Read Diospa Simin Qelqa DEUTERONOMIO 28 Bible Online

DEUTERONOMIO 28 - Diospa Simin Qelqa bible

DEUTERONOMIO 28

¹Cheqaqtapuni Diosniykichis Señor Diosta kasukunkichis, hinataq kunan kamachisqay tukuy kamachikuyninkunatapas hunt'ankichis chayqa, Señor Diosqa tukuy kay pachapi kaq suyukunaq qollanantan churasunkichis.

²Hinallataq Diosniykichis Señor Diosta kasukuqtiykichisqa, tukuy kay saminchakunata chaskinkichis.

³Señor Diosmi saminchasunkichis llaqtapipas campopipas.

⁴Señor Diosmi saminchasunkichis askha wawakunawan, cosechakunawan, wakaykichispa ovejaykichispa tukuy uywaykichispa uñankunawan ima.

⁵Señor Diosmi saminchanqa ruru pallasqa canastaykichista, masa chapunaykichistapas.

⁶Señor Diosmi saminchasunkichis tukuy ima ruwasqaykichispi purisqaykichispipas.

⁷Señor Diosmi awqaykichiskuna phawaykusuqtiykichis atipachisunkichis, paykunan contraykichispi hamunqa huk ñanninta, ayqenqakutaqmi tukuy ñanninta.

⁸Diosniykichis Señor Diosmi saminchanqa taqeykichista, tukuy llank'asqaykichistapas, paymi qosunkichis chay suyupi saminchasunkichis.

⁹Diosniykichis Señor Diospa kamachikuynintataq hunt'ankichis, munaynintataq ruwankichispas chayqa, paypaq t'aqasqa llaqtantan ruwasunkichis, prometesqasuykichisman hina.

¹⁰Chaymi kay pachapi llapan suyukuna yachanqaku Señor Diospa llaqtan kasqaykichista, hinan manchakusunkichis.

¹¹Señor Diosmi anchatapuni allinyachisunkichis ñawpa taytaykichisman qonasuykichispaq prometesqan suyupi, paymi qosunkichis askha wawakunata, uywaykichispa askha uñankunata, askha cosechata ima.

¹²Qhapaq kayninta kicharispa, hanaq pachamanta hallp'aykichisman qarpanta kachaykamunqa, tiemponpitaq parata chayachimunqa, tukuy llank'asqaykichistataq saminchanqa. Chaymi askha suyukunaman manunkichis, qankunataq ichaqa mana pimantapas manukunkichischu.

¹³Diosniykichis Señor Diospa kamachikuyninkunata makilla uyarinkichis hinaspa hunt'ankichis kunan kamachisqayman hina chayqa, Señor Diosqa ñawpaqllapipuni churasunkichis manataq qhepapichu, llapa suyukunaq qollanantaq kankichis manataq kamachichu.

¹⁴Amataq kunan kamachisqay simikunamanta pañamanpas lloq'emanpas t'aqakunkichischu wak dioskunata servinaykichispaq.

¹⁵Diosniykichis Señor Diosta mana kasuspaykichis, kunan kamachisqay tukuy kamachikuykunata unanchaykunatapas mana hunt'ankichischu chayqa, tukuy kay ñakaykunan chayamusunkichis:

¹⁶Señor Diosmi ñakasunkichis llaqtapipas campopipas.

¹⁷Señor Diosmi ñakanqa ruru pallasqa canastaykichista masa chapunaykichistapas.

¹⁸Señor Diosmi ñakasunkichis, chaymi pisi wawayoq pisi cosechayoq kankichis, hinallataq wakaykichispas ovejaykichispas pisi uñayoq kanqa.

¹⁹Señor Diosmi ñakasunkichis tukuy llank'asqaykichispi purisqaykichispipas.

²⁰Señor Diosmi tukuy llank'ayniykichiskunapi ñakasunkichis, hinan llakisqataq musphasqataq kankichis, qonqaylla hukpaqkama wañuchisqa kanaykichiskama, mana chaninta ruwaspaykichis Señor Diosta saqerparisqaykichis hawa.

²¹Señor Diosmi millay onqoywan onqochisunkichis hap'ikapunkichis chay suyupi lliw wañunaykichiskama.

²²Hinallataq tisis onqoywan, fiebrewan, punkillikuywan, hump'i onqoywan onqochisunkichis, chakraykichistapas ch'akichipunqa, kachamunqataq ruphashaq wayrata polvillotawan, hinan qankuna wañunkichis.

²³Manan chhikantapas para chayanqachu, hallp'aykichispas manataqmi rurunqachu.

²⁴Señor Diosqa paraq rantinpin t'uyurmita, aqota hanaq pachamanta qankunaman chayachimunqa lliw wañunaykichiskama.

²⁵Señor Diosmi awqaykichiskunawan atipachisunkichis, awqaykichis contran huk ñanninta rinkichis, paykunamantataq ayqenkichis tukuy ñanninta, chaymi kay pachapi llapa suyukunapas qankunata rikuspa llaksakunqaku.

²⁶Wañuqtiykichispas salqa animalkunan phalaq animalkunan ayaykichista mikhunqa, manataq pipas hark'akunqachu.

²⁷Señor Diosmi Egipto onqoywan, ch'upuwan, khiki onqoywan, seqsi onqoywan ima onqochisunkichis, manataq chay onqoykunamanta qhaliyankichischu.

²⁸Hinallataq Señor Diosqa waq'ayachisunkichis, ñawsayachisunkichis, yuyayniykichistapas chinkachisunkichis,

²⁹chaymi sut'i p'unchaypi ñawsa hina llankhupakunkichis, tukuy imapipas manataq allinchu kasunkichis. Sarunchasqataq suwasqallataq kashankichispas, manataq pipas qespichisunkichischu.

³⁰Casarakunaykichispaq rimaykukusqaykichis warmiwanpas wak qharin puñunqa. Wasitan ruwakunkichis, manataq chaypi tiyankichischu. Uvas chakratan plantankichis, manataq rurunta mikhunkichischu.

³¹Toroykichistapas qhawashaqtiykichismi nak'anqaku, manataq aychanta mikhunkichischu. Asnoykichistapas ñawpaqeykichismantan qatirikunqaku, manataq kutichipusunkichisñachu. Ovejaykichiskunatapas awqaykichiskunan qatirikunqaku, manataq pipas hark'aykukusunkichischu.

³²Rikushaqtiykichismi churiykichispas ususiykichispas wak llaqtayoq runakunaman hap'ichisqa kanqaku, qankunataq wawaykichista rikuykuypipuni kankichis, ichaqa manan imanaytapas atinkichischu.

³³Chakraykichismanta cosechaykichistapas llank'asqaykichis tukuy rurukunatapas mana reqsisqaykichis llaqta runakunan mikhunqaku. Qankunataq sarunchasqa muchuchisqa tukuy tiempo kankichis.

³⁴Chaymi tukuy chaykunata rikuspaykichis waq'ayankichis.

³⁵Señor Diosmi onqochisunkichis ch'upuwan moqoykichispi phakaykichispi, chay onqoytaq chaki pampaykichismanta uma mukukuykichiskama tukusunkichis, manataq qhaliyankichischu.

³⁶Señor Diosmi apachisunkichis qankunatapas akllakunkichis chay reytapas qankunaqpas ñawpa taytaykichispapas mana rikusqaykichis suyuman. Chaypin rumimanta k'ullumanta ruwasqa wak dioskunata yupaychankichis.

³⁷Señor Dios apachisunkichis chay suyukunapin llapa runakuna qankunamanta musphanqaku, rimaytan q'oñirichinqaku, asipayasunkichistaqmi.

³⁸Askha muhuta chakraykichisman tarpunkichis, pisillatataq cosechankichis, langostaq mikhusqan hawa.

³⁹Uvas chakratan plantankichis llank'ankichistaq, ichaqa manan uvasta pallankichischu, manataq vinotapas ukyankichischu, kurukuna lliwta tukupusqanrayku.

⁴⁰Llapa suyuntinpin olivos sach'aykichis kanqa, ichaqa rurukuna pampaman urmaqtinmi mana aceite kanqachu sumaqchakunallaykichispaqpas.

⁴¹Churiykichiskunapas ususiykichiskunapas kanqan, ichaqa manan qankunawanchu tiyanqa, aswanpas wak suyukunamanmi preso apasqa kanqaku.

⁴²Tukuy sach'aykichiskunatapas chakra ruruykichistapas langostakunan mikhurqapunqaku.

⁴³Qankunawan tiyaq wak llaqtayoqkunan qankunamantaqa aswanta qhapaqyanqaku, qankunataq ichaqa aswan-aswanta wakchayapunkichis.

⁴⁴Chay wak llaqtayoqkunan mañasunkichis, qankunaqtaq mana imapas paykunaman mañanaykichispaq kanqachu. Paykunan qollana kanqaku, qankunataq kamachi kankichis.

⁴⁵Chay hina ñakasqan qankuna kankichis, chaymi chay ñakaykuna taripasunkichis hinan wañuchisunkichis, Diosniykichis Señor Diosta mana uyarispa kamachikuyninkunatapas unanchayninkunatapas mana kasukusqaykichis hawa.

⁴⁶Tukuy chaykunan wiñaypaq sut'inchanqa qankunata mirayniykichistapas Señor Diospa muchuchisqanta, hinallataq hukkunatapas musphachinqa.

⁴⁷Diosniykichis Señor Diosmi tukuy allinkunata qosunkichis, qankunataq ichaqa mana tukuy sonqochu kusisqachu payta servinkichis,

⁴⁸chayraykun Señor Diosqa awqaykichista kachamunqa, hinan paykunata servinkichis. Muchunkichistaq yarqayta ch'akiyta, hinataq q'alalla kankichis, tukuy imaymanataq pisisunkichis. Señor Diosmi kamachi-kaypi sinchita muchuchisunkichis wañunaykichiskama.

⁴⁹Señor Diosmi sinchi karu suyumanta wak llaqtata contraykichispi kachamunqa, paykunaq rimaynintaqa manan entiendenkichischu. Paykunan anka hina hap'irqosunkichis.

⁵⁰Paykunaqa sinchi millaymi kanku, manan yuyaqkunatapas respetanqakuchu, wawakunatapas khuyapayanqakuchu.

⁵¹Uywaykichista chakra ruruykichista mikhunqaku, ahinapitaq wañunkichis. Manan saqesunkichischu trigotapas, vinotapas, aceitetapas, manallataq saqesunkichischu wakaykichispa ovejaykichispa uñantapas, ahinapin qankunaqa wañunkichis.

⁵²Diosniykichis Señor Dios qosunkichis chay suyu llapan llaqtaykichiskunata muyuykuspan phawaykunqaku, confiakusqaykichis allin ruwasqa perqakunatapas thuninqakun.

⁵³Chaymi awqaykichis muyuykuspa k'iskiykusuqtiykichis, sinchitapuni yarqayta muchunkichis, hinaspan Diosniykichis Señor Diospa qosqasuykichis kikin wawaykichista mikhukunkichis.

⁵⁴Chayrayku, qankunamanta luylusqa munasqa hunt'asqapi wiñaq qharipas mana munakuq tukupunqa wawqenpaqpas, munasqa warminpaqpas, qhepaq wawankunapaqpas,

⁵⁵manataq wawankuq aychan mikhushasqantapas paykunaman qonqachu, awqaykichis muyuykuspa k'iskiykusuqtiykichis mana imapas mikhunaykichispaq kaqtin.

⁵⁶Hinallataq luylusqa munasqa hunt'asqapi wiñaq warmipas sinchi llaklla kaspa, mana hayk'aq chakipi puriqpas mana munakuq tukupunqa munasqa qosanpaqpas, churinpaqpas, ususinpaqpas,

⁵⁷manataq paykunaman qonqachu, aswanpas pakallapi mikhunqa wachakusqan wawantapas parisnintapas, awqaykichis muyuykuspa k'iskiykusuqtiykichis mana imapas mikhunaykichispaq kaqtin.

⁵⁸Manachus kay qelqapi qelqasqa yachachikuykunata makilla hunt'ankichis, manallataq Diosniykichis Señor Diospa qollanan manchana sutintapas yupaychankichischu chayqa,

⁵⁹paymi qankunata mirayniykichistapas musphana mana tukukuq ñak'ariykunawan muchuchisunkichis, hinallataq mana qhaliyaq millay onqoykunawan onqochisunkichis.

⁶⁰Egipto suyu manchakusqaykichis onqoykunawantaq onqochisunkichis, chaykunawanmi onqoshallankichispuni.

⁶¹Aswantaraqmi Señor Diosqa muchuchisunkichis kay kamachikuy simi qelqapi mana qelqasqa kaq tukuy ñak'ariykunawan onqoykunawan ima, ahinapin qankuna wañunkichis.

⁶²Diosniykichis Señor Diospa siminta mana kasukusqaykichis hawa, hanaq pacha ch'askakuna hina askha kashaspan, pisi runakunallaña qhepankichis.

⁶³Señor Diosqa anchatan kusikurqan askhayachisqasuykichismanta allinyachisqasuykichismantapas, chay hinallataqmi kusikunqa urmachisqasuykichismantapas wañuchisqasuykichismantapas. Hap'ikapunkichis chay hallp'amantapas wikch'usqataq kankichis.

⁶⁴Señor Diosmi ch'eqechisunkichis kay pachantin tukuy suyukunaman. Chaykunapin qankunaqpas ñawpa taytaykichispapas mana reqsisqaykichis dioskunata yupaychankichis, rumimanta k'ullumanta ruwasqa dioskunata.

⁶⁵Chay suyukunapiqa manan qankunapaq thak-kay kanqachu, manataq samaykunaykichis cheqaspas kanqachu. Aswanpas Señor Diosmi manchasqa llakisqa sonqoyoqta kawsachisunkichis, waqay-waqay uyayoqta, mana suyakuyniyoqta ima.

⁶⁶Kawsayniykichispas thutasqa q'aytupi warkurayaq hinan kanqa, tutapas p'unchaypas sinchi manchasqan purinkichis, manataq yachakunkichischu kawsanaykichistapas wañunaykichistapas.

⁶⁷Sonqoykichistaq tukuy rikusqaykichiswan llaksasqa khatatatanqa, chaymi tutamanta ninkichis: ¡Ojalachá ch'isinllaña kanman! nispa, ch'isintaq ninkichis: ¡Ojalachá pacha paqarllaña kanman! nispa.

⁶⁸Señor Diosmi nirqasunkichis: Manan Egipto suyumanqa kutinkichisñachu, nispa. Chaywanpas paymi qochanta barcokunapi Egipto suyuman kaqta kutichisunkichis. Chaypin awqaykichiskunaman k'askakunkichis kamachi kanaykichispaq, ichaqa manan pillapas rantiyta munasunkichischu, nispa.