykichistapas ruwankichis.

¹⁸Ama sinchita sasachaychu kamachiyki kacharipuytaqa, payqa soqta watantinmi servirqasunkichis huk llank'apakuq runaq ganasqan kuskanllanmanta. Ahinapin Diosniykichis Señor Diosqa tukuy ruwasqaykichiskunapi saminchasunkichis.

¹⁹Diosniykichis Señor Diospaqmi t'aqankichis wakaykichismanta ovejaykichismanta llapan ñawpaq wachay orqo uñakunata. Wakaykichispa ñawpaq wachay orqo uñantapas aman llank'achinkichischu, ovejaykichispa ñawpaq wachay orqo uñantapas aman rutunkichischu.

²⁰Chaykunatataq sapa wata Diosniykichis Señor Diospa ñawpaqenpi tayta-mama wawakunantin mikhunkichis pay akllakunqa chay cheqaspi.

²¹Ichaqa ñawsapas wist'upas imallanpas mana allin kanman chayqa, aman Diosniykichis Señor Diosman sacrificiota haywankichischu.

²²Aswanpas wasiykichispin mikhunkichis, ch'uya kaqpas mana ch'uya kaqpas llapaykichis, imaynan tarukatapas luychutapas mikhunkichis hinata.

²³Yawarnintan ichaqa ama mikhunkichischu, aswanpas pampamanmi hich'apunkichis.