Read Diospa Simin Qelqa DEUTERONOMIO 21 Bible Online

DEUTERONOMIO 21 - Diospa Simin Qelqa bible

DEUTERONOMIO 21

¹Diosniykichis Señor Dios hap'ikapunaykichispaq qosunkichis chay suyupi huk qhari ayata campopi wañuchisqata tarinkichis, manataq yachankichischu pichus wañuchisqantapas chayqa,

²juezkunan kurak runakunapiwan rispanku ayaq kasqanmanta mayqen llaqtachus qaylla kasqanta yachanankupaq thaskiypi tupunqaku.

³Hinan ayaq aswan qayllanpi kaq llaqta kurak runakuna hap'imunqaku manaraq llank'aq manataq yugo churasqapaschu kaq huk malta wakata.

⁴Hinaspa mana chakmana mana tarpuna mana tukuy tiempo unu phawashaq wayq'oman chay malta wakata qatinqaku, chaypitaq nucanmanta wañuchinqaku.

⁵Hinallataq Leví ayllu runa sacerdotekunapas rinqaku, paykunan churanakuytapas maqanakuytapas chaninchanqaku. Señor Diosmi Leví aylluta akllarqan payta servinanpaq, sutinpi saminchananpaq.

⁶Hinan aya qayllapi kaq llaqta llapan kurak runakuna wayq'opi nucanmanta wañuchisqa malta waka patapi makinkuta maqchikunqaku.

⁷Khaynatataq ninqaku: Manan ñoqaykuqa chay runata wañuchirqaykuchu, manataqmi rikurqaykupaschu.

⁸Señor Diosniyku, Egiptomanta horqomusqayki Israel llaqtaykita pampachay, ama huchachaychu llaqtaykita mana huchayoq runaq wañusqanmanta, nispanku.

⁹Chay hinapin qankunaq chawpiykichismanta chay runa wañuchiy huchata chinkachinkichis, Señor Diospa munayninta ruwaspaykichis.

¹⁰Awqa-tinkuyman awqaykichis contra lloqsiqtiykichis, Diosniykichis Señor Dios atipachisuqtiykichis, paykunata presota apankichis chayqa,

¹¹pipas sumaq rikch'ayniyoq warmita rikuspa munakunman, hinaspataq casarakuyta munanman chayqa,

¹²wasinmanmi pusanqa. Hinan warmiqa chukchanta rutukunqa sillunta wit'ukunqa,

¹³llaqtanpi churakunan p'achatapas ch'utikuspa wak p'achawan churakunqa, chay runaq wasinpitaq qhepapunqa. Tayta-mamanmantataq huk killa hunt'ata llakikunqa. Chaymantataq casarakapunqa, chaymi qosan kapunqa paypas warmin kapunqa.

¹⁴Manataqchus chay qhepata munapunman chayqa, wasinmantan kacharipunqa, manan qolqeman vendenmanchu, manallataq kamachinpas kanmanchu, paywan puñuspa pisichasqan hawa.

¹⁵Pipas iskay warmiyoq kaspan, hukta munakunman hukkaqtataq cheqnikunman chayqa, aman munasqa warminpa churinman sayakunqachu. Iskayninkutaq wachakunman, phiwi churintaq cheqnisqa warminpi kaqtinqa,

¹⁶kawsayninta churinkunaman rakipuspaqa, manan munasqa warminpi churinman phiwi churinman hinaqa tupaqninta qonmanchu, cheqnisqa warminpi phiwi churintachá sarunchanman.

¹⁷Aswanpas cheqnisqa warminpi phiwi churin kasqanta reqsikuspa, sapankaman qonan t'aqamanta iskay t'aqata payman qonqa, phiwi churiq chaskinan hinapuni kasqanrayku.

¹⁸Huk runaq churin mana kasukuq k'ullu kaspa tayta-mamanpa anyasqanta mana kasunqachu, wanananpaq waqtaykuqtinpas manapuni kasukunqachu chayqa,

¹⁹tayta-mamanmi payta hap'ispa llaqta punkuman apanqa, llaqta kurak runakunaq chaninchananpaq.

²⁰Ninqakutaq: Kay churiykun sinchi k'ullu mana kasukuq, manapunin rimapayasqaykuta kasuwankuchu, payqa machaqmi rakraputaq, nispa.

²¹Chaymi llaqta runakunaqa wañunankama rumiwan ch'aqenqaku. Chay hinapin qankunamanta chay mana chaninta ch'usaqyachinkichis, llapan Israel runataq chayta uyarispa manchakunqa.

²²Pipas sinchi huchallikusqanrayku wañuchinapaq huchachasqa kaspa, wañuchisqa kanqa, hinaspa sach'aman warkusqa kanqa chayqa,

²³aman ayanta tutantin sach'api warkurayachinkichischu, aswanpas chay kikin p'unchaymi p'ampapunkichis, sach'api wañusqa warkurayaqqa Diospa ñakasqanmi. Ahinapin Diosniykichis Señor Dios hap'ikapunaykichispaq qonasuykichis suyuta mana qhellichankichischu.