Read Diospa Simin Qelqa DEUTERONOMIO 3 Bible Online

DEUTERONOMIO 3 - Diospa Simin Qelqa bible

DEUTERONOMIO 3

¹Chaymantataq wak ñanninta Basanman rirqanchis, hinan Basán suyu rey Ogqa llapan ejercitonpiwan Edreipi ñoqanchiswan awqa-tinkuq lloqsimurqan.

²Señor Diostaq niwarqan: Ama payta manchakuychu, makiykimanmi hap'ichiyki paytapas ejercitontapas suyuntapas, imaynan Hesbonpi tiyaq Amor runa rey Sehonta ruwarqanki hinallatataqmi paytapas ruwanki, nispa.

³Chay hinaqa, Diosninchis Señor Diosmi Basán suyu rey Ogta llapan runakunatawan hap'ichiwarqanchis, hinan llapanta wañuchirqanchis.

⁴Chay hinallataq llapan llaqtankunatapas hap'ikapurqanchis. Basán suyu rey Ogpa kamachisqan Argob hallp'api llaqtakunaqa soqta chunkan karqan.

⁵Llapan chay llaqtakunaqa muyuriq alto perqakunawan, punkukunawan, wisq'anakunawan allin waqaychasqan karqan, hinallataq campopi askha llaqtachakunapas karqan.

⁶Llapan chay llaqtakunata thunispanchismi qharikunata, warmikunata, wawakunata ima llapanta wañuchirqanchis, imaynan Hesbón llaqta rey Sehonpa llaqtankunapi ruwarqanchis hinata.

⁷Ñoqanchisqa uywakunata, llaqtakunamanta llat'anasqanchis kawsaykunallatawanmi hap'ikurqanchis.

⁸Ahinatan haqay p'unchay munaychakurqanchis Jordán mayu inti lloqsimuy ladopi tiyaq Amor runakunaq iskaynin reypa hallp'ankunata, Arnón mayumanta Hermón orqokama.

⁹(Chay Hermón orqotan Sidón runakuna Sirión nispa sutichasqaku, Amor runakunataq Senir nispa).

¹⁰Hinan hap'ikapurqanchis pata pampapi llaqtakunata, Galaad hap'iyta, rey Ogpa kamachisqan Basán suyutawan, inti lloqsimuy ladopi Salca llaqtakama Edrei llaqtakama.

¹¹(Basán suyu rey Ogqa sapallanñan Refaim runakunamanta qheparqan, puñunan tarimataq fierromanta karqan, sayayninmi tawa metro karqan, anchontaq yaqa iskay metro, chay tariman kashanraq Amón runakunaq Rabá llaqtanpi).

¹²Chay suyukunata hap'ikapuspanchismi, Rubén aylluman Gad ayllumanwan hallp'ata qorqani, Arnón mayu qayllapi Aroermanta Galaadpa kuskan orqo-orqonkama llapan llaqtakunantinta.

¹³Manasés kuskan ayllumantaq qorqani Galaadpa hukkaq kuskanninta, rey Ogpa kamachisqan llapan Basán suyuta, chaypi kashaq Argob hap'iytawan. (Chay Basán suyuqa Refaim Runakunaq Hallp'an nispa sutichasqan karqan.

¹⁴Manasespa churin Jairmi llapan Argob hap'iyta hap'ikapurqan Gesur hap'iywan Maaca hap'iywan qorpakama. Hinan Basán suyuta paypa sutinwan suticharqan Habot-jair nispa. Chay sutiyoqmi kunankama kashan).

¹⁵Manasespa ayllunmanta Maquirmantaq Galaad hap'iyta qorqani.

¹⁶Rubén aylluman Gad ayllumanwantaq Galaadmanta Arnón mayukama qorqani, uray qorpantaq Arnón wayq'o karqan, wichay qorpantaq Amón runakunaq qorpan Jaboc mayu karqan.

¹⁷Inti lloqsimuy ladopi Jordán qheswa wayq'ota qorqani, Cineret qochamanta Kachi Qocha qaylla Pisga orqo k'uchukama, Jordán mayutaq qorpanku karqan.

¹⁸Hinan kamachirqaykichis: Señor Diosninchismi kay hallp'ata tiyanaykichispaq qosunkichis. Llapaykichistaq kallpayoq qharikuna wawqeykichis Israel runakunaq ñawpaqenta armasqa rinkichis.

¹⁹Ichaqa uywaykichis, warmiykichis, wawaykichis, paykunallan kay qosqay hallp'api qhepanqaku. (Rikunin askha uywayoq kasqaykichista).

²⁰Manataqmi Jordán mayu inti haykuy suyumanta kay qosqay hallp'aman kutimunkichischu, Diosninchis Señor Diospa paykunaman qonan hallp'ata hap'ikapunankukama, hinallataq wawqeykichis qankuna hina thak-kaypi tiyanankukama, nispa.

²¹Josuetapas kamachillarqanitaq: Ñawiykiwanmi rikurqanki imaynatachus chay iskay reyta Diosninchis Señor Diospa tukuy ruwasqanta, chay hinatan payqa llapan purisqayki suyukunapi reykunatapas ruwanqa.

²²Ama manchakuychischu, Diosninchis Señor Diosmi qankunamanta maqanakunqa, nispa.

²³Hinan chaypacha Señor Diosmanta mañaykukurqani:

²⁴Señor Diosníy, qanmi Ancha Hatun kayniykita hatun atiyniykitawan ñoqa kamachiykiman rikuchiwayta qallarinki. Manan hanaq pachapipas kay pachapipas qan hina musphana ruwaq Diosqa kanchu.

²⁵Mañakuykin, Jordán mayu chimpaman pasachiway haqay sumaq hallp'ata, sumaq orqo-orqota, Libanotawan rikunaypaq, nispa.

²⁶Señor Diostaq ichaqa qankuna hawa ñoqapaq phiñakurqan, chaymi mañakusqayta mana uyariwarqanchu, aswanmi niwarqan: ¡Chaykamalla! Amaña anchata chaymanta rimapayawaychu.

²⁷Pisga orqo pataman wichay, hinaspa chaymanta qhawariy inti haykuy ladota, wichay ladota, uray ladota, inti lloqsimuy ladota ima. Manan Jordantaqa chimpawaqchu, aswanpas qhawarillankin.

²⁸Josueta yachachispa kamachiy, kallpachay yuyaychay. Paymi Israel runakunata Jordán mayuta chimpachinqa, hinan paypa kamachisqan qhawarisqayki hallp'ata hap'ikapunqaku, nispa.

²⁹Hinan Bet-peor qhaway wayq'opi qhepakurqanchis.